2 Urúeigu 4

Eliséu tuma würi Sunemüna

8 Luagu aban weyu dan lásügürün Eliséu Sunemügiñe, aba téredun aban würi wéirigutu aganóutu ñein luagu lun leigin hama. Ságüti lásügürün Eliséu ñéingiñe, lerederagun eiga. 9 Ábati tariñagun lun túmari:

—Arihabá san, subudi numuti luagu gürigia lan le ságübei lásügürün lachülaagun wámagiñe, aban lan profeta lani Bungiu. 10 Wadüga aban rumu lun íñugiñe tibiti muna. Ábame wíchugun aban gabana luba ñein, aban dábula, aban sesi luma aban lanpu. Dánmeti liabin bisidawa, gayaraabei lerederun ñein.

11 Luagu aban weyu dan lachülürün lun larumugun tidan rumu tuguya, 12 aba lariñagun lun Geasí le lubúein:

—Waba tun Sunemüna to nun.

Aba lagúarun tun, dan tarufudagun tungua ligibugiñe Eliséu, aba lariñagun Eliséu lun lubúein:

13 —Ariñagabá tun gürigia to luagu buidu lan tigaburi wama, anhein lan anihein lubéi tabusenrun wadügün tun; anhein lan busén tubei wadimurehan lun urúei luagu tufulesein o luma lan hábuti súdaragu.

Tariñaga houn:

—Buiti dan nun ya hadan lílana fulasu.

14 Lariñaga Eliséu:

—Kábati gayara wadügün tun?

Lariñaga Geasí:

—Tuguya marahüñütu ani wéiyaali túmari.

15 Lariñaga Eliséu lun:

—Waba tun.

Aba lidin lubúein agúara tun, gama lumoun tuguya aba terederun rara bénabu. 16 Ábati lariñagun Eliséu tun:

—Leweñegua irumu, keime lidoun dan le, babayayahaba aban irahü le bisaani.

Tariñaga lun:

—Uá nabureme, meyeedalana aban lubúein Bungiu.

17 Irumubei lárigiñe lídounmeme burí dan ligía, aba tadageinadun aba tagaraüdün aban wügüri irahü ítara kei lariñaguni Eliséu tun. 18 Aba laweiridun irahü ligía. Gama lumoun luagu aban weyu dan lidin lárigi lúguchi le ñein habéi alubahatiña, 19 aba lagumeserun agúaraha:

—Gáriti nichügü! Gáriti nichügü!

Ábati lariñagun lúguchi lun aban lubúein:

—Barübei tun lúguchu.

20 Aba lanügüni lubúein tun lúguchu, aba tañuuragüdüni tuougua darí amidirugu. Ábati lounwen irahü ligía. 21 Aba tawarirun lau lirumunrugun profeta, aba tarounragüdüni tidan ligabanan, aba táfuridun, aba tadouruni bena. 22 Aba tagúarun lun túmari tariñaga lun:

—Óunahaba aban musu nun tau aban mile ñüdün náamuga arihei profeta, ábayame niabin.

23 Lariñaga túmari tun:

—Kábagia uagu bidin arihei uguñe? Mama iseri hati uguñe, mama giñe luéyuri emeraaguni.

Tariñaga lun:

—Madiheribá.

24 Aba taranseragüdünu mile, tariñaga lun musu:

—Beiba nubá, merederaguagüdabana darí nariñaguni bun.

25 Aba lubeiti tidin, aba tachülürün luagun wübü Karümélu, le ñein lubéi Eliséu. Dan larihinbarun Eliséu dísegiñe, aba lariñagun lun Geasí le lumusun:

—Anutén Sunemüna. 26 Éibaaguaba tubaroun, ábame bálügüdünu ida tiña lan lau sun túmari luma tiráü.

Aba lidin musu, aba tariñagun lun luagu magadiñe hamá. 27 Dan tachülürün le ñein lubéi Eliséu, aba tóuburuni lugudi. Aba yebe lidin Geasí agidaroun ñéingiñe, gama lumoun lariñaga Eliséu lun:

—Ígiraboun, gagarigutu, ani marufudun lágili Bungiu nun ka lan asuseredubei.

28 Ábati tariñagun lun:

—Eliséu nabureme amuriahatina funagia buma lun nagaraüdün? Ma ariñagatina bun lun meyeedunbanina?

29 Ábati lariñagun Eliséu lun Geasí:

—Aransebá, barübei nubadun, beiba ñein. Le úmati badunragua, mabusurabá lun, le abusuruti bun, móunababei. Bachülürünme ábame badagaragüdüni nubadun luagu ligibu irahü.

30 Tariñaga lúguchu irahü lun Eliséu:

—Fiñutina luagu Bungiu luma buagu guánarügü, luagu mídinbadina lan yáagiñe ánhabu midin numa.

Ábati lidin Eliséu tuma. 31 Ñǘdünhati buga Geasí habá, aba ladagaragüdüni badun luagu ligibu irahü, gama lumoun úati ni murusun ibagari lidan; ábati lidin Geasí lubaroun Eliséu, aba lariñagun lun:

—Máguyugunti irahü.

32 Dan lebelurunbei Eliséu, hilaali irahü, riwagu liña tidan gabana. 33 Ábati lebelurun, aba ladouruni bena, aba lafurieidun lun Bungiu. Ligíarügüñein múnada luma irahü. 34 Aba lawarirun gabanarugun, aba larounrun ligibuagu irahü, aba líchuguni liyuma luagu liyuma, lagu luagu lagu, lúhabu luagu lúhabu aba labadüleragüdüni lúgubu luagu lúgubu. Aba lagumeserun lúgubu irahü abacharagua. 35 Ábati lásaarun Eliséu aba léibuguni lurageirugu rumu; ábaya lawarirun gabanarugun, ábaya labadüleragüdüni lúgubu luagu irahü. Sódini aba látiñuhan irahü sedü wéiyaasu, aba léfegechuni lagu. 36 Aba lagúarun Eliséu lun Geasí, lariñaga lun:

—Waba tun Sunemüna.

Aba lagúarun Geasí tun, dan tachülürün le ñeinhin lubéi Eliséu, lariñaga tun:

—Anihán biráü.

37 Aba tiabin, aba táguragun tungua luagun lugudi Eliséu, lárigiñe aba tanügüni tiráü aba táfuridun lau rúmurugugiñe.