1 ताहां मोशे आन इस्राएलवाले यहोवाआ काजे ओं गित गावये.

"आंय यहोवाआ गित गाविहीं, काहाके तिये वोडे कामे कोअयेहे;

कोड़ाअरी तियांआं सालाड़नाराहां बी तिये दोर्‍यामेहें टाकी देदा.✝15:1 प्रगटी 15:3

2 यहोवा माआ मजबुत राखवाली होय,

आन तियेज माआं तारण कोअयोहो.

आन तो माआं देव होय, आन आंय तियाआ स्तुती कोअहीं, तो माआ डायाआ देव होय;

आंय तियाआ वोडी गोठीइ बाप्तिम गिते गाविहीं.✝15:2 यश 12:2; भजन 118:14

3 यहोवा आखाम रोत वोडू होय;

तियाआ नाव प्रभु होय.

4 तिये फारोअ कोड़ाआ गाडे आन सेयनिकोहों दोऱ्याम टाकी देदा;

आन तिये फारोअ हाजाम हाजा आधिकाऱ्योहों लाल दोर्‍याम बुडाड़ी देदा.

5 उंडे पाअयें तियांहां बुडाड़ीत लेदा;

ते डोणोअ होस उंडा पाअयोंम बुडीत गोया.

6 यहोवा देवा, ताआ हाजाड़्यू आथ जुदू सेक्तीवालू होय;

तिया आथो वाअहीं तू दुस्मोनोहों सुउवीत टाकत्लू.

7 ताआ विरुद्दाम उठनाराहां तू ताआ वोडी ताकते वाअहीं पाड़ीत टाकेहे;

तु ताआ खोत काडेहे आन ते पुहूटाआ होस पेटाइत जातेहे.

8 तुमे जोरमेहें सालाड़ल्या वारा वाअहीं पाईं टिगोअ होस उबो रोत गोयो,

जोरे सालनारा सेलकाआ पाअयोंअ वातड़ा पितड़ाआ होस उबो रोत गोयो;

दोऱ्याआ विसमेहें उंडामेहें पाईं जाअखोज गाडात गोयो.

9 दुस्मोने कोयो तो, ‘आंय याआं फाट लागिहीं, आंय जात कोइत तोइत लेहीं;

आंय लुटीत कोइत माल वाटीत लेहीं, तिया वाअहीं माआ जिव ताराइत जाय.

माआ आथोवाअहीं तारवाआ उमात कोइत तियांहां आंय माईंत टाकीहीं.’

10 पोन तुमे ताआ हावा सोड़्यी, ताहां दोऱ्याआ पाअयें तियांहां डुबाड़ीत लेदा;

ते लोड़ाआ होस दोऱ्याआ उंडा पाअयोंम बुडीत गोया.

11 यहोवा देवा, ताआ होसऱ्युउ देवतामेहें कोडू होय?

ताआ सारकू बिहीरु कोडू होय कायनाहां, तू सोकायीइ वाखरी जुदू ताकतवालू होय,

ताआ कामे सोमत्कारोवाले होय, आन तु जुदे वोडे कामे कोअत्लू!

12 तुमे ताआ हाजाड़्यू आथ उमाड़्यू

आन धरती तियां दुस्मनोहों गिईंत लेदाहा.

13 तुमे सोड़वीइल्या माअहुंहूं तु ताआ दया वाअहीं सालाड़्ये;

ताआ सेक्ती वाअहीं तु तियांहां ताआ सोकी जागेहे लेत जाहे.

14 पारका देसोवाले ए गोठ उनाइत कोइत बिके वाअहीं काबरात जाय;

पलिश्तीवाले माअहें धाके वाअहीं कापे वोले.

15 एदोमोअ प्रधान बित जाय;

मोवाबोअ पेडा माटी थुर थुर कापे वोले;

आन आखे कनान वाले माअहें जिव पाड़ीत लेय.

