1 A Nãaŋmɩn tʋ̃tʋ̃nɔ Mosesɩ kũu puor, Nãaŋmɩn 'yɛr kʋ Josʋwa na ɩ a Nun bidaba na ɩ a Mosesɩ sʋ̃sʋ̃nɔ ɩka, 2 <<A n tʋ̃tʋ̃nɔ Mosesɩ kpi naa. A lɛ jũu, fʋ̃ʋ nɩ a Isɩral nɩbɛ banyãna ba jaa yɩ chɔɔr na yɩ gɔ̃ɔ a Jɔɔdan Man chen a wɛr 'lɔ N na kʋrɔ yɩ pɔ. 3 <N na kʋ yɩ naa jie jaa a yɩ gbɛr na wa nɛb nɩtãa a lɛ N na pol kʋ a Mosesɩ. 4 A yɩ tɔraa na yin a dãlpʋɔ pɔ tɩ ta be a Lɛbanↄn, nɩ an yi a man kpɛ̃ɛ na ɩ a Yufɩratɩ nɩ a Heeti nɩbɛ paal wʋ jaa tɩ tan a Mɛditɛrɛniya mandal pɔ, a mɔ̃tɔ̃ɔ mʋrfʋ jie.> 5 Josʋwa, nɩrɛ jaa kʋ tʋ̃ɔ jɛb tʋ̃ɔ fʋ a fʋ nyɛvʋr pɔ ɛ. N na be naa a fʋ sɛ̃ nɩtãa a lɛ N na dɔ̃ɔ be a Mosesɩ sɛ̃. N na ma be naa a fʋ sɛ̃ sɔ̃ɔ jaa, N kʋ̃ barfʋ ɛ.

6 <<Ara kpɛ̃ɔ na fʋ nyɔɔ nyãa, bojũu fʋ̃ʋ lɛ na de a nɩbɛ banyãna nie ka yɩ tɩ de a wɛr N na dɔ̃ɔ pol kʋ a ba sãakpãmine. 7 Ara kpɛ̃ɔ na fʋ nyɔɔ nyãa, na fʋ sɔɔ tu a yelbinsɩ ala a jaa a N tʋ̃tʋ̃nɔ Mosesɩ na kʋ fʋ. Taa wa bara a yelbinsɩ ɩ̃sʋɔ jaa ɛ, a lɛ na vɛ̃ naa ka fʋ jɛb tʋ̃ɔ. 8 Ma kara a yelbinaa gan sɔ̃ɔ jaa, na fʋ ma tɩɛrɛ yaa mɔ̃tɔ̃ɔ nɩ tɩ̃sɔɔ, na fʋ ma mɔ̃ ɩka fʋ tu a ala jaa ban sɛb a wʋ pɔ. A lɛ na vɛ̃ naa ka fʋ nyɛ̃ bɩɛlfʋ na fʋ jɛb tʋ̃ɔ bon jaa fʋn maala pɔ. 9 Tɩɛr a lɛ N na 'yɛr kʋ fʋ ɩka fʋ ara kpɛ̃ɔ, na fʋ nyɔɔ nyãa, na fʋ ta joro dãbɩ̃ɛ bɩɩ ka a fʋ ɩ̃gan chʋɔr ɛ, bojũu a maa na ɩ a fʋ Ŋmɩn 'lɔ na ɩ a Nãaŋmɩn ben a fʋ sɛ̃ jie jaa fʋn na wa chen.>>

10 Ka a Josʋwa 'yɛr kʋ a wʋ nidierbe, 11 ka ba chen a ba jaa-jie tɩ 'yɛr kʋ a nɩbɛ ɩka, <<Yɩ chɔɔr bʋ̃diir bin, bojũu a ber ata daar, yɩ chiini naa na tɩ gɔ̃ɔ a Jɔɔdan man tɩ kpɩɛrɛ a jie 'lɔ a yɩ Ŋmɩn 'lɔ na ɩ a Nãaŋmɩn na kʋrɔ yɩ.>>

12 Be lɛ ka a Josʋwa 'yɛr kʋ a Wuruben bʋrɔ nɩ a Gaadɩ bʋrɔ nɩ a Manaasɩ bʋrɔ bamine ɩka, 13 <<Yɩ tɩɛr a lɛ a Nãaŋmɩn tʋ̃tʋ̃nɔ Mosesɩ na 'yɛr kʋ yɩ, <A yɩ Ŋmɩn 'lɔ na ɩ a Nãaŋmɩn na kʋ yɩ naa a wɛr 'lɔ na be Jɔɔdan mɔ̃tɔ̃ɔ purfʋ jie, be lɛ na ɩ a yɩ jaa-jie.> 14 A yɩ pɔbɔ nɩ a yɩ bibiir nɩ a yɩ dʋn na be naa a jie nyãna tɩchɛ ka a yɩ jɛjɛɛrbɛ na tara a ba tã-jɛb bonsɩ chen a ba taaba Isɩral nɩbɛ sɛ̃ na ba tɩ sʋ̃ʋ ba 15 tɩ tan ban wa jɩnɛ a Jɔɔdan mɔ̃tɔ̃ɔ mʋrfʋ jie, a wɛr 'lɔ a Nãaŋmɩn na de kʋ ba. Yɩ mɩ sʋ̃ʋ ba tɩ tan a sɔ̃ɔ 'lɔ yɩn wa jɛb a nɩbɛ bala na be a wɛr 'lɔ pɔ a yɩ Ŋmɩn 'lɔ na ɩ a Nãaŋmɩn na de kʋ yɩ. A lɛ puor, a yɩ nɩbɛ na tʋ̃ɔn lɩɛb chen tɩ jɩnɛ a yɩ mɩ̃ɛ wɛr pɔ, a 'lɔ a Nãaŋmɩn tʋ̃tʋ̃nɔ Mosesɩ na kʋ yɩ a Jɔɔdan mɔ̃tɔ̃ɔ purfʋ jie.>>

16 Ka ba 'yɛr sɔɔ a Josʋwa ɩka, <<Sɩn ɩ naa bon jaa fʋn 'yɛr kʋ sɩ, lɛ mɩ lɛ sɩn chen jie 'lɔ jaa fʋn na tʋ̃ sɩ. 17 Sɩn tu naa a fʋ nɛɛ nɩtãa a lɛ sɩn dɔ̃ɔ turo a Mosesɩ nɛɛ, a fʋ Ŋmɩn 'lɔ na ɩ a Nãaŋmɩn wʋ be a fʋ sɛ̃ nɩtãa a lɛ wʋn dɔ̃ɔ be a Mosesɩ sɛ̃. 18 Nɩrɛ 'lɔ jaa na wa chɩɩr tɔr a fʋ nɛɛ sɛɛn kũu. Ara kpɛ̃ɔ na fʋ nyɔɔ nyãa.>>