2 राजा 1

राजा अहज्याह री मौत

1 अहाब राजे रे मरने ते बाद मोआब देश इस्राएलो रे खलाफ ऊई की आजाद ऊईगा। 2 एक दिन अहज्याह नवां राजा जो अहाबो ते बाद इस्राएलो पाँदे राज करो था से सामरिया शईरो दे आपणे कअरो रिया दवारिया ते रूड़ेया ओर बऊत काईल ऊईगा। तेबे तिने ये बोली की कुछ दूत पेजे, "तुसे जाई की एक्रोन शईरो दे बालजबूब नाओं रे देवते ते ये पूछी की आओ कि क्या आऊँ इना काओ ते ठीक ऊई जाणा?" 3 पर यहोवे रे दूते तिशबी शईरो रे भविष्यबक्ता एलिय्याह खे बोलेया, "उठी की सामरिया रे राजे रे दूता ते मिलणे खे जा ओर तिना खे बोल, क्या इस्राएलो दे कोई परमेशर नि ए जो तुसे एक्रोन शईरो रे बालजबूब देवते ते पूछणे खे चली रे? 4 इजी री खातर राजा अहज्याह खे बोलो कि यहोवा ताखे ईंयाँ बोलोआ कि जो काओ तांदे ऊई रे तिना ते तूँ कदी बी ठीक नि ऊणा ओर मरी जाणा।" यहोवे रे बोलणे रे जेड़ा एलिय्याहे तिना खे बोलेया। 5 जेबे राजा अहज्याह रे दूत तेसगे वापस आए, तेबे तिने तिना ते पूछेया, "तुसे इतणी जल्दी वापस कऊँ आईगे?" 6 तिने तेसखे बोलेया, "जेबे आसे एक्रोनो रिया तरफा खे जाणे लगी रे थे तेबे एक माणूं आसा साथे मिलणे खे आया ओर तिने बोलेया कि जिने राजे तुसे पेजी राखे तेसगे वापस ऊई की बोलो कि क्या इस्राएलो रे कोई परमेशर नि ए जो तूँ एक्रोन शईरो रे बालजबूब देवते गे पूछणे खे पेजणे लगी रा? इजी बजा ते तूँ कदी बी एते बमारिया ते ठीक नि ऊणा, पर मरी जाणा।" 7 राजा अहज्याहे तिना ते पूछेया, "जो माणूं तुसा ते मिलणे खे आया ओर तुसा साथे यो सारिया गल्ला कित्तिया, तेसरा रंग-रूप केड़ा था?" 8 तिने तेसखे ज्वाब दित्तेया, "ओ मेरे मालक, तेस माणूंए रे शरीरो दे बाल़ थे ओर तिने आपणे लको दे चामड़े रा पटका बानी राखेया था।" तेबे राजे बोलेया, "से तिशबी एलिय्याह ऊणा।"

9 तेबे तिने सेना रा परदान तेसरे पंजा सिपाईया साथे तेसगे पेजेया कि से एलिय्याह खे टोल़ी की ल्याओ। परदाने तेसगे जाई की क्या देखेया कि से पाह्ड़ो री चूँडिया पाँदे बैठी रा। तिने तेसखे बोलेया, "ओ परमेशरो रे पग्त राजे बोली राखेया कि तूँ आसा साथे उतरी की थाले आओ।" 10 एलिय्याहे तेस परदानो खे बोलेया, "जे आऊँ परमेशरो रा पग्त ए तो स्वर्गो ते आग आई की ताखे तेरे पंजा सिपाईया समेत फूकी देयो।" तेबे तेस ई बखते स्वर्गो ते आग आई ओर से तेसरे पंजा सिपाईया समेत फूकीगा।

11 तेबे राजे दूजी बार फेर तेसगे एक परदान तेसरे पंजा सिपाईया समेत पेजेया। परदाने एलिय्याह गे जाईकी बोलेया, "ओ परमेशरो रे पग्त राजे ताखे बोली राखेया कि फटाफट उतरी की आसा साथे थाले आओ।" 12 एलिय्याहे तिना खे ज्वाब दित्तेया, "जे आऊँ परमेशरो रा पग्त ए तो स्वर्गो ते आग आई की ताखे तेरे पंजा सिपाईया समेत फूकी देयो।" तेबे स्वर्गो ते परमेशरो री आग आई ओर से तेसरे पंजा सिपाईया समेत फूकीगा।

13 तेबे राजे तीजी बार एक ओर परदान पंजा सिपाईया खे लई की पेजेया ओर से परदान ऊबे चढ़ी की, एलिय्याह सामणे जानूआ रे पारे पड़ेया ओर गिड़गिड़ाई की तेसखे बोलणे लगेया, "ओ परमेशरो रे पग्त मेरे प्राण ओर इना पंजा दासा रे प्राण तेरी नजरा दे कीमती ठईरो। 14 पंजा-पंजा सिपाईया रे जो दो परदान आपणे-आपणे पंजा सिपाईया समेत जो पईले आए थे, सेयो तो आगी सर्गो ते आई की फूकी ते, पर एबे मेरे प्राण तेरी नजरा दे कीमती ठईरो।" 15 तेबे यहोवे रे दूते एलिय्याह खे बोलेया, "तेस साथे थाले जा, तेसते नि डर।" तेबे एलिय्याह उठी की तेस साथे राजे गे थाले गया 16 ओर तेसखे बोलेया, "यहोवा ईंयाँ बोलोआ कि तैं तो एक्रोनो रे बालजबूब देवते गे पूछणे खे दूत पेजे थे, तो क्या इस्राएलो दे कोई परमेशर नि ए कि जेसते तूँ पूछी सके? इजी बजा ते तूँ जेते माँजे पाँदे पड़ी रा, तेते पाँदा ते कदी नि उठणा, पर मरी जाणा।"

17 यहोवे रे एस वचनो रे मुताबिक जो एलिय्याहे बोलेया था, से मरी गा। अहज्याह रे कोई पाऊ नि था। इजी बजा ते तेसरिया जगा पाँदे तेसरा पाई योराम राज करने लगेया। से यहूदा प्रदेशो रे राजा यहोरामो रे राजो रे बखतो रे दूजे साले राज करने लगेया। योराम यहोशापातो रा पाऊ था। 18 अहज्याह रे ओर काम जो तिने कित्ते सेयो इस्राएलो रे राजेया रे इतिआसो री कताबा दे लिखे राखे।