Josʋwa 20

A Tẽbɛrɛ Ala Na Ɩ Jofaafʋ Jie

1 Be lɛ ka a Nãaŋmɩn pãa 'yɛr kʋ a Josʋwa ɩka, 2 wʋ 'yɛr kʋ a Isɩral nɩbɛ, <<Yɩ 'yir a tẽbɛrɛ ala nɩ na ɩ jofaafʋ tẽn nɩtãa a lɛ N na dɔ̃ɔ 'yɛr kʋ a Mosesɩ ɩka wʋ 'yɛr kʋ yɩ. 3 Ala ɩ a yɩ ɩ̃sʋɔ wa faan kʋ nɩrɛ, wʋn tʋ̃ↄn jo tɩ sↄↄl a be ka a nɩrɛ 'lↄ mɩ na bʋↄrↄ wʋ ɩka wʋ kʋ ta nyɛ̃ wʋ ɛ. 4 Wʋn tʋ̃ↄn jo chen a tẽbɛrɛ anyãna ɩ̃sʋɔ pↄ, wʋ chen a 'yɛr tↄↄrfʋ jie a be a tẽe dɔ̃dɔr nɛɛ na wʋ tɩ man a lɛ na ɩ kʋ a nidierbe. Ban pãa bar wʋn ka wʋ kpɛ a tẽe pↄ ka ba kʋ wʋ jie ka wʋ kpɩɛrɛ a be. 5 Ala ɩ a nɩrɛ 'lɔ na bʋↄrↄ a fʋ kʋfʋ yaa a sãn tu fʋn wa a be, a tẽe nɩbɛ ba taa ɩrɛ wa diere fʋ kʋrɔ wʋ ɛ. A sɛɛ naa ɩka ba gu fʋ bojũu fʋ faan kʋ nɩrɛ, an ba ɩ suur lɛ fʋ kʋn wʋ ɛ. 6 Fʋn kpɩɛrɛ naa a tẽe 'lↄ pↄ tɩ tan a paal nɩbɛ na wa tɔɔr a fʋ 'yɛr chãa pɔ, bɩɩ a paal 'lɔ bɔɔrlo nɩkpɛ̃ɛ na wa kpi. Fʋn pãa tʋ̃ↄn lɩɛb kul a fʋ tẽe 'lɔ pɔ fʋn yi jo wa.>>

7 A lɛ jũu a be a Jɔɔdan man mɔ̃tɔ̃ɔ mʋrfʋ jie, ba 'yir Kɛdɛsɩ na be a Galalii paal pↄ, na be a be a tɔ̃ↄ ju na ɩ a Nafɩtalɩ paal, nɩ Sɛchɛm na be a tɔ̃ↄ ju ɩ a Ɛfɩrem bʋrɔ paal, nɩ Hɛbʋrↄn na be a tɔ̃ↄ ju be a Juda paal pɔ. 8 A be a Jɔɔdan mɔ̃tɔ̃ɔ purfʋ jie, ba 'yir Bɛsɛ na be a Jɛrɩko dondol na be a dãlpʋɔ na be a Wuruben wɛr pɔ, nɩ Wuramↄfʋ na be Giliyadɩ na ɩ a Gaadɩ wɛr nɩ Golan na be a Basan na ɩ a Manaasɩ wɛr. 9 A tẽn anyãna lɛ ba 'yir ka a ɩ a jofaafʋ tẽbɛrɛ kʋ a Isɩral nɩbɛ ba jaa, nɩ a sãanba na lɔ̃ↄ kpɩɛrɛ nɩ ba. Ɩ̃sʋɔ jaa na wa faa kʋ nɩrɛ na tʋ̃ↄn nyɛ̃ faafʋ a be yin a nɩrɛ 'lↄ mɩ na bʋↄrↄ ɩka wʋ mɩ kʋ wʋ, ba kʋ tʋ̃ↄ kʋ wʋ ka bala ba wa tɔɔr a wʋ 'yɛr chãa pɔ ɛ.