Marcos 11

Ayesu bhajiingila ku Yelusalemu kwa kuhangalala

1 Pabhakibha bhatendakubhandikila ku Yelusalemu, upande gwa chijiji cha ku Betifage na chijiji cha ku Betania, kubhandikila na litombi lya Mizeituni. Ayesu bhakaatumanga bhanapunji bhabhe bhabhele bhaalongolele, 2 bhakaalobholelanga, "Nnyendange mu chijiji chichibhii nnongi jinunji. Pampakujiingilanga monomwe, mpakunkolela mwana liponda atabhitwe, yakubhehe bhangatamilwa na amundu bhoabhala panng’ongo gwabhe. Mung’opolange munnetange pambani. 3 Handa amundu bhoabhala bhankonyitinge, ‘Mboni ntendanga henela?’ Munnobholele, ‘Hangwana bhatendakumpala na bhapakwabhujia pambani muuda nyipinyipi.’"

4 Bahi, bhakajaulanga, bhakaakolela mwana jwa liponda atabhitwe nngulugulu mwa ndela, kubhandikila na nlyango gwa nyuumba, pabhakibha bhatendakwaagopola, 5 bhandu bhangi bhabhakibha bhabhandikile na penapo bhakaakonyanga, "Mwangota ntendanga niki penapo, kwa niki ntendakung’opolanga mwana jwa liponda?"

6 Bhenibhala bhanapunji bha Ayesu bhakajangulanga handa chibhakalobholelwanga na Ayesu, na bhakaalekeleanga bhajaulange. 7 Bhakaapelekela Ayesu jono mwana jwa liponda, bhakatandikanga ngobho yabhenji nnani ja mwana jwa liponda jonojwe na Ayesu bhakatama nnani jakwe. 8 Bhandu bhajingi bhakatandikanga ngobho yabhenji nndela, na bhangi bhakatandikanga nyaambi ya mikongo hibhakaheketanga mmigonda. 9 Bhandu bhabhakalongolelanga Ayesu na kwaakagula kuyetu, bhakakweanga malobhe gabhenji bhabhi kulobholanga, "Alumbalilwe Annoongo! Atendelwe gammbone bhenabho bhabhahika kwa lina lya Hangwana! 10 Annoongo agutendele gammbone ukolo guguhika gwa atati bhitu Adaudi. Alumbalilwe Annoongo bha kunani kulihunde!"

11 Ayesu bhakajiingila ku Yelusalemu na kujaula jimo kwa jimo pa Nyuumba ja Annoongo, bhakalolekea kila chilebhe maha. Nambo kwakubhehe ikabhehe kimuo, bhakabhuja ku Betania na bhanapunji bhabhe bhenibhala komi na bhabhele.