Josʋwa 9

A Gibiɔn Nɩbɛ Na Bɛl A Josʋwa

1 A nãmine bala na be a Jɔɔdan man mɔ̃tɔ̃ɔ mʋrfʋ jie, wõ naa a Isɩral nɩbɛ jɛb tʋ̃ɔfʋ, a bala na be a tɔ̃n jur nɩ a tɔ̃n sɩɩr pↄ nɩ a bala na kpɩɛrɛ a ji-chãa na gbʋr a Mɛditɛrɛniya mandal na tɩ ta a Lɛbanↄn sa-par dɩr jie. Bala lɛ ɩ a Heeti nɩbɛ nɩ a Amɔrɩ nɩbɛ nɩ a Keena nɩbɛ nɩ a Perisi nɩbɛ nɩ a Hivi nɩbɛ nɩ a Jebusɩ nɩbɛ nãmine. 2 Ba jaa wa lɔ̃ↄn taa na jɛb a Josʋwa nɩ a Isɩral nɩbɛ.

3 Tɩchɛ ka a Gibiɔn nɩbɛ na ɩ a Hivi nɩbɛ na wa wõ a lɛ a Josʋwa na dɔ̃ɔ maal a Jɛrɩko nɩ a Ayi 4 ka ba bʋɔrɔ ɩka ba bɛl wʋ. Ba tɩ bↄn bʋ̃diir na ba dɔɔl a ba bʋ̃n jur nɩ bɔtɔ koro nɩ dãwʋʋr koro. 5 Ba den bon jãrsɩ nɩ nafɔɔr koro ban sɛ su, ka a paanʋ̃ɔ ban tara chiin ko ul. 6 Na ba pãa chen be a ba jaa-jie be a Gilgal tɩ 'yɛr kʋ a Josʋwa nɩ a Isɩral nɩbɛ ɩka, <<Sɩ yin jie 'lↄ na jãa, sɩ bʋↄrↄ naa ɩka sɩ wa ka sɩ wa ɩ nɛbõ’yen.>>

7 Tɩchɛ ka a Isɩral nɩbɛ 'yɛr, <<Bo lɛ vɛ̃ ka sɩ na ɩn yɩ nɛbõ’yen? Amine a yɩ jie gbʋr sɩ naa.>>

8 Ka ba 'yɛr kʋ a Josʋwa ɩka, <<Sɩ ɩ naa a fʋ tʋ̃tʋnbɔ.>>

Ka a Josʋwa sʋʋr ba ɩka, <<Nɩbaboo lɛ yɩ ɩ? Nyɩnɛ lɛ yɩ yi?>>

9 Ka ba 'yɛr a nɩtɔ̃ kʋ wʋ, <<Nɩkpɛ̃ɛ sɩ yin jie 'lↄ na jãa, sɩ wõn a fʋ Ŋmɩn na ɩ a Nãaŋmɩn yele. Sɩ wõn a tʋ̃mɔ̃ 'lↄ jaa wʋn tʋ̃ be a Ijipitɩ, 10 na sɩ mɩ lɛ wõ a lɛ wʋn maal a Amɔrɩ nɩbɛ nãmine ayi be a Jɔɔdan mɔ̃tɔ̃ɔ purfʋ jie a Sihɔn na ɩ a Hɛsɩbↄn nãa nɩ a Ɔgi na ɩ Basan nãa na be a Asiterↄfʋ. 11 A sɩ nidierbe nɩ a nɩbɛ ba jaa na kpɩɛrɛ a sɩ wɛr pɔ, ɩka sɩ bↄ bʋ̃diir lɛ an na ɩ ka sɩ tʋ̃ɔ wa nyɛ̃ fʋ. Ba 'yɛr naa ɩka sɩ wa ɩ a fʋ tʋ̃tʋnbɔ, na sɩ wa ɩn fʋ nɛbõ’yen. 12 Kaa a sɩ paanʋ̃ɔ, a sɔ̃ɔ 'lɔ sɩn yin yaa a yir waara nɩ a fʋ sɛ̃, a chɛnɛ na tʋlɔ. Tɩchɛ kaa, pʋ̃pãanyã a jaa wa kon ul. 13 A sɔ̃ɔ 'lɔ sɩn 'yɔ̃ɔ a dãa a wʋʋr anyã pɔ, wɔ paalaa lɛ, tɩchɛ pʋ̃pãanyã a ben chɩɛr. A sɩ bʋ̃sursɩ nɩ a sɩ nafↄbↄ lɩɛb bʋ̃jãrsɩ, a sɔr na jãa jũu.>>

