1 तेबे हन्ने ये बोलदे ऊए प्रार्थना कित्ती,

यहोवे मेरा मन खुशिया ते परीता रा ए,

जो कुछ तिने मेरिया तँईं कित्तेया आऊँ तिजी ते बऊत खुश ई,

आऊँ आपणे दुश्मणा पाँदे आसुंई,

कऊँकि आऊँ तेरे एस कित्ते रे उद्धारो ते खुश ए।

2 यहोवे जेड़ा कोई पवित्र नि ए,

कऊँकि ताखे छाडी की ओर कोई परमेशर ई नि ए

ओर म्हारे यहोवे जेड़ी कोई चट्टान नि ए।

3 फूली की कमण्डो रिया ओर गल्ला नि करो

ओर अन्देरो रिया गल्ला तुसा रे मुंए ते नि निकल़ो,

कऊँकि यहोवा सर्वज्ञानी ईश्वर ए ओर कामो रे मुताबिक न्याय करने वाल़ा ए।

4 ओ यहोवा, तूँ शूरवीरा रे अथियार तोड़ी देया,

ओर जो कमजोर ऊणे रिया बजा ते ठोकर खाओए तिना खे तागत देया।

5 जो पेट परी की खाओ थे तिना खे रोटिया रिया तँईं त्याड़ी लगाणी पड़ी,

जो पूखे थे सेयो फेर पूखे नि रये।

जो बांझ थी, तेसा रे सात बाल़क ऊए

ओर कईया बाल़का री माये कल्ली ई रईगी कऊँकि सेयो सब मरीगे।

6 यहोवा लोका खे मरने बी देओआ ओर जिऊँदा बी करोआ,

से ई अधलोको दे उतारोआ ओर तेथा ते निकयाल़ोआ बी आ।

7 यहोवा गरीब ओर अमीर दूई खे बणाओआ,

सेई निठा करोआ ओर ऊच्चा बी करोआ।

8 से कंगाल़ा खे तूड़ा ते चकोआ

ओर गरीबा खे कूड़ेया रे टेरो ते निकयाल़ी की खड़ा करोआ,

ताकि तिना खे अमीरा ओर परदाना साथे बठयाल़ो

ओर महिमा रे सिंहासनो रा अक्कदार बणाओआ,

कऊँकि तरतिया रे खम्बे यहोवे रे ए

ओर तिने तिना पाँदे संसार टकाई राखेया।

9 तेस आपणे विश्वासो जोगे लोक सम्बाल़ने,

पर दुष्ट न्हेरे दे चुपचाप पड़ेया दा रणा,

कऊँकि कोई माणूं आपणी तागती रिया बजा ते नि जीती सकदा।

10 यहोवे आपणे दुश्मण नाश करने;

जेबे से तिना रे खलाफ सर्गो ते गरजणा।

यहोवे सारी तरतिया रा न्याय करना

ओर आपणे राजेया खे तागत देणी

ओर आपणे अभिषिक्तो रा आदर करना।

11 तेबे एल्काना ओर तेसरा सारा परिवार रामा शईरो खे आपणे कअरे चली गा ओर से बच्चा सेमुएल एली पुरोईतो रिया अगुवाईया दे शीलो दे यहोवे री सेवा-टईल करने लगेया।

12 एलीए रे दोनो पाऊ तो नीच थे, ओर सेयो यहोवे री इज्जत नि करो थे। 13 पुरोईत शीलो जगा दे आऊणे वाल़े लोका साथे एड़ा करो थे कि जेबे कोई माणूं मेलबलि चढ़ाओ था, तेबे पुरोईता रा सेवक मास पकाणे रे बखते एक त्रिशूली कांडा आथो दे ल्याई की 14 तिजी खे मास पकाणे वाल़ी कड़ाई, आँडी, आँडे या तसले रे पीतरे पाओ था ओर जितणा मास कांडे दे लगी जाओ था तिथणा पुरोईत आपू लई लो था। सेयो शीलो दे सारे इस्राएली लोका साथे एड़ा ई करो थे, जो तेती बलिदान चढ़ाणे आओ थे। 15 चर्बी फूकणे ते पईले बी पुरोईतो रा सेवक आई की मेलबलि चढ़ाणे वाल़े खे बोलो था, "पुरोईतो खे पूजणे खे मास दे, तेस तांते पक्केया रा नि, काच्चा मास लणा।" 16 पर जेबे कोई तेसखे ज्वाब देयो था, "चर्बी पईले फूकणे दे, तेबे जितणा तेरा जियू बोलो तिथणा लई लया।" तेबे से सेवक बोलो था, "ना, यबु दे, नयी तो मां जबरदस्ती छुड़ाई लणी।*" 17 इजी री खातर होप्नी ओर पीनहासो रा पाप यहोवे री नजरा दे बऊत जादा ऊईगा, कऊँकि सेयो माणूं यहोवे री पेंटा री बेज्जती करो थे।

18 पर सेमुएल जो एबुए तक बाल़क ई था, तेबे बी से पुरोईतो जेड़ा रेशमो रा चोगा पईनी की यहोवे री सेवा करेया करो था। 19 सेमुएलो री माये हर साल जेबे आपणे लाड़े साथे मेलबलि चढ़ाणे आओ थी, तेबे तेसखे एक छोटा जा चोगा बणाई की तेसगे लई की आओ थी। 20 एली पुरोईते एल्काना ओर तेसरी लाड़ी हन्ना खे आशीर्वाद देई की बोलेया, "यहोवा एस अर्पण कित्ते रे बाल़को रे बदले, जो तैं यहोवे खे अर्पण करी राखेया, ताखे एसा लाड़िया ते ओर बी ल्वाद देयो।" तेबे सेयो आपणे कअरो खे चली गे। 21 तेबे यहोवे हन्ना री सम्बाल़ लई ओर से गर्भवती ऊई ओर तेसा रे तीन पाऊ ओर दो बेटिया पैदा ऊए ओर सेमुएल बाल़क यहोवे साथे रंदा ऊआ बढ़दा गया।

