Êxodo 17

खड़काम रोत पाईं

1 फाशोअ इस्राएलोअ आखी मंडड़ी सिन नावोअ जंगलोम रोत निहींयी, आन यहोवाअ आदेशोअ अनुसार पोड़ावू कोअते रफीदीम इंहीं तियांआं पोड़ावू कोअयू; आन तिहीं तियां माअहुंहूं पिअहूं पाईं ने जोड़्यो.✝17:1 गणती 14:12,14 2 याअकाजे ते मोशेएरी सुलाअतेज कोने वोल्ये, "आमुहूं पिअहूं पाईं आपे."

मोशे तियांहां कोयो, "तुमू माअरी काहा सुलाअतेहे? आन यहोवाआ परिक्शा काहा लेतेहे?"

3 फाशोअ तिहीं माहुंहूं तोरोहो लागी, ताहां ते ओं कोत मोशेएरी टुटणे वोल्ये, "तु आमुहूं बालबासाहा आन जनवारोहो माईंलोअ काजे मिसर मेहें रोत काहा लेतायुहू?"✝17:3 निर्ग 14:12

4 ताहां मोशे यहोवाहा रावणी कोइत कोयो, "यां माअहोंअरी कि कोओ? एं आखे माहूं डोणाटीलोअ तियार होय."

5 यहोवा मोशेहे कोयो, "इस्राएलोअ माट्योमेहें रोत थोड़ाक डायहांहां ताअरी लेत जा; आन जियी डेंगारी वाअहीं तू नील नोयीपोअ लागावयीते, तियीही ताआ आथोम लेत कोइत माअहों आगाड़ी साल. 6 पाल, आंय ताआ आगाड़ी सालित कोइत होरेब डोगोअ एका खड़कापोअ उबू रोही आन तु तिया खड़कापोअ लागावजी, ताहां तियामेहें रोत पाईं निहे, जियाहा एं माअहें पिये." ताहां मोशे इस्राएलोअ डाया माहुंहूं पालताज तेहेंज कोअयो.

7 आन मोशे तियाआ जागाआ नाव मस्सा आन मरिबा मेक्यो, काहाके इस्राएलवाला माअहूं तिहीं भान्गड़ कोअयी आन "देव आमाअरी होय के नाहां" एहें कोत देवोअ देवोहो पारजाणीत हेएयू.

अमालेकवालाअरी लड़ाय

8 तिहीं रोत अमालेक देसोअ माअहें आवीत कोइत रफीदीमीमेहें इस्राएलोअरी लड़ाय कोए वोल्ये.✝17:8 1 शमु 15:2 9 ताहां मोशे यहोशवाहा कोयो, "आपाआ काजे थोड़ाक माट्योहों निवड़ीत ले, आन बाअथे जात कोइत अमालेकी वालाअरी लड़ाय कोअ; आन आंय हांदाआ देवोअ डेंगार आथोम लेत कोइत डोगोअ सुटीपोअ उबू रोहीं." 10 मोशेए या आदेशोअ परमाणे यहोशवा अमालेकी वालाअरी लड़ाय कोउ वोल्यू; आन मोशे, आरोन, आन हूर डोगोअ सुटीपोअ सोड़ीत लागा. 11 जाहां जाहां मोशे तियाआ आथ उसे कोअतुतो ताहां ताहां इस्राएल जिकतोतो; पोन जाहां जाहां तो तियाआ आथ निसे कोअतुतो ताहां ताहां अमालेकी जिकतोतो.✝17:11 भजन 44:6; याकोब 5:16 12 पोन जेहेलाम मोशेए आथ थाकीत गोया, ताहां आरोन आन हुर नेहें डोंण लेत कोइत मोशेए निसे मेकी देदो, आन तो तियापोअ बोहीत गोयु, आन आरोन आन हूर बेनू वोल एक एक फाकड़ो तोइत तियाआ आथोहो वातड़ो तोइत रोया; आन तियाआ आथ दिही बुडू ताअहूं जाआं तोइत रोया. 13 आन यहोशवा तारवाईइ तारे वाअहीं अमालेकी माअहोंहों हारवी देदे.

14 ताहां यहोवा मोशेहे कोयो, "ओर कोत ए गोठ पुस्तकोम लेखीत ले आन यहोशवाहा कोतापी दे के आंय जुगोअ निसे रोत अमालेकोवालाहां नावासट आरवीत टाकीहीं."✝17:14 कायदा 25:17-19; 17:1; 1 शमु 15:2-9 15 ताहां मोशे एक देवान्यो बोणायो आन तियाआ नाव "यहोवा निस्सी"*17:15 निस्सी यहोवा माहूं जिकाड़नारु, माआ प्रभु माआ जेंडू मिक्यो; 16 आन तिये कोयो, "यहोवाआ जेंडू तोइत रोवा. अमालेकी वालाअरी यहोवाआ काजे आमाआं लड़ाय पिड़ीन पिड़ी सालुज रोय."