1 Ka a Josʋwa bʋɔl a Isɩral bʋrɔ ba jaa lɔ̃ɔ taa be a Sɛchɛm. Wʋ bʋɔl a nɩbɛrɛ nɩ a nidierbe nɩ a 'yɛr tↄↄrbↄ nɩ a nɩjur na be a Isɩral ka ba wa be a Ŋmɩn niem.

2 Ka a Josʋwa pãa 'yɛr kʋ a nɩbɛ ba jaa ɩka, <<Nɩtɔ̃ lɛ a Nãaŋmɩn 'lɔ na ɩ a Isɩral Ŋmɩn tara ɩka wʋ 'yɛr, <Sɔ̃ↄ kɔ̃ↄ na po, a yɩ sãakpãmine dɔ̃ɔ be a Yufɩratɩ man gɔ̃ↄn puoro ŋmɩn yor.> A yɩ sãakpãmine bala ɩ̃sʋɔ lɛ ɩ Tɛra na ɩ a Abraham nɩ a Nahↄ sãa.>> 3 Tɩchɛ ka n pãa 'yir a yɩ sãakpã Abraham yin be a Yufɩratɩ wɛr pↄ de wʋ yↄn a Keena wɛr wʋ jaa. N kʋ wʋn yɔnsuulsɩ yɔɔ. N kʋ wʋ naa Asikɩ, 4 na n mɩ de Jekɔb nɩ Isɔb kʋ a Asikɩ. N den a Ɛdↄn na be a tɔ̃ↄ paal kʋ a Isɔb ka wʋ ɩ a wʋ sofʋ, tɩchɛ ka a yɩ sãakpã 'lɔ nɩ a wʋ bibiir chen a Ijipitɩ. 5 A lɛ puor, N mɩ chiin naa Mosesɩ nɩ Aarɔn, tɩ na N waan dↄↄrfʋ wa 'yɔ̃ɔ a Ijipitɩ tẽe pↄ. Tɩchɛ n 'yir yɩn yin a dↄↄrfʋ pɔ. 6 N 'yir a yɩ sãakpãmine yin a Ijipitɩ, ka a Ijipitɩ nɩbɛ de wiir torokosɩ dire nɩ ba. Tɩchɛ a sɔ̃ɔ 'lɔ a yɩ sãakpãmine na wa ta a man-jɩɛ par, 7 ba kon bʋɔl ma ɩka N sʋ̃ʋ ba, ka N vɛ̃ ka libe be a bala nɩ a Ijipitɩ nɩbɛ chara pↄ. N vɛ̃n ka a kʋ̃ↄ pↄↄ a Ijipitɩ nɩbɛ ka ba jaa kpi. Yɩ bɔ̃ɔn a lɛ N na maal a Ijipitɩ nɩbɛ.

<<<Yɩ dɔ̃ɔ jɛ̃ a dãlpʋɔ ju kor jaa> 8 Tɩchɛ ka n pãa wa de yɩ waan a Amɔrɩ nɩbɛ bala na kpɩɛrɛ a Jɔɔdan mɔ̃tɔ̃ɔ purfʋ jie wɛr pɔ. Ba jɛb yɩ naa, tɩchɛ ka n kʋ yɩ jɛb tʋ̃ↄ fʋ. Yɩ de naa a ba wɛr tɩchɛ ka N kʋ ba a sɔ̃ↄ 'lↄ yɩn chiini.>> 9 Ka a Mowab nãa Balakɩ na ɩ a Sɩpↄr bidaba 'yir jɛb yɩ. Wʋ tʋ̃n 'yɛr kʋ Balam na ɩ a Bɩyↄ bidaba ɩka wʋ pↄ 'yɔ̃ↄ yɩ. 10 Tɩchɛ n ba tu a Balam nɛɛ ɛ, a lɛ jũu ka wʋ bɩɛl yɩ, a nɩtɔ̃ lɛ N tu faa yɩ yin a Balakɩ nuur pↄ. 11 Yɩn gɔ̃ɔ a Jɔɔdan man wa a Jɛrɩko, a Jɛrɩko nɩbɛ 'yir jɛb yɩ nɩtãa a lɛ a Amɔrɩ nɩbɛ nɩ a Perisi nɩbɛ nɩ a Keena nɩbɛ nɩ a Hiti nɩbɛ nɩ a Gɛrɩgasɩ nɩbɛ nɩ a Hivi nɩbɛ nɩ a Jebusɩ nɩbɛ na dɔ̃ɔ jɛb yɩ. Tɩchɛ N vɛ̃ naa a yɩ jɛb tʋ̃ↄ ba. 12 Yɩn wa chiini, n vɛ̃n ka dãbɩ̃ɛ kpɛ ba, lɛ an na ɩ ka N dii a Amɔrɩ nɩbɛ nãmine ayi bala bar. A yɩ sɔkpɛ̃ɛ nɩ a yɩ tãm ba lɛ yɩ jɛb ba ɛ. 13 N kʋ yɩn wɛr 'lↄ yɩn ba kↄ jaa ɛ, nɩ a tẽbɛrɛ ala yɩn ba mɛ yaa ɛ. Pʋ̃pãanyã, yɩ kpɩɛrɛ na a be dire a tɩɩr wɔ̃mɔ ala yɩn ba bʋr ɛ, na yɩ dire a tɩɩr kãa ala yɩn ba bʋr ɛ.

