Mateus 25

Mofwano gwa vatomami vatato

14 "Khanke, Yesu akapaala, owami wa khochanya khwa Matuunda olapyanekelwa no mofwano gwa muntu yunaa angile atite mosenjo motale. Panaa angile akhale khwandya mosenjo gwakwe, etaa vatomami vakwe, akavapeela nsao yakwe ili vayimelele. 15 Aleavapelaa kela yomwii khopumana no olaala wakwe. Akamopeela wa mwandyo kechele alufu jetaano ja zahabu, no yoonge kechele alufu jiwele ja zahabu, no yoonge kechele alufu yemwii ya zahabu. Apenee andyaa mosenjo gwakwe. 16 Motomami yunaa aleapelwaa kechele alufu jetaano ja zahabu, akapeta nanejo khotomamela molemo gwa khogola no khogolya vento, apataa ne vechele viinge alufu jetaano ja zahabu. 17 Avivyoo, no motomami yunaa aleapelwaa vechele alufu jiwele ja zahabu, nanoyo apataa vechele viinge vewele vya zahabu. 18 Ila motomami oyoo yunaa aleapelwaa kechele alufu yemwii ya zahabu, omwenee apetaa khoseemba ileende ayepuselaa vechele evyoo vya zahabu cha meyaa wakwe.

19 "Ituungo itale panaa lalelakela, meyaa wa vatomami evoo atuwaa, avetaa vatomami vakwe ili vamopalele venaa vatomelaga nsao jakwe. 20 Motomami yunaa aleapelwaa vechele alufu jetaano ja zahabu, ijaa no khomoletela vechele viinge alufu jetaano ja zahabu, akapaala, ‘Meyaa, alewanipeela vechele alufu jetaano ja zahabu, ili njetomamele molemo.’ ‘Seji kunaa, vyongelekhaga vechele viinge alufu jetaano ja zahabu.’ 21 ‘Meyaa wakwe amowelaa, wanogajaa visoga.’ ‘Ogwegwe ole motomami mosoga no yunaa okhogombekha, kho nguno ogwegwe wawaaga okhogombekha kho vento vitiiti, gechoo ndakhonoja owee ole mwimeleli wa nsao nyinki. Wiije khotogwee palomwi.’

22 "Motomami yunaa aleapelwaa vechele alufu jewele ja zahabu, nanoyo ijaa ne vechele viinge alufu jewele ja zahabu, akamoweela, ‘Meyaa, alewanipeela vechele alufu jewele ja zahabu. Seji kunaa, vyongelekhaga vechele viinge alufu jewele ja zahabu.’ 23 ‘Meyaa wakwe amowelaa, wanogajaa visoga.’ ‘Ogwegwe ole motomami mosoga no yunaa okhogombekha, kho nguno ogwegwe wawaaga okhogombekha kho vento vitiiti, gechoo ndakhonoja owee ole mwimeleli wa nsao nyinki. Ijoo khosekelele palomwi.’

24 "Ila motomami yunaa aleapelwaa vechele alufu yemwii vya zahabu, ijaa no khopaala, ‘Meyaa, onene alenemanyile kete ogwegwe ole muntu moleewi modugo. Opwale kete muntu yunaa akhokongola makongola khonaa aleakhavyala, no khokongola khonaa aleokhavyala mbeyo. 25 Alenatungumala khoepwelya nsao yakhoo, napeta khoesembela panse. Gechoo, solaa nsao yakhoo.’

26 "Meyaa wakwe akamoweela, " ‘Ogwegwe ole motomami mobe no mokhata.’ ‘Mbe angaomanyile kete onene nkhokongola makongola khonaa nkhavyala no khokongan’ya khonaa nkhaminja mbeyo yeyensi. 27 Gechoo, angaamba visoga mbe angaotoole vechele vyaane vya zahabu khwa vantu vanaa vakhopumya maongelekho panaa okhotoola mpia jakhoo, ili nsiko ya khotuuwa kwaane, angandavesola vechele vyaane palomwi ne maongelekho. 28 Apenee meyaa wakwe alagelelya vantu vaange ili vamosuke vechele evyoo, vamopele motomami yunaa angile atite vechele alufu ikomi. 29 Kho nguno yunaa atite kento, alapelwa no khongelelwa. Ila muntu yunaa atokhola ninga kento, ninga echoo kenaa atite, alasukhwa. 30 Apenee meyaa wawe akapaala, mosombeli panji motomami mobe. No omoo amwenee monaa vantu valaawa vakhokoota no kholoman’ya mino.’