Banzembo 96

Mokili mobimba esanzolaka Yawe, Mokonzi na yango

1 Boyembela Yawe nzembo ya sika !

Bino nyonso, bato ya mokili mobimba,

boyembela Yawe !

2 Boyembela Yawe,

bopambola Kombo na Ye !

Bopanza sango ya lobiko na Ye,

mokolo na mokolo !

3 Bopanza sango ya nkembo na Ye kati na mabota !

Boyebisa bato misala na Ye ya kokamwa

kati na bikolo nyonso.

4 Pamba te Yawe azali monene

mpe abongi na lokumu,

azali somo makasi mpe aleki banzambe nyonso.

5 Banzambe nyonso ya bikolo ezali bikeko ya pamba,

nzokande Yawe akela likolo.

6 Kongenga mpe nkembo monene ezali liboso na Ye,

nguya mpe nkembo ezali

kati na Esika na Ye ya bule.

7 Bino bituka ya mabota, bosanzola Yawe ;

bosanzola Yawe na kopanza

sango ya nkembo mpe nguya na Ye !

8 Bosanzola Yawe mpe bopesa

Kombo na Ye nkembo !

Bomema makabo na bino,

bokota na lopango na Ye !

9 Bogumbama liboso ya Yawe

oyo bosantu na Ye ezali kongenga makasi !

Bino bavandi ya mokili mobimba,

bolenga liboso na Ye !