1 Adonɩsɛdɛkɩ na ɩ a Jɛrusalɛm nãa wõ naa ɩka a Josʋwa jɛb tʋ̃ɔ a Ayi nɩbɛ ba jaa, na wʋ kʋ a nãa nɩtãa a lɛ wʋn dɔ̃ɔ kʋ a Jɛrɩko nɩbɛ nɩ a ba nãa. Wʋ mɩ lɛ wõn ɩka a Gibiɔn nɩbɛ ɩn naa a Isɩral nɩbɛ nɛbõ'yen na ba kpɩɛrɛ nɩ ɩ̃gan 'maar. 2 Be lɛ a Jɛrusalɛm nɩbɛ pɩla ↄↄ yↄↄ jaa nɩ a lɛ na ɩ, bojũu Gibiɔn lɛ dɔ̃ɔ ɩ a paal 'lↄ na bɛrma jɩ̃ a paalsɩ ala na tara nãmine, wʋ dɔ̃ɔn bɛrma gar a Ayi tɩ mɩ lɛ tara nɩbɛ na bɔ̃ɔ jɛɛr. 3 Ka a Adonɩsɛdɛkɩ tɩr a nɛɛ nyã kʋ Hoham na ɩ Hɛbʋrↄn nãa nɩ a Pɩram na ɩ Jarmʋfʋ nãa nɩ a Jafɩya na ɩ a Lachisɩ nãa nɩ a Dɛbir na ɩ a Ɛgilↄn nãa. 4 <<Yɩ wa sʋ̃ʋ ma ka n jɛb tɩɛ a Gibiɔn, bojũu a wʋ nɩbɛ den a ba mɩ̃ɛ tɩ 'mãtãan a Josʋwa nɩ a Isɩral nɩbɛ ka ba kpɩɛrɛ nɩ ɩ̃gan 'maar.>>

5 A Amɔrɩ nɩbɛ nãmine anũu banyãna, a Jɛrusalɛm nãa nɩ a Hɛbʋrↄn nãa nɩ a Jarmʋfʋ nãa nɩ a Lachisɩ nãa nɩ Ɛgilↄn nãa lɔ̃ɔn taa na ba tɩ jil pii a Gibiɔn.

6 Ka a Gibiɔn dↄↄr tʋ̃ 'yɛr a Josʋwa be a Gilgal ɩka, <<Ta tↄr sɩ bar ɛ nɩkpɛ̃ɛ, wa fↄↄ jaa wa faa sɩ! A Amɔrɩ nɩbɛ nãmine na be a tɔ̃n paal pɔ ba jaa lɔ̃ↄn taa wa pii sɩ.>>

7 Ka a Josʋwa nɩ a wʋ jɛjɛɛrbɛ ba jaa pʋↄn a jɛjɛɛrbɛ bala na bɔ̃ɔ jɛɛr, yi be a Gilgal chiini a Gibiɔn. 8 Ka a Nãaŋmɩn 'yɛr kʋ a Josʋwa ɩka, <<Ta joro ba dãbɩ̃ɛ ɛ, N den nie kʋfʋ tʋ̃ɔfʋ. Ba ɩ̃sʋɔ jaa kʋ tʋ̃ɔ jɛb tɩɛ fʋ ɛ.>>

9 A tɩ̃sɔɔ gbul wʋ jaa, a Josʋwa nɩ a wʋ jɛjɛɛrbɛ yin a Gilgal chen be a Gibiɔn na ba tɩ dũu pii a Amɔrɩ nɩbɛ. 10 Ka a Nãaŋmɩn vɛ̃ ka a Amɔrɩ nɩbɛ pɩla ↄↄ ban wa nyɛ̃ a Isɩral jɛjɛɛrbɛ. A Isɩral nɩbɛ kʋ ban be a Gibiɔn tɩ dii a bamine yin a tɔ̃n jur suun be a Bɛfʋ Hↄrↄn, na ba jɛb ba jaa na ba tɩ tan a Asɩka nɩ a Makɩda sa-par gʋba jie. 11 A sɔ̃ɔ 'lↄ a Amɔrɩ nɩbɛ na wa joro yire a Isɩral jɛjɛɛrbɛ sɛ̃, a Nãaŋmɩn vɛ̃n ka sakpulõbie na bɛrɛ̃sɩ lo ŋme ba kʋ tɩ tan Asɩka. A bala a sakpulõbie na kʋ gar a bala a Isɩral jɛjɛɛrbɛ na kʋ.

12 A daar 'lↄnɔ a Nãaŋmɩn na vɛ̃ ka a Isɩral nɩbɛ jɛb tʋ̃ɔ a Amɔrɩ nɩbɛ, Josʋwa 'yɛr kʋ a Nãaŋmɩn a Isɩral nɩbɛ niem ɩka,

<<Mɔ̃tɔ̃ɔ, ara a be a Gibiɔn,

ŋmɛraa, mɩ ara a Ayijalↄn baa pↄ.>>

13 Ka a mɔ̃tɔ̃ɔ ara,

ka a ŋmɛraa mɩ ara

tɩ tan a sɔ̃ɔ 'lↄ ban wa jɛb tʋ̃ↄ a ba dɔ̃dɔ̃mine.

