उत्पत्ती 11

माअहुंउं बाशामेहें गड़बड़

1 पुरी धरतीपोअ एकुज बाशा आन एकुज बोलसी ओती. 2 तियी होमसे माअहें उक्तामाअहें साली सालीइ शिनार देसोमेहें एक सापड़ू देखीत कोइत तियामेहें वोहती टाकी देदी. 3 ताहरेए तें तियां तियांआज गोठी कोए वोल्ये, "आवा, आपू इटे बोणावी बोणावीइ वारुहूं आगीमेहें पाकाड़ते." आन तियां डोणोअ जागापोअ ईटावाअहीं, आन सुनाआ जागापोअ डांबऱ्यो वापऱ्यो. 4 फाश्योअ तियां कोयो, "आवा, आपू एक होयर आन जियाआ सिगी जुगोहो टेके एहलुहू एक टावर बोणावहूं, एहें कोइत आपू आपाआ नाव कामावहूं आन मोन्ज्ये आपुहूं पुरी धरतीपोअ पसरुहूं पोड़े ने पोड़े."

5 जाहां माअहें होयर आन टावर बोणावे वोल्ये, ताहां तियांहां पालीइलाअ कोअते यहोवा उतरीत आयू. 6 आन यहोवा देवे कोयो, "आंय की पालोहो के आखे एकाज टोलाआ होय, आन बाशा बी तियां आखाअ एकुज होय,आन तियां एहलोहोज काम बी सुरु कोअयोहो; आन ओमे जो किबी ते कोइलाआ कोशित कोए, तियामेहें रोत किज बी तियांआं काजे सादो ने रोनारो. 7 तियाहा काजे आवा, आपू उतरीत कोइत यांआं बाशामेहें गड़बड़ी टाकत्ला, के एं एकान बिहीराअ गोठी ने समजीत सेके." 8 एहेंकोइत यहोवा तियांहां तिहीं रोत पुरी धरतीइ उपोअ वेरी देदे; आन तियां तिया होयरोहो बोणावीइला सोड़ी देदो. 9 तिहींइं काजे तिया होयरोअ नाव बाबेल*11:9 बाबेल इब्रीमेहें "बाबेल" मोन्ज्ये गड़बड़ पोड्यो; काहाके पुरी धरतीइ बाशामेहें जे गड़बड़ी होय, ते यहोवा तिहींज टाकल्यी, आन तिहींज रोत यहोवा माअहुंहूं पुरी धरतीइ उपोअ वेरी देदे.

शेमोअ पारवाड़

10 शेमोअ पारवाड़ ए होय. रेलेए बेन वोरह्योअ फाटी जाहां शेम एक होव वोरह्योअ ओवू, ताहां तियाप रोत अर्पक्शदोअ जल्म ओवो; 11 आन अर्पक्शदोअ जल्माआ फासाड़ी शेम पास होव वोरह्ये जिवतू रोयू; आन तियाआ फाशे बी पोर्‍या आन पोर्‍यी उबज्ये.

12 जेहेलाम अर्पक्शद पस्तीस वोरह्योअ ओवू, ताहां तियाप रोत शेलहोअ जल्म ओवो; 13 आन शेलहोअ जल्माआं फासाड़ी अर्पक्शद शार होव तिन वोरह्ये जिवतू रोयू, आन तियाआ फाशेए बी पोर्‍या आन पोर्‍यी उबज्ये.

14 जाहां शेलह तीस वोरह्योअ ओवू, ताहां तियाप रोत एबेरोअ जल्म ओवो; 15 आन एबेरोअ जल्माआ फासाड़ी शेलह शार होव तिन वोरह्ये जिवतू रोयू, आन तियाआ फाशे बी पोर्‍या आन पोर्‍यी उबज्ये.

16 जेहेलाम एबेर शोवतीस वोरह्योअ ओवू, ताहां तियाप रोत पेलेगोअ जल्म ओवो; 17 आन पेलेगोअ जल्माआं फासाड़ी एबेर शार होव तीस वोरह्ये जिवतू रोयू, आन तियाआ फाशे बी पोर्‍या आन पोर्‍यी उबज्ये.

18 जाहां पेलेग तीस वोरह्योअ ओवू, ताहां तियाप रोत रूआ जल्म ओवो; 19 आन रूआ जल्माआ फासाड़ी पेलेग बेन होव नोव वोरह्ये जिवतू रोयू, आन तियाआ फाशे बी पोर्‍या आन पोर्‍यी उबज्ये.

20 जेहेलाम रूआ बत्तीस वोरह्योअ ओवू, ताहां तियाप रोत सरूगोअ जल्म ओवो; 21 आन सरूगोअ जल्माआ फासाड़ी रूआ बेन होव हांत वोरह्ये जिवतू रोयू, आन तियाआ फाशे बी पोर्‍या आन पोर्‍यी उबज्ये.

22 जाहां सरूग तीस वोरह्योअ ओवू, ताहां तियाप रोत नाहोरोअ जल्म ओयो; 23 आन नाहोरोअ जल्माआ फासाड़ी सरूग बेन होव वोरह्ये जिवतू रोयू, आन तियाआ फाशे बी पोर्‍या आन पोर्‍यी उबज्ये.

24 जाहां नाहोर एकोनतीस वोरह्योअ ओवू, ताहां तियाप रोत तेरहोअ जल्म ओवो; 25 आन तेरहोअ जल्माआं फासाड़ी नाहोर एक होव उग्णीहीं वोरह्ये जिवतू रोयू, आन तियाआ फाशे बी पोर्‍या आन पोर्‍यी उबज्ये.

26 जाहां तेरह सत्तर वोरह्योअ ओवू, ताहां तियाप रोत अब्राम आन नाहोर आन हारान ए उबज्या.

तेरहोअ पारवाड़

27 तेरहोअ पारवाड़ ए होय. तेरहोप रोत अब्राम, नाहोर, आन हारान ए उबज्या; आन हारानोअ लोट उबज्यु. 28 हारान तियाआ आब्हा तेरहोअ सामनेज खास्द्याआं ऊर नावोअ होयरोम मोइत गोयु, जिहीं तियाआ खासगी जागु ओतू. 29 अब्रामे साराअरी वेहवाल कोइत लेदो आन नाहोरे मिल्काअरी वेहवाल कोइत लेदो, जे तिया हारानोअ बेटिह्ही ओती आन यिस्का बी तियाआज बेटिह्ही ओती. 30 सारे ते वांज्यी ओती; तियीइ पोर्‍ये ने उबज्ये.

31 तेरह तियाआ पोर्‍यू अब्राम, आन तियाआ पोर्‍याआ पोर्‍यू लोट, जो हारानोअ पोर्‍यू ओतू, आन तियाआ वोवड़ीह्ही सारे, जे तियाआ पोर्‍या अब्रामोअ लाडी ओती, यां आखाहा लेत कोइत खास्द्याआं ऊर गांवोम रोत निहीत कोइत कनान देसोम जानु वोल्यू; पोन हारान नावोअ देसोम पोतीत कोइत तिहींज रोनु वोल्यू. 32 जेहेलाम तेरह बेन होव पास वोरह्योअ ओवू; ताहां तो हारान देसोमेहें मोइत गोयु.