Mateo 25

Itengemekho nsiko ya odugo

31 "Ituungo la Mwana wa Muntu panaa aliija kho olaala wakwe oko alepalomwi ne vatomami vensi va khochanya khwa Matuunda. Epoo apenee alikhala pachanya pa kegoda chakwe kelaala cha owami. 32 Vantu va nse jensi valakongana paolongolo wakwe, nanoyo alavabegola kho maloondo gawele, kete mosoongi venaa khojebegolaa nkholo ne mboli. 33 Kete venaa mosoongi khojetolaa nkholo kho lwande lwakwe lwa molyelo, ne mboli kho lwande lwakwe lwa mokege. Avivyoo, Mwana wa Muntu nanoyo alavatola vantu vanaa vakhonoja masoga lwande lwakwe lwa molyelo, ne vanoja mabe kho lwande lwakwe lwa mokege.

34 "Apenee Mwami alavawela evoo vanaa vapwale kho lwande lwakwe lwa molyelo, ‘Ijagi onywenywe vanaa Daada yaane avafunyelagaa. Ingelagi kho owami wonaa Matuunda aleavandalela mpuma khowombwaa khwa liwelelo. 35 Kho nguno panaa angile ntite njala, mwanipelile endya, ne panaa nalenitegeela nyoota, mwanipeela meje, ne panaa angile nde mohenja, mwanipokeela kho nyoomba jenyu. 36 Panaa angile ntokhola myenda, mwanipelile myenda, ne panaa angile nde molwile, mwalemwandwalyaa. Ne panaa angile natungagwa mokhandulunge, alemwiija khongendela.’

37 "Gechoo, vantu evoo vanaa angile vakhonoja ganaa gakhogoombwa paolongolo wa Matuunda valambwela, ‘Mwene, nale alekhwakhowona otite njala nasu khwakhopeela endya, ao otite nyoota khwakhopeela meje? 38 Khanke, nale angile ole mohenja, nasu khwakhopokeela kho nyoomba jisu? Ao panaa angile ole otokhola myenda, khwakhopeela myenda? 39 Khanke nale khwakhowonile ole molwile, nasu khwakholwalyaa? Ao otungilwe mokhandulunge, nasu khwiija khokhogendela?’ 40 Nanoyo Mwami alavawela, ‘Nkhovaweela khapanga, kento chechensi kenaa mwamonogelile yeyensi mo vadogo vaane ewa vanaa vado, mwanogelilye onene.’

41 "Apenee Mwami alavawela vantu vanaa vapwale kho lwande lwa mokege, ‘Wokhagi epa, onywenywe vanaa Matuunda avaligitagaa. Petagi kho moto gonaa gokhalimaga nsiko jensi, gonaa gopwale kho nguno ya Khatawe ne vatomami vakwe. 42 Kho nguno panaa angile ntite njala, alemokhanipela endya, ne panaa angile nitegeela nyoota, alemokhanipela meje. 43 Ne panaa angile nde mohenja, alemokhanipokela kho nyoomba jenyu, ne panaa angile ntokhola myenda, alemokhanipela myenda. Panaa angile nde molwile, alemokhiija khondwalyaa, ne panaa angile ntungilwe mokhandulunge, alemokhiija khombona.’

44 "Papene, vantu evoo vanaa vapwale kho mokhono gwaane gwa mokege, valapala, ‘Mwami, nale khwakhowonile otite njala, ao otite nyoota ao angile ole mohenja, ao angile otokhola myenda, ao angile ole molwile, ao angile ole mokhandulunge, nasu khwalekha khokhwalya?’ 45 Nanoyo Mwami alapala, ‘Nkhovaweela khapanga, chechensi kenaa alemwasiita khomonogelya ya wa vantu vaane ewa vanaa vado, mwalemwasiita khonogelya onene.’ 46 Gechoo, vanoja mabe evoo, valapeta mo itengemekho la nsiko jensi patokhola odugo, ila vanaa angile vakhonoja ganaa gakhogombekha paolongolo wa Matuunda, evoo avenee valiingela mo opanga wa nsiko jensi patokhola odugo."