Bhaloma 13

Kwajeketela akanachilongola bha chilambo

1 Kila mundu apalikwa kwajeketelanga akanachilongola bha chilambo, kwa kubhee jwakwa mundu jwakombola kutawala handa Annoongo jwangaaleka atawale, Annoongo jika jabhe nga jwaapekeanga bhandu bhabhatawala machili ga kutawala. 2 Henela jwagakana mamulaka ga akaachilongola atendakana lilagilo lya Annoongo, na bhenaangota bhabhatendanga henela bhapakuhumulwa. 3 Bhatawala ngaatichianga bhandu bhenibhala bhabhatendanga gammbone ila bhabhatenda mabohu. Bholi, mpala nkotokwaajogopa jwabhi na mamulaka? Bahi ntendange genigala gagabhiile gammbone na jonjo apakunnumbalila mwenga, 4 kwa kubhee jonojwe nga antumichi jwa Annoongo jwaapangana mahengo ili kunnyatila mwenga. Nambo handa mpakupangana mabohu, mpalikwa kwaajogopa, kwa kubhee akolite uwecho gwa kunhukumula. Jonojwe nga antumichi jwa Annoongo, jwaalangia lilaka lyabhe kwa bhenibhala bhabhatenda mabohu. 5 Henela hipalikwa kwaajeketelanga bhabhabhilinge na ukolo, ngabha kwa kujogopa lilaka lya Annoongo lilipakuhika, ligongo ntendakumanyanga kubhee chenecho nga chammbone kupangana henela.

6 Kubhokana na genago mwangota ntendakulepanga kodi, kwa kubhee akaachilongola bhenabho bhaatumikila Annoongo pabhatenda lihengo lyabhenji. 7 Mumpekee kila mundu chibhapalikwa kupekewa. Handa ntendakulongwa kodi, nnepange kodi, handa nga uchulu, nnepange uchulu, jwapalikwa kujogopwa, mwaajogope, jwaapalikwa kutopewa, mwaatopee.