A anyãna sɛb be a Jasar gan pↄ.

A mɔ̃tɔ̃ɔ ara na a gar ju sãlsↄↄ ba mʋr a bibir gbul wʋ jaa ɛ. 14 A nɩtɔ̃ ba dɔ̃ɔ ɩ jaa ɛ, na a kʋ̃ mɩ lɛ wa ɩ jaa ɛ, Nãaŋmɩn na tu a nɩsaal nɛɛ na wʋ de a jɛɛr jɛb kʋ a Isɩral nɩbɛ.

15 A anyã puor, a Josʋwa nɩ a wʋ jɛjɛɛrbɛ lɩɛb chen a ba jaa-jie be a Gilgal.

16 A Amɔrɩ nɩbɛ nãmine anũu jon tɩ sↄↄl be a kʋsɩr bↄↄ pↄ be a Makɩda. 17 Nɩrɛ ɩ̃sʋɔ nyɛ̃ ba naa na wʋ tɩ 'yɛr kʋ a Josʋwa a jie 'lↄ ban sↄↄl. 18 Ka a Josʋwa 'yɛr, yɩ bil kʋsɩr kpɛ̃ɛ pↄↄ a bↄↄ nɛɛ, na yɩ 'yir nɩbɛ 'yɔ̃ɔ ka ba gu. 19 Tɩchɛ yɩn mɩ̃ɛ, yɩ ta ara a be ɛ. Yɩ chɛnɛ turo a yɩ dɔ̃dɔ̃mine, yɩ tɩ dũu jɛb ba be a puor, yɩ ta vɛ̃ ka ba kpɛ a ba tẽbɛrɛ pↄ ɛ, bojũu a Nãaŋmɩn 'lɔ na ɩ a yɩ Ŋmɩn jɛb tʋ̃ɔ ba kʋ yɩ.

20 A Josʋwa nɩ a Isɩral nɩbɛ kʋ ba naa tɩchɛ ka a bamine mɩ tʋ̃ɔ jo tɩ kpɛ a ba tẽn ala ban mɛ a dachine jil na ba faa a ba mɩ̃ɛ ka a baa kʋ ba ɛ. 21 Ka a Josʋwa jɛjɛɛrbɛ ba jaa lɛ tʋ̃ɔ lɩɛb wa a ba jaa-jie be a Makɩda ka baa kʋ a ɩ̃sʋɔ jaa ɛ.

Nɩrɛ jaa na be a paal pɔ ba 'la 'yɛr 'yɛr tɩɛ a Isɩral nɩbɛ ɛ.

22 Ka a Josʋwa pãa 'yɛr ɩka, <<Yɩ yuo a kʋsɩr bɔɔ, tɩ tara a nãmine anũu bala wa kʋ ma.>> 23 Be lɛ ka ba yuo a kʋsɩr bɔɔ, tɩ tara a Jɛrusalɛm nɩ a Hɛbʋrↄn nɩ a Jarmʋfʋ nɩ a Lachisɩ nɩ a Ɛgilↄn nãmine yin 24 wa kʋ a Josʋwa. Ka Josʋwa pãa bʋɔl a Isɩral dↄↄr ba jaa wa lɔ̃ↄ taa, tɩ vɛ̃ a nɩbɛrɛ bala na lɔ̃ↄ chiin wʋ ka ba de a ba gbɛɛ dↄↄl a nãmine nyɩn ju, ka ba ɩ a lɛ.

25 Ka a Josʋwa pãa 'yɛr kʋ a wʋ nɩbɛrɛ ɩka, <<Yɩ ta vɛ̃ ka a dãbɩ̃ɛ kʋrɔ yɩ ɛ, bɩɩ ka a yɩ ɩ̃gama chʋɔr ɛ. Yɩ ara kpɛ̃ɔ na yɩ nyↄↄ nyãa, bojũu a nɩtɔ̃ lɛ a Nãaŋmɩn na ɩ kʋ a yɩ dɔ̃dɔ̃mine ba jaa.>> 26 Ka a Josʋwa pãa kʋ a nãmine anũu banyãna yɔɔl tɩɩr anũu ju, ka a ba ɩ̃gama yɔɔl a be tɩ tan jãanʋɔr.

27 A mɔ̃tɔ̃ɔ na wa mʋr, ka a Josʋwa 'yɛr ka ba yↄↄr ba tɩ lↄb 'yɔ̃ↄ a bↄↄ 'lↄ pↄ ban dɔ̃ɔ sↄↄl. Ba bil kʋsɩr bɛrɛ tɩ pↄↄ a bↄↄ nɛɛ, ka a chɛnɛ be be wa tɩ tan a dɩna.

