1 RAMPAUBE Moses dage marang, pa rang eh cu, 2 "Aaron nah pe napeimedung, nah Israelme pelane dage rangbeulu. Penuide rangbeu lu RAMPAUBE aja kai kebeudung de: 3 ‘Israelme ge hetumseu ge, meurünna ge, mede hemeu ge de ramzeuki gade, mede ramzeuki gwale de, ratak tei kerane daptset eh, 4 pa RAMPAUBE dage ratak tei kerane RAMPAUBE kebam paiki kimui ga pwalwet mecai, pa daptset kedine mau dida. Pa hejai teilwa dida, nah pecu pe minadung kakgade teu ntsam bi di maisia. 5 Aja aide pekie cai Israelme RAMPAUBE dage teigai kera penui ratakdung de paiki kimui gage teu gwang lu kerane, cingkube da teugwang beu eh kekangbau reca tei eh RAMPAUBE dage reca beulu kerane, hegwale de recadung tei kecu swa de. 6 Cingkube paiki kimui ga RAMPAUBE recabam gage hejai de kezin gaizie; pa pe ca de ru gai zie RAMPAUBE ziemne perim kehengui ge teibeu kerane. 7 Minadung hemeu miedung dage ratak teisi tadi bi maisia da, kedanemene penui helipui medung nzwa dida. Aide penui ziemne bam jüja kera hezai zie penui ceheu pelane kecang de.

8 Nang penui dage rangbi maisia, ‘Israelme keheibe de, mede sangme penui kakga lungh kebamme, keru ratak mede ratak keda ge tei eh 9 RAMPAUBE dage ratak tei kerane paiki kimui ga teugwang mecai, cipau de de pe minadung kakgade teu ntsam di maisia.

10 Magade Israelme kelak keheibe de, mede sangme penui kakga lungh kebam keheibe hejai tyei cai, Ih hejai tyei kela cipau de de pieta dizie nah Ih pe minadung kakgade pecu kai ntsam dizie. 11 Kedanemene makaunegu keringria hejai gabam. Ih nnuide hejai kepeu au recabam gage nnui teilung ziemne kezuyi ratak tei kerane peu, kedanemene hejai cide kezuyi tei kecuge, hejai cide teilungh ziemne kezuyi kepeu ge. 12 Ci ziemne Ih Israelme dage rang migede penui kakga kebam hejai tyei kerabe ma, mede peu sangme penui kakga lungh kebam keheibe de hejai tyei kerabe ma. 13 Israelme keheibe de, mede sangme penui kakga lungh kebam keheibe de, tyeilu kela makaune mede nruine de teitset kelabe, cipaude hangdeu gage hejai de rui gidi delwe hejai cide tangdei le pwacim di maisia.

14 Kedanemene ringkela leune keringria hejai gabam. Cide ziemne Ih Israelme dage rang, "Nnui ringkela keheibe kaune jai tyeisiabi, kedanemene ring kela leune keringria au penui jai ga bam lu. Keheibe de cide tyei kecume de teu ntsam bi dizie." 15 Keheibe tsai kedi mede renaamkaune ne tuikedi kaune tyei cai, cipaude Israelme lie de mede nnui kakga kebam sangme lie de, pa pe paini heta di nah pekatei pecu duipia di maisia, nah pa tinghegi kemaktane mci meda. Pecai pa mci dizie. 16 Dede pa pe paini heta mene mede pepum duipia di mecai, pa pemau punglu kerabe.’"