31 Yisu abweleele: «Ŋa Mwana a Muutu huuya hutso muyusu a nde na bapofi boosi, nde sa atsahala ŋa kiti a nde yi ipfumu yi muyusu. 32 Baatu boosi ba ŋa toto sa bakuukama ŋa busu bwa nde. Nde sa atahula baatu ŋa hati la bo, we bu mukeelisi biboodi ubaatahula mandombo na bataba. 33 Nde sa asuusa mandombo hu mbahala a nde, na bataba hu kaasu a nde.

34 Buuna mutumi sa aleele huli ba buuba hu mbahala a nde: "Yaani, benu ba Taata a me haasyeme. Byalilaani mukobe wu Ipfumu hi mayulu hi baamiivangimasa mu benu umata pangili a tsi. 35 Mu tooni ati, me ambeedi na nzala, na benu laaviidi me byudya. Me ambeedi na peyu a mamba, na benu laaviidi me mamba ma unywa. Me ambeedi mwenyi, na benu laayaki me. 36 Me ambeedi pene, na benu laalwatisi me. Me ambeedi na ubeele, na benu laataasili me. Me ambeedi mutso a kondaayi, na benu laayamono me."

37 Ni mu buuna, baatu ba baasiidi litondo la Nzambi sa bafutala nde: "Pfumu, ki taangu bisu laamoni we na nzala, na laaviidi we byudya; buuve we aba na peyu a mamba, na laaviidi we mamba ma unywa? 38 Ki taangu bisu laamoni we mwenyi, na laayaki we huli bisu; buuve we aba pene, na bisu laalwatisi we bikutu? 39 Ki taangu bisu laamoni we mubeedu, buuve mu kondaayi, na bisu laataasili we?"

40 Na Mutumi sa afutala bo: "Mu mbuli me ndi mu undeele benu, pasi taangu yi benu laasiidi buuna, huli mumosi mu baana ba ngu a me wu afulala bukenyi, ni huli me benu laasiidi buuna."

41 Titswene, nde sa aleele huli ba buuba hu kaasu a nde: "Matilaani me, benu ba Nzambi haamiisinga! Yenaani hu mbaahu yi bilima na bilima yi baamiivangimasa mu Mukuyi na bapofi ba nde! 42 Mu tooni ati, me ambeedi na nzala, na benu a laaviidi me byudya ve. Me ambeedi na peyu a mamba, na benu a laaviidi me mamba ma unywa ve. 43 Me ambeedi mwenyi, na benu a laayaki me ve. Me ambeedi pene, na benu a laalwatisi me ve. Me ambeedi mubeedu na mu kondaayi, na benu a laataasili me ve." 44 Buuna, bo sa bafutala nde: "Pfumu, ki taangu bisu laamoni we na nzala, buuve na peyu a mamba, mwenyi, buuve pene, buuve na bubeedu, buuve mu kondaayi, na bisu a laakumbisi we ve?" 45 Na nde sa afutala huli bo: "Mu mbuli me ndi mu undeele benu, pasi taangu yi benu laavelisa buuna huli mumosi mu baana ba ngu a me wu afulala bukenyi, ni huli me benu laavelisa buuna." 46 Ni buuna, bo sa bayene hu tsyembili yi bilima na bilima. Ka baatu ba baasungama, sa bayene hu moonyi wu bilima na bilima✝.»