14 Ka a Josʋwa choo 'yɛr ɩka, <<Pʋ̃pãanyã yɩ 'yɔ̃ↄnↄ a Nãaŋmɩn na yɩ puoro wʋ sɩrɛ jaa nɩ sↄↄfʋ. Yɩ bar a ŋmɩmɛ ala a yɩ sãakpãmine na dɔ̃ɔ puoro be a Mɛsopotamɩya nɩ a Ijipitɩ tɩ puoro a Nãaŋmɩn tɛɛ. 15 Ala ɩ yaa sↄↄ na puoro wʋ ɛ, a dɩna yɩ kaa 'yir a nɩrɛ 'lↄ yɩ na puoro, a ŋmɩmɛ ala a yɩ sãakpãmine na dɔ̃ɔ puoro a Mɛsopotamɩya bɩɩ a ŋmɩmɛ ala ban dɔ̃ɔ puoro a Amɔrɩ, a bala wɛr pↄ yɩn be a pʋ̃pãanyã. Tɩchɛ maa nɩ a n yir deme 'lↄ, sɩn puor a Nãaŋmɩn.>>

16 Ka a nɩbɛ 'yɛr sɔɔ wʋ, <<Sɩn kʋ bar a Nãaŋmɩn tɩ puor ŋmɩn yor ɛ! 17 A Nãaŋmɩn 'lɔ na ɩ a sɩ Ŋmɩn lɛ 'yir sɩn nɩ a sɩ sãakpãmine yin a gbãgba-tʋ̃mɔ̃ pↄ a Ijipitɩ, sɩ nyɛ̃n a nɛkõ-tʋ̃mɔ̃ ala wʋn tʋ̃. Wʋ gu sɩ naa a paalsɩ ala a jaa pↄ sɩn tu tal. 18 Sɩn chen wa ta a wɛr nyãna pↄ, a Nãaŋmɩn dii naa a Amɔrɩ nɩbɛ bala ba jaa na be a ka bar. A lɛ jũu, sɩ mɩ na puor a Nãaŋmɩn, wʋ ɩ naa a sɩ Ŋmɩn.>>

19 Ka a Josʋwa 'yɛr kʋ a nɩbɛ ɩka, <<Tɩchɛ, amine yɩn lɛ kʋ tʋ̃ↄ puor a Nãaŋmɩn ɛ. Wʋ ɩ naa Ŋmɩn chɛchɛ na wʋ kʋ vɛ̃ a yɩ yeldɛɛr bar ɛ. Wʋ kʋ sↄↄ ka yɩ lɛ puor ŋmɩn jaa pʋɔ wʋ ɛ, 20 yɩn mɩ wa bar wʋ tɩ puor ŋmɩn yuo, wʋn 'yir tɩɛ yɩ na wʋ dɔɔr yɩ. Wʋn sɔ̃ↄ yɩn bar, wʋn gba na sɔɔ ɩ kʋ yɩ, tɩchɛ wʋn sɔ̃ↄ yɩ naa.>>

