Gênesis 39

योसेफ आन पोतीपारोअ लाडी

1 जेहेलाम योसेफोहो मिसरोमेहें पोताड़ी देदू, ताहां पोतीपार नावोअ एके मिसरी जो फारोअ आधिकारी आन राजवाड़ाआ राखवाल्योंअ मुख्यू ओतू, तियाहा इस्माइलीइ आथे, जे तियाहा तिहीं रोत लेत गोयेते, वेसातु लेदू. 2 योसेफ तियाआ मिसरी मालख्योअ कोअमेहें रोतुतो, आन यहोवा देव तियाअरी ओतू✝39:2 प्रेशित 7:9 तियाहा काजे तो जिकीत माटी बोणीत गोयु, 3 आन योसेफोअ मालख्ये पाल्य के यहोवा देव तियाअरी रोहे, आन जो काम तो कोअहे तियाहा यहोवा देव तियाआ आथे पुरो कोइ देहे. 4 ताहां तियाआ मेरवानीइं नजर तियापोअ ओवी, आन तो तियाआ सेवा साकरी कोइलाआ काजे ठरवी देदू; आन तिये तियाहा तियाआ कोअमेर्‍युउ आधिकारी बोणावीत कोइत तियाआ आखो बादो योसेफोअ आथोम होपी देदो. 5 जोयोंअ रोत तिये योसेफोहो तियाआ कोओअ आन तियाआ आखी मालमिलकते पोअ आधिकारी बोणायू, तोयोंअ रोत यहोवा देव योसेफोवाअहीं तिया मिसरीइ कोओहो आशिर्वाद आपू वोल्यू; आन तियाआ कोअमेहें, खेतोमेहें, आन तियाआ जो किबी ओतो आक्खा पोअ यहोवा देवोअ आशिर्वाद जोड़ू वोल्यू. 6 पोतीपार तियाआ आक्खो योसेफोअ आथोम एतोह जाआं होपी देदो के तियाआ खाअलाअ रोटू सोड़ीत, तो तियाआ मालमिलकतेहे किज ने समजीइतुतो.

योसेफ गोअटू आन मुखलातु ओतू. 7 यीं गोठीइ फासाड़ी एहेलोहो ओवो के तियाआ मालख्योअ लाडी योसेफोअहें पाल्यो आन कोयो, "माअरी हुव." 8 पोन तिये स्विकार नाहां कोअयो आन तियाआ मालिखोअ लाडीही कोयो, "देख, जो किबी या कोअमेहें होय तो माआ आथोम होये; तो माआ मालख्योहो नाहां मुंदू, आन तिये तियाआ आक्खो माआ आथोम होपी देदोहो. 9 या कोअमेहें मारोत वोडो कोडोज नाहां, आन तिये निस्ती ताहूं सोड़ीत मापरोत कोड्लीज वस्तु नाहां निकाड़ीत मिक्यी, काहाके तू तियाआ लाडी होय. तियाहा काजे आंय एहेलुहू वोडु गुनू कोइत देवोअ नजरेम पापी काहा बोणो?" 10 आन एहेलोहो ओवो के ते दाड़ख्यीइ योसेफोहो कोती रोयी, के तो तियीइरी हुवे, पोन योसेफ तियीइ गोठ ने मान्यू.

11 एक दिही योसेफ तियाआ काम कोइलाआ काजे कोअमेहें आयु, आन कोअमेर्‍याआ पावर कोडोज कोअमेहें ने ओतो. 12 ताहरीइ पोतीपारोअ लाडी तियाआ आंगड़ेज तोइत कोयो, "तू माअरी हुव," पोन तो तियाआ आंगड़ो तियीइ आथोम टाकतुज निहीत बारथे गुगदू वोल्यू. 13 जाहां पोतीपारोअ लाडी पाल्यो के तो तियाआ आंगड़ो माआ आथोम टाकतुज बारथे निहीत गुगदू वोल्युहू, 14 ताहरीइ तियी कोअमेर्‍याआ आखा पावरोहों हादीत कोइत कोयो, "इब्री पावरोहो पाला, तियाहा माआ मालख्ये इज्जत जावाड़ीलोअ काजे लेत आयुहू. ओ इब्रीवालू माअरी हुवीइलोअ काजे माआ जागे आवल्यु, पोन आंय जाअखीलीही जोरे आअड़ी देद्लो; 15 आन आंय जाअखीलीही जोरे आअड़ीइत्ली देखीत तो तियाआ आंगड़ो माआ जागे टाकीत कोइत बारथे निहीत गुगदू वोल्ल्यू."

16 आन ते तियाआ तों आंगड़ो तियीइ कोअ धोणी आयु ताअहूं जाआं तियीइ जागेज मिकीत रोयी. 17 ताहां ते तियीइ धोण्योहो बी एज गोठ कोयी, "जिया इब्री पावरोहो तुमू आपाअहीं लेत आये, तो माआ आब्रु जावाड़ीइलोअ काजे माआ जागे आयुतो; 18 पोन जेहेलाम आंय जाअखीलीही जोरे आअड़ी देद्लो, ताहां तो तियाआ आंगड़ो माआ जागे टाकतुज बारथे निहीत गुगदू वोल्ल्यू."

19 "ताआ पावरे माअरी एहेलोन एहेलोहो काम कोअल्यो," एहें कोत जाहां योसेफोअ मालख्ये तियाआ लाडी कोयो तों उनाअयू, ताहां तियाहा जुदी खोत लागी. 20 योसेफोअ मालख्ये तियाहा जिहीं जेलेम राजाआ जेलार्‍या बोंद ओता तिहीं तोइत कोइत केंडी देदू; ताहरुउ तो तियी जेलेमेहें रोयू. 21 पोन यहोवा देव योसेफोअरी रोयू आन तियापोअ माया कोअयी,✝39:21 प्रेशित 7:9 आन जेलेए आधिकारीइ मेरवानीइ नजर तियापोअ ओवी. 22 जेलेए आधिकार्‍ये तियां आखा जेलार्‍याहा, जे जेलेमेहें ओता तियांहां योसेफोअ आथोम होपी देदा; आन जें जें कामे ते तिहीं कोअताते, तें कामे तियाआज आदेशो वाअहीं ओवतेते. 23 योसेफोअ ताबाम जों किबी ओतो, तियामेहें जेलेए आधिकारीही कोड्लीज वस्तु पालुहूं ने पोड़तीते; काहाके यहोवा देव योसेफोअरी ओतू; आन जों किबी तो कोअतुतो, यहोवा देव तियाहा तियामेहें फोल आपतुतो.