Gênesis 18

23 Nipele che Ibulahimu ŵaaŵandichile Ambuje ni kwausya, "Uli, chimwaulaje ŵandu ŵangaleŵa pamo ni ŵandu ŵaleŵile? 24 Iŵaga mmusi mo mwana ŵandu ŵangaleŵa hansini. Uli chimuujonanje wele musi wose pane kuuleka kwaligongo lya ŵandu ŵangaleŵa hansini ŵaali mwelemo? 25 Nganguganisya kuti chintende yele, kwaulaga ŵandu ŵangaleŵa pamo ni ŵandu ŵaleŵile, ni kwatenda ŵandu ŵangaleŵa mpela ŵandu ŵaleŵile. Ngaikomboleka! Jwakuchilamula chilambo chose akusachilwa alamule yaluumo!"

26 Ambuje ŵajanjile, "Naasimanaga ŵandu ŵangaleŵa hansini mu Sodoma, kwaligongo lya ŵele ŵandu wo chinauleche musi wose."

27 Che Ibulahimu ŵaŵechete sooni, "Sambano nganinyogopa kukunguluka ni alakwe Ambuje, une jundi luundu ni liu pe. 28 Iŵaga kwana ŵandu ŵangaleŵa alobaini na tano. Uli chimuujonanje musi wose ligongo apungwiche ŵandu nsano wo?"

Ambuje ŵajanjile, "Ngasinaujonanga musi wo iŵaga kwana ŵandu ŵangaleŵa alobaini ni tano."

29 Che Ibulahimu ŵaŵechete sooni, "Uli iŵaga kwana ŵandu alobaini?"

Ambuje ŵajanjile, "Kwaligongo lya ŵele ŵandu ŵangaleŵa alobaini ngasinaujonanga."

30 Nipele che Ibulahimu ŵatite, "Alakwe Ambuje choonde ngasimundumbilila, ngusaka mechete sooni. Uli iŵaga kwana ŵandu selasini?"

Ambuje ŵajanjile, "Ngasinaujonanga musi wo iŵaga chinaasimane ŵandu selasini."

31 Che Ibulahimu ŵatite, "Choonde muunechelesye pakuŵa nganinyogopa kukunguluka ni alakwe Ambuje. Uli iŵaga kwana ŵandu ishilini?"

Ambuje ŵajanjile, "Ngasinaujonanga musi wo kwaligongo lya ŵele ŵandu ishilini."

32 Che Ibulahimu ŵatite, "Ambuje choonde ngasimuundumbilila, muuneche mechete sooni kamope. Uli, iŵaga kwana ŵandu kumi ŵangaleŵa?"

Ambuje ŵajanjile, "Ngasinaujonanga musi wo kwaligongo lya ŵele ŵandu kumi." 33 Ambuje paŵamasile kukunguluka ni che Ibulahimu, ŵajawile, nombe che Ibulahimu ŵausile kumangwao.