28 A daar 'lↄnↄ mɩ lɛ a Josʋwa tɩ pii a Makɩda tẽe na wʋ nyɔɔr ba nɩ a ba nãa. Wʋ kʋ naa a nɩbɛ ba jaa ka nɩrɛ jaa ba chɛ ɛ. Wʋ maal a Makɩda nãa nɩtãa a lɛ wʋn maal a Jɛrɩko nãa.

29 A anyã puor, Josʋwa nɩ a wʋ jɛjɛɛrbɛ yin be a Makɩda chen be a Libina na wʋ tɩ pii a tẽe. 30 Ka a Nãaŋmɩn mɩ kʋ a Isɩral nɩbɛ kpɛ̃ɔ ka ba jɛb tʋ̃ↄ a tẽe nɩ a wʋ nãa. Baa bar nɩrɛ jaa a tẽe pɔ ɛ. Ba kʋn nɩrɛ jaa a tẽe pɔ. Ba maal a nãa nɩtãa a lɛ ban dɔ̃ɔ maal a Jɛrɩko nãa.

31 A anyã puor, Josʋwa nɩ a wʋ jɛjɛɛrbɛ yin be Libina chen a Lachisɩ, na ba tɩ jil pii a tẽe wʋ jaa. 32 A Nãaŋmɩn kʋn a Isɩral nɩbɛ kpɛ̃ɔ ka ba jɛb tʋ̃ɔ a Lachisɩ deme a jɛɛr ber ayi daar. Nɩtãa a lɛ ban dɔ̃ɔ ɩ a Libina, baa bar nɩrɛ jaa ɛ, ba kʋn ba jaa a tẽe pɔ. 33 A Horam na ɩ Gɛsɛ nãa 'yir wa pʋↄ na sʋ̃ʋ a Lachisɩ deme, tɩchɛ a Josʋwa jɛb tʋ̃ɔ a 'lↄ nɩ a wʋ jɛjɛɛrbɛ na wʋ kʋ ba jaa, ka a ɩ̃sʋɔ jaa ba chɛ ɛ.

34 Josʋwa nɩ a wʋ jɛjɛɛrbɛ pãa yin be a Lachisɩ chen a Ɛgilↄn na ba tɩ jil pii a tẽe wʋ jaa. 35 Ba tʋ̃ɔn a tẽe, kʋ a nɩbɛ ba jaa a daar 'lↄnↄ nɩtãa a lɛ ban dɔ̃ɔ kʋ a Lachisɩ deme.

36 A anyã puor, Josʋwa nɩ a wʋ jɛjɛɛrbɛ yin be a Ɛgilↄn do be a Hɛbʋrↄn, na ba tɩ pii a tẽe, 37 na ba nyɔɔr a nɩbɛ. Ba kʋn a nãa nɩ nɩrɛ jaa a tẽe pↄ nɩ a tẽn ala na gbʋr a Hɛbʋrↄn. Josʋwa sɔ̃ɔn a tẽe wʋ jaa nɩtãa a lɛ wʋn dɔ̃ɔ sɔ̃ɔ a Ɛgilↄn, waa bar nɩrɛ jaa ɛ.

38 Be lɛ ka a Josʋwa nɩ a wʋ jɛjɛɛrbɛ pãa lɩɛb chen tɩ pii a Dɛbir tẽe. 39 Wʋ tɩ jɛb tʋ̃ɔ a tẽe nɩ a nãa nɩ a tẽn ala na gbʋr a be. Ba kʋn a nɩbɛ ba jaa. Josʋwa maal a Dɛbir tẽdeme nɩ a ba nãa nɩtãa a lɛ wʋn dɔ̃ɔ maal a Hɛbʋrↄn nɩ a Libina nãa.

40 Josʋwa jɛb de a paal wʋ jaa. Wʋ jɛb tʋ̃ɔ a nãmine bala na be a tẽn ala na be a tɔ̃n ju, a mɔ̃tɔ̃ɔ purfʋ jie nɛʋ nɩ a mɔ̃tɔ̃ɔ mʋrfʋ jie tɔ̃n, nɩ a dãlpʋɔ na be a sa-par gʋba jie. Waa bar nɩrɛ jaa ɛ, wʋ kʋn ba jaa. Nɩtɔ̃ lɛ a Isɩral Ŋmɩn na ɩ a Nãaŋmɩn kpãkpãan. 41 Josʋwa tʋ̃ɔ ba naa yin be a Kadɛsɩ Baanɩya tɩ tan Gasa, nɩ an yi a Gɔɔsɛn paal wʋ jaa tɩ tan a Gibiɔn. 42 A Josʋwa jɛb tʋ̃ɔ a nãmine banyãna ba jaa nɩ a ba paalsɩ a jɛɛr bõ'yen 'lɔnɔ pɔ bojũu, a Isɩral nɩbɛ Ŋmɩn na ɩ a Nãaŋmɩn lɛ dɔ̃ɔ jɛɛrɛ kʋrↄ a Isɩral.

43 A anyã puor, a Josʋwa nɩ a wʋ jɛjɛɛrbɛ lɩɛb chen be a Gilgal na ɩ a ba jaa-jie.