1 ताहरुउ इसाहाके याकोबोहो हादीत कोइत आशिर्वाद आप्यू, आन आदेश आप्यू, "तू कोडी कनानी पोर्‍यीइरी वेहेवाल मा कोइत लेही. 2 पद्दन-अराम मुलखोमेहें ताआ वोडा आब्हा बतूएलोअ कोअमेहें जात कोइत, तिहीं ताआ मामाह्हा लाबानोअ एकी पोर्‍यीइरी वेहेवाल कोइत लेजी. 3 सर्वसेक्तिमान देव ताहूं आशिर्वाद आपे, आन ताआ वेलू वादाड़े, आन तू राज्या राज्याआ मोंड्लीइ डायु ओविही. 4 तो ताहूं आन ताआ पारवाड़ीही बी अब्राहामोअ होस आशिर्वाद आपे, के तू ओं देस जियामेहें तू पारकू ओत कोइत रोहे, आन जियाहा देवे अब्राहामोहो आप्युतो, तियाआ आधिकारी ओत जाअहूं जोवे."✝28:4 उत्प 17:4-8 5 आन इसाहाके याकोबोहो मोकल्यू, आन तो पद्दन-अरामी बतूएलोअ मुलखोमेहें लाबानोअ जागे जातु रोयू, जो याकोबोअ आन एसावोअ आयही रिबीकाआ पाही ओतू.

6 जाहां इसाहाके एसावोअ आशिर्वाद याकोबोहो आपीत कोइत पद्दन-अराम जागे मोकली देदू, के तो तिहींज रोत लाडी लेतावे, आन तियाहा आशिर्वाद आपीइलाअ वेले ए आज्ञा बी आप्यी, "तू कोडी कनानी पोर्‍यीइरी वेहेवाल मा कोइत लेही," 7 आन याकोब आयहीन आब्हाअ मानित कोइत पद्दन-अरामोमेहें वाट लागू. 8 ताहरुउ एसाव कनानी पोर्‍यी आब्हा इसाहाकोहो नाहां गोमती ओं आखो देखीत कोइत आन विसार कोइत, 9 एसावे अब्राहामोअ बेटाह्हा इस्माएलोअ जागे गोयु, आन इस्माएलोअ पोर्‍यी आन नबायोतोअ बोअह्हीं महलतेअरी वेहेवाल कोइत तियीही तियाआ लाडीमेहें सामील कोइत लेदी.

10 याकोब बेर्शेबाम रोत निहीत कोइत हारानोअहें वाट लागू. 11 आन तिये एकी जागे पोतीत कोइत रात तिहींज काडीइलाअ विसार कोअयू, काहाके दिही बुडीत गोयुतो; तियाहा काजे तिये तियी जागेए एक डोण विसीत कोइत तियाआ ऊहुट्यो कोइत जागेज हुवीत गोयु. 12 ताहां तिये होपनामेहें की देख्यो, के एक रिहणो धरतीपोअ उबो होय, आन तियाआ सिगू होरगाम जाआं पोत्युहू; आन देवोअ देवदूत तियापोअ रोत सोड़ताहान उतरीइताहा.✝28:12 योहान 1:51 13 आन यहोवा तियापोअ उबू रोत कोइत कोहे, "आंय यहोवा, ताआ वोडाब्हा अब्राहामोअ देव, आना इसाहाकोअ बी देव होय; जिहीं तू लोटुहू ओ जागू आंय ताहूं आन ताआ पारवाड़ीही आपिहीं.✝28:13 उत्प 13:14,15 14 आन ताआ पारवाड़ कादुउ तुलाआ होस जाअखीलीही वोदे, आन उक्तामा, बुट्टामा देहामा, पालामा शारी वोल पसरीइती जाय: आन ताआन ताआ पारवाड़ी वाअहीं धरतीपोर्‍याआ आक्खा माअहुंहूं आशिर्वाद जोड़े.✝28:14 उत्प 12:3; 22:18 15 पाल, आंय ताअरी रोहीं, आन जिहीं काबी तू जाही, तिहीं ताआ राखवाली कोअहीं आन ताहूं या देसोम वापिस लेत आविहीं: आंय माआ शब्द जाअहूं जाआं पुरो ने कोइ देंव ताअहूं जाआं ताहूं ने सोड़ो."

16 ताहरुउ याकोब जागीत गोयु, आन कोनु वोल्यू, "हुदाअलीज यी जागे यहोवा होय; आन माहूं ए गोठ ने मुंदू ओती." 17 तिये बित कोइत कोयो, "ओ जागु केतुहू खतरनाक होय! ओ ते देवोअ कोओहो सोड़ीत बिहीरो किज नाहां ओत सेकतो; पोन ओं होरगाआ गेटुज ओये."

18 वेगर्‍युउ याकोब उठ्यू, आन तो ऊहुट्याआ डोण लेत कोइत तियाहा उब्बुज रुपी देदू, आन तिया डोणोअ सुटीपोअ तेल हारी देदो. 19 तिये तिया जागाआ नाव बेथेल*28:19 बेथेल मोन्ज्ये देवोअ कोओ मिक्यो; पोन तिया होयरोअ नाव पेल लूज ओतो. 20 ताहरुउ याकोबे एहें कोत पालनी तोअयी, "जर देव माअरी रोत कोइत यी वाटेमेहें माआं राखवाली कोए, आन माहूं खाअलोअ रोटू, आन पेवुहूं आंगड़े आपे, 21 आन आंय माआ आब्हाआ कोअमेहें होकेहे वोलीत आविहीं; ताहां यहोवा माआ देव ठरे. 22 आन आंय उबू राख्युहू ओ डोण देवोअ कोओ ठरे: आन जों किबी तू माहूं आपिही तियाआ दाहवू भाग आंय खोरीज ताहूं आप्या कोअहीं."