22 एबे एली पुरोईत बऊत स्याणा ऊईगा था ओर तिने सुणेया कि मेरे दोनो पाऊ सारे इस्राएलो रे लोका साथे केड़ा-केड़ा बुरा बर्ताओ करोए, बल्कि मिलणे वाल़े तम्बूए रे द्वारो पाँदे सेवा करने वाल़िया जवाणसा साथे बी कुकर्म करोए। 23 तेबे एलीए आपणे पाऊआ खे बोलेया, "तुसे एड़े गन्दे काम कऊँ करोए? आऊँ तो इना सबी लोका ते तुसा रे बुरे कामा रिया गल्ला सुणेया करूँआ। 24 ओ मेरे पाऊओ, एड़ा नि करो, कऊँकि जो गल्ला माखे सुणने रे आओईया, से ठीक नि ए, तुसे तो यहोवे रिया प्रजा ते पाप कराओए। 25 जे एक माणूं दूजे माणूंए रा अपराध करो, तेबे तो ऊई सकोआ कि यहोवा तेसखे माफ बी करी देयो,* पर जे कोई माणूं यहोवे रे खलाफ पाप करो, तो कोई बी तेसखे बचाई नि सकदा।" तेबे बी तिने आपणे बाओ री गल्ल नि मानी, कऊँकि यहोवे तिना खे नाश करने रा फैंसला करी ला था। 26 पर सेमुएल बाल़क बढ़दा गया ओर यहोवा ओर माणूं दोनो तेसते खुश रओ थे।

27 तेबे यहोवे रा एक नबी एली पुरोईतो गे जाई की तेसखे बोलणे लगेया, "जेबे इस्राएली लोक मिस्र देशो दे फिरौनो रे कराने गे गुलाम थे तेबे मैं आपणे आपू खे तुसा रे बुजुर्ग हारूणो पाँदे प्रकट कित्तेया। 28 मैं हारूण ओर तेसरा वंश इस्राएलो रे सारे गोत्रा बीचे इजी खे चूणी ला था कि से मेरा पुरोईत ऊई की मेरी बेदिया पाँदे बलि चढ़ाओ, तूप बाल़ो ओर मां सामणे रेशमो रा चोगा पईनेया करो। मैं तेरे मूल़ मर्द हारूणो रे कराने खे इस्राएली लोका रे बलिदाना बीचा ते कुछ इस्सा राखणे रा अक्क तिना खे देईता था। 29 तो तेबे मेरे मेलबलि ओर नज्जो री बलि जिना खे मैं आपणे मन्दरो दे चढ़ाणे री आज्ञा दित्ती थी, तिना खे तुसे लोक आपणे पैरा निठे केसोए। ओर तूँ मां ते जादा आपणे पाऊआ रा आदर करेया, ताकि तुसे लोक मेरी इस्राएली प्रजा री अच्छी-अच्छी पेंट खाई-खाई की मोटे ऊई जाओ। 30 इजी री खातर इस्राएलो रे परमेशर यहोवे री ये बाणी ए कि मैं बोलेया तो था कि तेरे मूल़ मर्द हारूणो रा कराना मेरी सेवा करदा रणा, पर एबे यहोवे री बाणी ये ए कि ये एबे नि ऊणा, कऊँकि जेस मेरा आदर करना, मां तेसरा आदर करना ओर जो माखे नकम्मा जाणो सेयो मां नकम्मे समजणे। 31 सुण, सेयो दिन आऊणे वाल़े कि जेबे मां तेरे कराने रा कमण्ड एड़ा तोड़ना ओर तेरे जवान एड़े नाश करने कि तिना बीचा ते कोई बी स्याणा नि ऊई सकणा। 32 आऊँ इस्राएलो रे कराने रा कितणा ई खरा कऊँ नि करुँ, तेबे बी ताखे मेरी रणे री जगा रा दु:ख दिशणा ओर तेरे कराने रे सारे लोक जवानिया देई मरी जाणे। 33 मां तेरे कुलो बीचा ते कुछ माणूं आपणी बेदिया री सेवा करने खे जिऊँदे राखणे, पर तेबे बी तिना रिया आखी रोंदे-रोंदे तुँदल़िया ऊई जाणिया ओर तेरे कअरो रे बाकि सारे जवान मर्द आपणी पूरी जवानिया देई मरी जाणे।* 34 मेरी एसा गल्ला री नशाणी से मुसीबत ऊणी जो होप्नी ओर पीनहास नाओं रे तेरे दुँईं पाऊआ पाँदे पड़नी, मतलब सेयो दोनो एक ई दिने मरी जाणे। 35 मां आपू खे एक परोसे वाल़ा पुरोईत ठराणा, तेस पुरोईतो मेरी गल्ल मानेया करनी ओर जो आऊँ चाऊँआ तेस से करेया करना। मां एस पुरोईतो रा परिवार बढ़ाणा। से हमेशा मेरे अभिषिक्त राजे रे सामणे सेवा करदा रणा। 36 तेबे एड़ा ऊणा कि जो कोई तेरे कराने दे जिऊँदा बचेया दा रणा तेस चूणे दे पुरोईतो गे जाई की एक छोटे जे चाँदिए रे टुकड़े खे या रोटिया रे एकी टुकड़े खे माथा टेकी की बोलणा, पुरोईतो रे केसी कामो दे माखे लगा, जेते कि माखे रोटिया रा एक टुकड़ा मिलो।"