Mateus 6

To saaɓo m

25 "Ntucenu mi gna fye, fye to wnubwugba tu n əfye awyewyeyi ɓo m, ənya n fye ɓa gyi kwo n fye ɓa sni m; kwo ntu n fye anayi ɓo, ənya n fye ɓa kpe m. Wyewyeyi to du nyagyi lo, jesnu anayi to du aje lo m? 26 Fye shi alú afugyeyi awye; ɓa ta bye, kwo ɓa dò m, kwo ɓa yefyi n adobwi m, dudulonu əfye Dada əshemi nya kpá ɓa. Fye to du ɓa lo n apma m? 27 Nyika nu dnalo n fye n wo ɓa ɓe əwohni wyewyeyi snukna gbmanyi ntu n bwugba wnu ɓo a?

28 "Njesnu knyiyi nu zhni bwugba kwoi wnu fye ntu n ajekpe ɓo a? Fye gye shi amamawyí bmana nya mwa; ɓa ta zhni tnutnu kwo ɓa she lulu m. 29 Dudulonu əmi nu gna fye, kwo Sulemanu dna n əwohni bmyabmya vnyanya, wo to ɓə kpe aje ngye mamawyi ho gbmanyi n ɓa m. 30 Ngye Shekwoyi kpe agbegbe bmana nya aje ń lai nu, n ɓa nyi n naiye, əfye kwa gyi a sheɓaya fyi n əná nyi, wo taa gna əfye nu ajekpekpe m, əfye agaiciyaganunui agbagbaida? 31 Ntucenu fye to lofyi ń bwugbawnu m, fyei gna, ‘Yi ɓa gyi knyiyi nu a?’ kwo ‘Yi ɓa sni knyiyi nu a?’ kwo ‘Yi ɓa kpe knyiyi nu a?’ 32 Ntuge ashnagbayi zna anya ye nu shni vnyanya, ama əfye Dada dna n əshemi kpəlo nge fye n əɓa apmai lo. 33 Ama əɓo kpmisnui, fye zna əwo əbemi nu shni n əwo ɓəfyecezhnii, jesnu anya ye vnyanya a ɓə kwu ɓa ga fye ɓədo cè. 34 Ntucenu fye to saaɓo ntu nsu ɓo m, ntuge nsu ɓə saaɓo ntu n əkwohni ɓo. Nyipyei dəhodəhoi ǹ əkwo aɓoi lo ń kwnukwnuí.