Gênesis 18

23 Paahi Aburahimu nkayaatameria Apwiiya Nlhuku, nkayaakoha, "Chani wo ikekhiaye nnowaalhakalhiha attu oombone vamoka ni attu anopanga cho uhilhoka? 24 Veekinaka ahaawo attu oombone makhumi nthanu vawani vawo. Chani nnoolhakalhiha iwani yonkhaye wo uhihiya wo nlhatu wo attu anopanga moombone makhumi nthanu arii mwommo ayo? 25 Akinaanyihera wiira nnoopanga chiicho! Weeva attu anopanga moombone vamoka ni attu anopanga chittu cho uhilhoka, attu anopanga moombone upangiya thoko chinopangiya aya attu anopanga chittu cho uhilhoka! Mena! O uhukumulha ilhapo khanohiya uhukumulha chittu wo ikekhiaye!"

26 Apwiiya Nlhuku nkayeera, "Kaaphwanyaka attu anopanga moombone makhumi nthanu, Usodoma uwo, paahi kinoohiya iwani yonkhaye wo uhilhakalhiha wo nlhatu waya."

27 Aburahimu nkayeera tho, "Kiholhikacha woolhumana Apwiiya, mii kirii ntukurukhu ni ituraru va. 28 Veekinaka anoopatikana attu anopanga moombone makhumi ncheshe ni nthanu badala ya attu makhumi nthanu. Chani anoolhakalhiha iwani yonkhaye wo uwukuwa attu athanu?"

Apwiiya Nlhuku nkayaakhulha, "Akinolhakalhiha iwani iyo yakhalhaka wowo ahaawo attu anopanga moombone makhumi ncheshe ni nthanu."

29 Aburahimu nkayoncherera ukoha, "Veekinaka anokookhalha attu makhumi ncheshe wowo, nnokowiira chani?"

Apwiiya Nlhuku nkayaakhulha, "Wo nlhatu wa attu makhumi ncheshe ayo, akinopanga chiicho."

30 Aburahimu nkayoncherera tho, "Inyu Pwiiya, kinolhepelha wiira, nhikithunalhelhe, kuulhumache tho. Yakhalhaka ahaawo wowo attu makhumi mararu anopanga moombone, nnokowiira chani?"

Apwiiya Nlhuku nkayaakhulha, "Akinopanga chiicho kaaphwanyaka yayo attu makhumi mararu ayo."

31 Aburahimu nkayeera, "Chonte Pwiiya, nhikithunalhelhe vanothepa aka ukohani. Chani yakhalha anookokhalha attu makhumi melhi?"

Apwiiya Nlhuku nkayaakhulha, "Wo nlhatu no yayo attu makhumi melhi ayo, akinolhakalhiha iwani iyo."

32 Wo umalhihera, Aburahimu nkayeera, "Inyu Pwiiya, kinoulhepelhani nhikithunanelhe, nansho kuulhumache tho nkwaha mmoka. Chani akhalhaka ahaawo attu khumi, inowa ukhalha chani vavawo?"

Apwiiya Nlhuku nkayaakhulha, "Wo nlhatu wo yayo attu khumi ayo, akinolhakalhiha yeyo iwani iyo." 33 Apwiiya Nlhuku vaamalhinhe aya woolhumana Aburahimu, ahorwaa, Aburahimu nkayaahokolhia uwannyaya.