1 A sɔ̃ɔ 'lɔ a Jabin na ɩ a Hasɔr nãa na wa wõ a Isɩral jɛb tʋ̃ɔfʋ, wʋ tʋ̃n 'yɛr kʋ Jobab na ɩ a Madↄn nãa nɩ a Sɩmɩrↄn nɩ a Akɩsafʋ nãmine 2 nɩ a nãmine bala na be a tɔ̃n paalsɩ na be a sa-par dɩr jie, a Jɔɔdan baa pↄ a sa-par gʋba jie na be a Galilee man par, a tẽn ala na be a tɔ̃n sɩɛ pɔ, nɩ a tẽn ala na be a Dↄr man lõboor. 3 Wʋ mɩ lɛ tʋ̃n 'yɛr kʋ a Keena nɩbɛ na be a Jɔɔdan lõbobo ayi nɩ a Amɔrɩ nɩbɛ nɩ a Heeti nɩbɛ nɩ a Perisi nɩbɛ nɩ a Jebusɩ nɩbɛ na be be a tɔ̃n paalsɩ pɔ, nɩ a Hivi nɩbɛ na be a Hɛmↄn tɔ̃ɔ sɩɛ par be a Misipa. 4 Ba waan naa a ba jɛjɛɛrbɛ ba jaa ka ba waa nɩtãa man bire. Ba mɩ lɛ tara naa wiir nɩ a ba torokosɩ. 5 A nãmine banyãna ba jaa lɔ̃ɔn taa a ba jɛjɛɛrbɛ wa tuor be Mɛrum kʋ̃ɔ par na wa jɛb a Isɩral nɩbɛ.

6 Be lɛ a Nãaŋmɩn 'yɛr kʋ a Josʋwa ɩka, <<Ta vɛ̃ ka dãbɩ̃ɛ kʋrɔ fʋ a ba 'yɔ̃ɔ ɛ, bio a nɩtɔ̃nɔ sɔ̃ɔ, N na kʋn ba jaa kʋ a Isɩral nɩbɛ. Yɩ kar a ba wiir gbɛɛ tɩ chʋm a ba torokosɩ.>>

7 Be lɛ a Josʋwa tɩ dũu pii ba be a Mɛrum kʋ̃ɔ par. 8 Ka a Nãaŋmɩn vɛ̃ ka a Isɩral nɩbɛ jɛb tʋ̃ɔ ba, a Isɩral nɩbɛ jɛb dii ba tɩ tan be a Mɩsɩrɛfↄfʋ Mayɩm sa-par dɩr jie nɩ a Sidon, tɩ tan a Misipa na be a mɔ̃tɔ̃ɔ purfʋ jie. Ba jɛb a jɛɛr tɩ tan sɔ̃ɔ 'lↄ ban wa kʋ a ba dɔ̃dɔ̃mine ba jaa. 9 Ka a Josʋwa maal ba nɩtãa a lɛ a Nãaŋmɩn na 'yɛr, wʋ kar a ba wiir gbɛɛ tɩ chʋm a ba torokosɩ.

10 Ka a Josʋwa pãa lɩɛb chen tɩ pii a Hasɔr tẽe, na ba jɛb tʋ̃ɔ ba tɩ kʋ a ba nãa. (A sɔ̃ɔ 'lↄ, a Hasɔr mɩ lɛ dɔ̃ɔ ɩ a nãalʋ̃ʋ na bɛrma a paal 'lɔ wʋ jaa pɔ.) 11 Ba nʋʋn a nɩbɛ ba jaa, nɩrɛ jaa ba chɛ ɩ vʋr ɛ, tɩ pãa chʋm a tẽe bar.