21 Ka a nɩbɛ 'yɛr kʋ a Josʋwa ɩka, <<Kai! sɩn puor a Nãaŋmɩn.>>

22 Ka a Josʋwa 'yɛr kʋ ba, <<Yɩn mɩ̃ɛ lɛ di a yɩ mɩ̃ɛ dãasɩɛ ɩka yɩ kaan 'yir na puor a Nãaŋmɩn.>>

Ka ba 'yɛr, <<Sɩ din a dãasɩɛ.>>

23 Ka a Josʋwa 'yɛr, <<Yɩ lɔb a yɩ ŋmɩmɛ ala yɩn tara bar, tɩ na yɩ bin nɛɛ ɩka yɩn den a yɩ nyãa wʋ jaa turo nɩ a Nãaŋmɩn 'lɔ na ɩ a Isɩral Ŋmɩn.>>

24 Ka a nɩbɛ pãa 'yɛr kʋ a Josʋwa ɩka, <<Sɩn puor a Nãaŋmɩn 'lɔ na ɩ a sɩ Ŋmɩn. Sɩn tu naa a wʋ yelbinsɩ.>>

25 Ka a Josʋwa ɩn a nɩbɛ nɛbõ'yen a daar 'lↄnɔ, tɩ pãa de a yelbinsɩ kʋ ba be a Sɛchɛm tẽe pↄ ka ban turo. 26 Josʋwa sɛb a yelbinsɩ anyãna 'yɔ̃ɔ a Ŋmɩn yelbinsɩ gan pↄ kʋ ba. Tɩ pãa 'mↄↄ kʋsɩr kpɛ̃ɛ tɩ ba tɩkpɛ̃ɛ kɔ̃ɔ pilem na gbʋr be a Nãaŋmɩn puorfʋ yir.

27 Wʋ 'yɛr kʋ a nɩbɛ ba jaa ɩka, <<A kʋsɩr nyã lɛ na ɩ a sɩ dãasɩɛ. Wʋ wõn a 'yɛr ala a jaa a Nãaŋmɩn na 'yɛr kʋ sɩ. Wʋn ɩ naa dãasɩɛ 'lↄ na gã, ka yɩ kʋ tʋ̃ↄ tɔr a yɩ Ŋmɩn nɛɛ ɛ.>>

28 Ka a Josʋwa pãa bar ba ka a nɩrɛ jaa lɩɛb chen a wʋ paal pↄ.

29 A anyã puor, a Nãaŋmɩn tʋ̃tʋ̃nɔ Josʋwa na ɩ a Nun bidaba kpi naa a sɔ̃ↄ 'lↄ wʋn nyɛ̃ yuomo kↄbaa dↄↄl pie (110). 30 Ka ba ũu wʋ a wʋ mɩ̃ɛ wɛr pↄ, a Tɩmɩnafʋ Sɛra tẽe na be a tɔ̃ↄ paal pɔ, na ɩ a Ɛfɩrem paal na be a Gaasɩ tɔ̃ↄ sa-par dɩr jie.

31 Tɩ tan a sɔ̃ↄ 'lↄ a Josʋwa na wa kpi, a nɩbɛ puor a Nãaŋmɩn a sɔ̃ↄ 'lↄ wʋ jaa, na ba chɛnɛ puoro a Nãaŋmɩn wʋn wa kpi puor, bojũu a nidierbe bala na chɛnɛ be be nyɛ̃n a bon 'lↄ jaa a Nãaŋmɩn na maal kʋ a Isɩral.

32 A nɩbɛ den a Josefʋ kũu ban yin a Ijipitɩ waan wa ũu be a Sɛchɛm, a wɛr 'lↄ a Jekɔb na de a libi kue kɔbaa dan yin a Hamↄr bidↄↄr sɛ̃ na ɩ a Sɛchɛm sãa. A wɛr nyã lɛ a Josefʋ yɔnsuulsɩ de ka wʋ ɩ a ba kpɩ̃ɩn bon.

33 A Aarɔn bidaba Eliasa kpi naa ka ba ũu wʋ be a Gibɩya, a tẽe 'lↄ na be a tɔ̃ↄ ju na ɩ a Ɛfɩrem paal 'lɔ ban kʋ a wʋ bidaba Fɩnɩhasɩ.