Romanos 10

12 Ngani heje nga kwa bhandu bhoa, kwa kubhee kwaakwa kulengania pakati ja Bhayahudi na bhanga Bhayahudi, jonojwe nga Hangwana bha bhandu bhoa, jwabhii jwammbone kwa bhoa bhabhaajopa, 13 kwa kubhee Majandiko ga Annoongo galobhola, "Kila mundu jwapakwaakema Hangwana kwa kupala kujangatilwa, apakuokolewa."

14 Nambo bhapakwaajopa bholi bhenabho kongo bhabhi ngaahobhalela? Kabhele bhapakombola bholi kwaahobhalela bhenabho bhangannyoanga? Bhapakwaajohanikia bholi panga kutangachiwa na bhandu? 15 Na bhandu bhapakutangacha bholi handa bhangalagilwanga? Handa chigalobhola Majandiko ga Annoongo, "Nga chikubho chammbone muno kuhika kwa bhenibhala bhandu bhabhatangachanga Ngani Jammbone!" 16 Nambo ngabha bhandu bhoa bhabhapokile Ngani Jammbone. Jenje nga maana alondoi Aisaya alobhola, "Hangwana, nga aganiki jwahobhalile ngani jitu?" 17 Henela bahi, kuhobhalela kujemekela kwa kujoanikia Ngani Jammbone, na jene ngani jitenda kubhokana na lilobhe lya Kilisito.