12 A Josʋwa tʋ̃ɔn a tẽn anyãna a jaa nɩ a ba nãmine, kʋn a nɩbɛ ba jaa nɩtãa a lɛ a Nãaŋmɩn tʋ̃tʋ̃nɔ Mosesɩ na dɔ̃ɔ kpãkpãan. 13 Tɩchɛ a Isɩral nɩbɛ ba chʋm a tẽn ala na be a tɔ̃n jur ɛ, a Hasɔr tẽe tɛɛ lɛ a Josʋwa chʋm. 14 A Isɩral nɩbɛ wob a ba bʋ̃tarsɩ a jaa nɩ a dʋn yin a tẽn anyãna pↄ, ka a lɩɛb a ba bʋ̃tarsɩ. Tɩchɛ ba kʋn a nɩbɛ ba jaa, baa bar nɩrɛ jaa kʋ ɩ vʋr ɛ. 15 Nɩtãa a lɛ a Nãaŋmɩn na 'yɛr kʋ a wʋ tʋ̃tʋ̃nɔ Mosesɩ, ka a Mosesɩ mɩ 'yɛr kʋ a Josʋwa ka wʋ mɩ tu a lɛ a Mosesɩ na 'yɛr. Wʋ tʋ̃ naa a lɛ jaa a Nãaŋmɩn na kpãkpãan a Mosesɩ.

16 A Josʋwa jɛb tʋ̃ɔ a paal wʋ jaa, a tẽn ala na be a tɔ̃n jur nɩ a tɔ̃n sɩɩr pɔ, a sa-par gʋba nɩ a sa-par dɩr jie, a Gɔɔsɛn paal wʋ jaa nɩ a paal 'lɔ a wʋ sa-par gʋba jie nɩ a Jɔɔdan baa pↄ. 17,18 A paal 'lↄ yin a Halakɩ tɔ̃ↄ ju na be a sa-par gʋba na gbʋr a Ɛdↄn tɩ tan be a Baalgadɩ na be a sa-par dɩr jie, nɩ a Lɛbanↄn baa pↄ be a Hɛmↄn tɔ̃ↄ sa-par gʋba jie. Josʋwa jɛb naa a paalsɩ anyãna kor, tɩchɛ wʋ tʋ̃ɔ nyɔɔr ba na wʋ kʋ ba jaa. 19 A paal 'lɔ tɛɛ na wa maal a Isɩral nɩbɛ nɛbõ'yen lɛ Gibiɔn, be lɛ a Hivi nɩbɛ bamine kpɩɛrɛ. Ba jɛb tʋ̃ɔ a paalsɩ ala a jaa na chɛ. 20 A Nãaŋmɩn mɩ̃ɛ lɛ vɛ̃ ka ba bɔ a Isɩral nɩbɛ jɛɛr, a lɛ na vɛ̃ ka ba kʋ ba jaa na baa lɛ kaa a ba nɩbaal ɛ. Nɩtɔ̃ lɛ a Nãaŋmɩn dɔ̃ɔ kpãkpãan a Mosesɩ.

21 A sɔ̃ɔ nyãna lɛ a Josʋwa chen tɩ kʋ a nɩbɛ bala na ta tɩ bɛrɛ̃sɩ, ban bʋɔlɔ a Anakɩm, na kpɩɛrɛ a tẽn anyãna na be a tɔ̃n ju, Hɛbʋrↄn nɩ a Dɛbir nɩ a Anabi nɩ a tɔ̃n paalsɩ ala a jaa na be a Juda nɩ a Isɩral. Josʋwa kʋn ba jaa tɩ sɔ̃ɔ a ba tẽn bar. 22 Anakɩm nɩrɛ ɩ̃sʋɔ jaa ba lɛ chɛ a Isɩral paal pↄ ɛ, tɩchɛ a ba bɩlãa lɛ chɛ a Gasa nɩ a Gaafʋ nɩ Asɩdↄdɩ.

23 Josʋwa jɛb tʋ̃ɔ a paal wʋ jaa nɩtãa a lɛ a Nãaŋmɩn na dɔ̃ɔ kpãkpãan a Mosesɩ. Josʋwa de wʋn kʋ a Isɩral nɩbɛ ka wʋ ɩ a ba sofʋ, na wʋ ŋma gbulsɩ põ a Isɩral bʋrsɩ.

Ka a jɛɛr baar ka a nɩbɛ pɛ̃n.