Matiyu 25

Aknyi n Abwui

31 "She Əza Nugwnu ɓə ɓe dna ń əwo latu n amaləkai vnyanya n kwnusnu ń woi, wo ɓə sasetu ń əwo əbeshnikpegye latuyi. 32 Abye vnyanya ɓə yezhi ń əwo abye, woi gnaɓaaje ngye shi naknayi tnu aknyi ya n abwui nyi. 33 Wo ɓə zhi aknyi n əwo ɓwaizhe jesnu abwui n əwo ɓwaipmi.

34 "Nlonu Əsu ɓə gna aza yi n ɓa zhi n əwo ɓwaizhe nyi, ‘Fye ɓe, əfye ń əmi Dada wo kwu anabəlika kpe fye nyi; fye gwo əfye əgwú, əbemi n a ɓə zhni aba ga fye n anyì zhni əsa nyi. 35 Ntuge mi ɓə gnyi n myikwnui, fya ga mi nyagyi ma gyi, mi ɓə gnyi n nuwna myikwnui, fya ga mi nuwna ma sni, mi ɓə zhni zhiɓeyi jesnu fyaa mi gwo dna n əfye pwuwa, 36 mi ɓə ye aje fya kwu aje kpe mi, nyasna kwa sna mi jesnu fya kwu mi wnakna, mi ɓə dna ń zhalu, fya kwu ɓe mi gnaɓyi.’

37 "Nlonu aɓəfyeceyi ɓə dna wo ɓəgbe, ‘Dagayi, yi ɓə gye ho n knyiwyii nu ń myikwnui ya ga ho nyagyi, kwo ń nuwna myikwnui ya ga ho nyaho ha sni a? 38 N knyiwyii nu ń, yi ɓə gye ho n zhni zhiɓeyi ya gwo ho, kwo n gnyi ntna ajekpe jesnu ya ga ho ajekpe a? 39 N knyiwyii nu ń yi ɓə gye ho gnyi n nyasnai kwo n dna ń zhalu ya ɓe ho gnaɓyi a?’

40 "Əsu ɓə dnaɓəgbe, ‘Ɓəhnihni mi gna fye, nyahonyahoi n fye ɓə zhni ga əza gnagbai gbmanyi n əmi azaje ye n amapwii, fye ɓə zhni ga əmi nu.’

41 "Nlonu wo ɓə gna aza yi ń ɓa zhi n əwo ɓwaipmi nyi, ‘Fye la kwukala ń əmi aba, əfye aknyituyi, fye lofyi ń əná nyalonyalo nya n a ɓə zhni kwo ntu shetam ɓo n əwo amaləkai nyi. 42 Ntuge fye ɓə gye mi gnyi n myikwnui, to fya ga mi nyaho nge mi gyi m, mi ɓə gnyi n nuwna myikwnui, to fya ga mi nyaho nge mi sni m, 43 mi ɓə zhni zhiɓeyi, to fya gwo mi m, mi ɓə ye aje, to fya kpe mi aje m, mi ɓə dna n nyasnai, jesnu mi ɓə dna ń zhalu to fya ɓe mi gnaɓyi m.’

44 "Əɓa ce ɓa ɓə dnaɓəgbe, ‘Dagayi, n knyiwyii nu ń yi ɓə gye ho n gnyi n myikwnui kwo n nuwna myikwnui kwo n zhni zhiɓeyi kwo n aje əsnai kwo n nyasnai kwo ń dna n zhalu, to ya bma ho zhni ma a?’

45 "Wo ɓə dnaɓəgbe, ‘Ɓəhnihni mi gna fye, ɓəhoɓəhoi ń fye to ɓə zhni ga zaknayi gnagbayi n aza ye m, fye to ɓə zhni kwo ga mi m.’

46 "Nlonu ɓa ɓə kwuka ɓa lo tata nyalonyalo nya, ama aɓəfyeceyi ɓa ɓə lo wyewyeyi nyalonyalo nya."