16 तियांमेहें बिक आन कापारु फोहीत जाय;

आन ताआ ताकत देखीत कोइत, ए यहोवा, ताआ माअहें जें तुमे ताऱ्येहे,

तें निहींत जाय ताअहूं जाआं तें डोणोअ होस ठावकेज उबे रोत जाय.

17 तु तियांहां पोताड़ीत कोइत ताआ डोगोअ खास जागामेहें मिकिही;

ओ तो जागु होय, ए यहोवा जियाहा तु ताआ रोअलाआ काजे बोणायुहू,

आन तो सोकु जागु होय जियाहा ए प्रभु तुमे सोताहा तियार कोअयुहू.

18 यहोवा ताआ राज हादाजोलम रोय."

19 मिसरवालाआ कोड़ाआ गाडे, मोन्ज्ये फारोअ, कोड़ा आन तियांआं सालाड़नारा दोऱ्याम जाता रोया, यहोवा देवे तियांहां दोऱ्याअ पाअयोंम बुडाड़ी देदा; पोन इस्राएलवाले दोऱ्याम कोअड़ी जागे सालीत मेरे निहींत गोये.✝15:19 1 शमु 18:6

20 तेहेलाम आरोनोअ बोअह्हीं मिरयाम नावोअ भविश्यवक्ती ओती, ते तियीइरी बाकी बोईं नेहें आथोम डोफणो वाजाड़तीन नास्तीज तियाआ फासाड़ी आयी. 21 मिरयाम ओं गित गावतीते:

"यहोवा देवोअ गित गावा, काहाके तिये जुदे वोडे कामे कोअयेहे.

तिये कोड़ाअरीज कोड़ाआ गाड़ीवालाहां बी दोऱ्याम टाकी देदा."

22 तिहीं रोत मोशे इस्राएल माअहुंहूं लाल दोर्‍याअ रोत आगाड़ी लेत गोयू. ते माअहें शूर नावोअ रानम आये. तें तिन दिही जाआं रानम रोत सालित गोये; पोन तियांहां पाईं ने जोड़्यो. 23 तिहींइं फासाड़ी तें मारा नावोअ एकी जागेहे पोते, तिहीं पाईं कड़वो ओतो तिहीं वाअहीं तें पीत ने सेके, तिहींज वाअहीं तिया जागाअ नाव मारा*15:23 मारा या नावोअ अर्थ इब्री बाशाम कोड़वो एहें कोवाअत्लो. पोड्यो. 24 माअहें मोशेए जागे टुटणीइतेज आयेन कोयो, "आमू इंहीं की पिवें?" 25 ताहां मोशे यहोवा देवोहो रावणी कोअयी, तेहेलाम देवे तियाहा एक साड़ देखाड़्यो. मोशे तिया साड़ोअ डिन्गो पांअयोंम टाक्यू, ताहां तो पाईं मिठो ओत गोयो.

तिया गालाहा देवे तियांहां जिवीइलोअ नियम बोणावीत आप्या. तिहींज तिये तियांआं विश्वासोअ परिक्शा बी पाल्यी. 26 तिये कोयो, "जर तु ताआ देवोअ वसन पुरा मोनोवाअहीं मानित सालही, जो तियाआ नजरेम हाजो होय तो कोअही, तियाआ आदेशोपोअ कान देही; आन तियाआ आखी गोठी मानही, ताहां जेती बिमारी आंय मिसर देसोपोअ मोकल्यीही, तिहींमेएं एक बी तापोअ ने मोकलो; काहाके आंय ताहूं नेराय आपनारु देव होय."

27 ताहरेए इस्राएल माअहें सालित कोइत एलीम नावोअ जागेहे आये, तिहीं पाअयोंअ बारा उकला आन खारक्याआ सत्तर साड़े ओते; तिहीं तियां पाअयोंअ जागेहे पोड़ावू टाक्यू.