Levítico 17

रक्ताआ सोकाय

1 यहोवा देवे मोशेहे कोयो, 2 "आरोन आन तियाआ बेटाह्हांहां आन आक्खा इस्राएलवाला माअहोंहों को; यहोवा देवे जो आदेश आप्युहू तो ओ होय; 3 इस्राएलोअ घराणामेएं कोडोज बी माहुंउं नेताहां मेडाआ गिद्लो, नेताहां बोकड़ो पोड़ावामेहें नेताहां पोड़ावाआ बारथे माअयो, 4 पोन यहोवा देवोअ सामने मिलापवाला तोंबाआ बाओअ जागे गाराहा कोइलोअ काजे ने लेत गोयो, ताहां तिया माहूंपोअ रक्त वोहाड़ीइलाआ गुनू लागे; तिये रक्त वोहाड़्यो कोत, तियाहा तियाआ माअहोंम रोत माइत टाकुहूं जोवे. 5 ओं काहा काजे के इस्राएलवाले माअहें गाराहा कोइलोअ जें जनवारे तें सापड़ा रानोम माअतेहे, तें मिलापवाला तोंबाआ बाओअहीं पुंजाराआ जागे, यहोवा देवोअ कोअते लेत जात होमजोणोअ गाराहा कोइत गाराहा कोअहूं जोवे. 6 आन तियांआं रक्त पुंजारु यहोवा देवोअ सामने मिलापवाला तोंबाआ बाओअ जागे देवान्यापोअ साटारुहूं जोवे, आन देवोअ काजे हाजी गुंदाअनारी वस्तु कोत तियांआं सरबी आगीम पेटाड़ुहूं जोवे. 7 जें बोकड़ाआं पुंजनारे बोणीत कोइत सिनालो कोअतेहे, ते फाश्येए तियांआं गाराहाआ जनवारोहो तियांआं कोअते गाराहा ने कोअहूं जोवे. तुमाआ पिड़ीन पिड़ीइ कोअते ओ हादाजोल्म्युउं नियम रोय.

8 "तू तियांहां को, के इस्राएलोअ घराणाआ माअहोंमेहें रोत नेताहां तियांआं विसमेहें रोनारा पारका माअहोंम रोत आगीइ गाराहा आन आगीइ गाराहा कोअयो, 9 पोन तियाहा मिलापवाला तोंबाआ बाओअ जागे यहोवा देवोअ कोअते गाराहा ने कोअयो; तिया माहुंहूं तियाआ माअहोंम रोत माइत टाकुहूं जोवे.

10 "जर इस्राएलोअ घराणामेर्‍योअ नेताहां तियांआं विसमेहें रोनारा पारका माअहूंमेर्‍योअ कोडोज बी माअहुंउं ओय, जों रक्त खाय, तियाआ वोल रोत आंय सोब मुउड़ीत लेहीं आन तियाआ माअहोंम रोत तियाहा आरवीत टाकिहीं.✝17:10 उत्प 9:4; लेवी 7:26,27; 19:26; कायदा 12:16,23; 15:23 11 काहाके डिलोअ जिव रक्तामेहें रोहे; आन तों रक्त आंय तुमुहूं तुमाआ जिवोअ बोदले देवान्यापोअ पाप टाप्या कोए तेहें काजे आप्योहो; काहाके रक्ताम जिव होय कोत रक्ताहा जिवोअ वोतीइ पास्तावू कोअतेहे. 12 तियाहाज तोम आंय इस्राएलवालाहां कोयोहो के तुमामेर्‍योअ कोडोज माहुंउं रक्त ने खाअहूं जोवे, आन तुमाआ विसमेहें रोनारे पारके माअहें बी ने खाअहूं जोवे.

13 "इस्राएलवाला मेर्‍योअ नेताहां तियांआं विसमेहें रोनारा पारका माअहूंमेएं कोडोज बी काहा नाहां रोतो, खातेहे तियां जनवार नेताहां सिड़ाहा हावोज कोत माअयो; ताहां तियाआ रक्त पुंयपोअ ओलीत तुला वाअहीं टापी देअहूं जोवे. 14 काहाके हारेक जिवोअ डिलोम रक्तज तियाआ जिव होय; तियाहाज काजे इस्राएलवालाहां मी कोयोहो के कोड्लीज जातीइ जनवारोअ रक्त तुमू मा खाहा, आखा जनवारोअ जिव तियांआं रक्ताजमेहें होय; जों कोडो तों खाय तियाहा माइत टाकुहूं जोवे. 15 एखु इस्राएलवालो ओय नेताहां पारको ओय, जों कोडो एखा मोइत रोल्या नेताहां रानठ्ये जनवारे वेतरीइल्या कोर्‍याआ जनवारोअ माहां खाय, ताहां तों सोताआ आंगड़े तुवुहूं जोवे आन पाअयोंवाअहीं उंगलुहूं जोवे, तो हांजेपोअ जाआं एठो रोअहूं जोवे; ताहांजात तों सोको ओवे. 16 पोन जर तों सोताआ आंगड़े ने तुवे आन ने उंगले, ताहां तियाहा तियाआ गुनाआं वोजू सोताहा आखलुहूं पोड़े."