1 यीं गोठीइ फासाड़ी एहेलोहो ओवो के देवे अब्राहामोअ एहें कोत कोइत पारजाणो लेदो, "अब्राहाम!" तिये कोयो, "ओय, आंय इंहीं होंव*22:1 आंय इंहीं होंव खोरो शब्द होय, माहूं पाल?"

2 देवे कोयो, "ताआ पोर्‍याहा, मोन्ज्ये तु मेर कोअहे तिया एकाआ एकुज पोर्‍या इसाहाकोहो आरी लेत कोइत मोरीया✝22:2 2 इति 3:1 देसोम जा; आन आंय ताहूं कोहीं तिया डोगोपोअ आगीम गाराहा कोअ."

3 ताहरुउ अब्राहाम वेगर्‍युउ सिंजीवड़ाअरीही उठ्यू आन तियाआ गोदड़ापोअ जीण बांद्यी आन तियाआ बेन सेवक, आन तियाआ पोर्‍यू इसाहाकोहो आरी लेदू, आन आगीइ गाराहा कोअते लाकड़े फोड़ीत लेदे; ताहरुउ निहीत कोइत जिया जागाआ सर्सा देवे तियाअरी कोअयीते तो तियाअहें जानु वोल्यू. 4 तिसरे दिही अब्राहामे नजर टाकीत कोइत तिया जागाहा सेटेज रोत पाल्यो; 5 आन अब्राहाम तियाआ सेवकोहों कोयो, "गोदड़ाअरी इहींज उबा रोजा; ओ पोर्‍यू आन आंय तिहीं जाआं जाताहा, आन आराधना कोइत, ताहराआ तुमाआ जागे वोलीत आवुहूं."

6 ताहरुउ अब्राहामे आगीइ गाराहाआ काजे लाकड़े तियाआ पोर्‍या इसाहाकोहो सोड़वी देदे, आन आगेन सुरू तिये आथोम लेदू; आन ते बेनू वाट लागीत पोड़्या. 7 इसाहाके तियाआ आब्हा अब्राहामोहों कोयो, "बा,"

तिये कोयो, "काहा माआ सोआ?"

इसाहाके कोयो, "पाल, आगेन लाकड़े ते होय; पोन आगीम गाराहा आपीइलोअ कोअते मेडो खोतो?"

8 अब्राहामे कोयो, "माआं सोआ, देवुज सोताहा गाराहा कोइलोअ काजे बोराबर मेडो होदीत आपे." आन ते बेनू आरी आरी आगाड़ी गोया.

9 जाहां ते देवे कोयो तियी जागे पोत्या; ताहां अब्राहामे तिहीं देवान्यो बोणावीत कोइत लाकड़े हेशे, आन तियाआ पोर्‍या इसाहाकोहो बांदीत कोइत देवान्यापोर्‍याआ लाकड़ापोअ मिकी देदू.✝22:9 याकोब 2:21 10 ताहरुउ अब्राहामे तियाआ पोर्‍याआ गाराहा ओवुहूं जोवे कोत आथम सुरू लेत कोइत उमाअयू. 11 तेहेलाम यहोवा देवोअ देवदूते तियाहा आअड़ीत कोइत कोयो, "अब्राहाम, अब्राहाम!" तिये कोयो, "ओय, आंय इंहीं होंव."*22:11 "ओय, आंय इंहीं होंव."खोरो शब्द होय, "माहूं पाल"

12 देवदूते कोयो, "या पोर्‍यापोअ आथ मा टाकही, आन तियाहा मा की कोअही; काहाके तुमे माआ काजे ताआ पोर्‍याहा, ताआ एखला एका पोर्‍याहा बी ने मिकीत रोयू; इंहीं वाअहीं माहूं ओमे जाआंत गोयोहो के तु देवोअ बित सालेहे."

13 अब्राहामे नजर टाकीत फासाड़ीइ वोल पाल्यो, ताहां एक मेडो तियाआ हिंगे वोणसाम आलाइत रोल्यो देखाअयो; ताहरुउ अब्राहाम जात कोइत तियाहा काड्यो, आन तियाआ पोर्‍याआ जागापोअ तिया मेडाहा आगीम गाराहा कोत आप्यो.✝22:13 इब्री 11:17-19 14 अब्राहामे तिया जागाआ नाव "यहोवा यिरे"*22:14 यहोवा यिरे पुरवीइनारु देव मिक्यो. तिहींज वाअहीं आज बी माहें कोतेहे के "यहोवाआ डोगोपोअ तो पुरवे."

15 फाशुउ यहोवाआ देवदूते दुसरीवारी होरगाम रोत अब्राहामोहो हाद कोइत कोयो, 16 "यहोवा एहें कोहे, आंय माआंज ए शप्पत खाहो के तुमे जों ओं काम कोअयोहो के ताआ पोर्‍यू, ताआ एखलु एक पोर्‍यू बी ने मिक्यू; 17 तिहीं वाअहीं आंय नक्की ताहूं आशिर्वाद आपीहीं; आन नक्की ताआ पारवाड़ीही जुगोमेर्‍याआ ताराआ एतीही आन दोर्‍याआ मेरेपोर्‍याआ रेटाआ होस ने गोणाय एतीही कोई देहीं,✝22:17 इब्री 11:12 आन ताआ पारवाड़ तियांआं दुस्मोनोअ गांवोअ आधिकारी बोणे;✝22:17 इब्री 6:13,14 18 आन धरतीइ आखा देसोअ माअहुंहूं ताआ पारवाड़ी वाअहीं आशिर्वाद जोड़े;✝22:18 प्रेशित 3:25; गलाती 3:16 काहाके तुमे माआ गोठ मानित लेदीही." 19 ताहरुउ अब्राहाम तियाआ सेवकोअ जागे वोलीत आयू, आन ते आखा बेर्शेबा जाआं आरी-आरी गोया; आन अब्राहाम बेर्शेबामेहें रोनु वोल्यू.

20 ए गोठी ओवी तिहींइं कोडे तेबी अब्राहामोहो कोयो, "मिल्काहा ताआ पाही नाहोरपरोत पोर्‍ये उबज्येहे." 21 मिल्काआ आँठ पोर्‍या ओवा ते होय: तियीइ डायु पोर्‍यू ऊस, आन ऊसोअ पाही बूस, आन कमूएल, जो अरामोअ आब्हू बोण्यु, 22 फाश्याआ केसेद, हजो, पिल्दाश, यिद्लाप, आन बतूएल ओवा. 23 ए आँठू मिल्काआ पोऱ्या अब्राहामोअ पाही नाहोरपरोत उबज्या आन बतूएलपरोत रिबीका उबज्यी. 24 फाशीइ नाहोरोअ रेउमा नावोअ एक उप-लाडी बी ओती; जियीप रोत तेबह, गाहाम, तहश, आन माका ए उबज्या.