14 Ka a Isɩral nɩbɛ sↄↄ de a ba bʋ̃diir amine, tɩchɛ baa sʋʋr 'yɛr yin a Nãaŋmɩn sɛ̃ ɛ. 15 Josʋwa ɩn naa a Gibiɔn nɩbɛ nɛbõ’yen ka ba ɩ barmine, na wʋ bar ba ka ba be be. A Isɩral tẽe nidierbe pol kʋ ba ɩka, ban tara naa a nɛbõ’yen.

16 Ban wa ɩ a nɛbõ’yen wa baar, a ber ata daar lɛ ba bɔ̃ɔn ɩka, ba yin jie 'lↄ na gbʋr. 17 Be lɛ ka a Isɩral nɩbɛ 'yir de ber ata chiin tɩ ta a tẽn ala a nɩbɛ banyãna na kpɩɛrɛ, a Gibiɔn nɩ a Kefɩra nɩ a Bɛɛrↄfʋ nɩ a Kɩrɩyafʋ Jɛrɩyim. 18 Tɩchɛ ka a Isɩral nɩbɛ kʋ tʋ̃ɔ kʋ ba ɛ, bojũu a ba nidierbe den a Isɩral Ŋmɩn na ɩ a Nãaŋmɩn yuor pol kʋ ba. A Isɩral nɩbɛ ba jaa pãa 'yɛr pʋsɔ̃ɔ 'yɛr kʋ a ba nidierbe nɩ a lɛ ban maal. 19 Tɩchɛ ka ba 'yɛr sɔɔ ba ɩka, <<Sɩn ben de a Isɩral Ŋmɩn na ɩ a Nãaŋmɩn yuor be pol kʋ ba, sɩ kʋ tʋ̃ɔ maal ba dɛɛr ɛ. 20 A sɛɛ naa ɩka sɩ bar ba a ba be be sɩn pol kʋ ba jũu, sɩn ba ɩ a lɛ ɛ, Nãaŋmɩn na dↄↄr sɩ naa. 21 Yɩ vɛ̃ ka ba kpɩɛrɛ a ka tɩchɛ bala lɛ na ma ŋmara a sɩ daar na ba ɔ̃ɔnɔ nɩ a sɩ kɔ̃n.>> Nɩtɔ̃ lɛ a nidierbe 'yɛr.

22 Ka a Josʋwa vɛ̃ ka ba tara a Gibiɔn nɩbɛ waan a wʋ sɛ̃, ka wʋ sʋʋr ba ɩka, <<Bo lɛ so yɩn bɛlsɩ 'yɛr ɩka yɩ yin jijãan tɩchɛ ka a ɩ yɩ kpɩɛrɛ na gbʋr a ka? 23 A nɩtɔ̃ yɩn ɩ jũu, a Ŋmɩn pↄn 'yɔ̃ↄ yɩ, a yɩ nɩbɛ na ɩn gbãgbaar sɔ̃ɔ jaa, na ba ma ŋmara daar tɩ ɔ̃ↄnↄ kɔ̃n waara nɩ a Ŋmɩn yir.>>

24 Ka ba 'yɛr sɔɔ wʋ, <<Nɩkpɛ̃ɛ, sɩ maal a lɛ bojũu sɩ wõn ɩka sɩrɛ jaa a yɩ Ŋmɩn na ɩ a Nãaŋmɩn dɔ̃ɔn kpãkpãan a wʋ tʋ̃tʋ̃nɔ Mosesɩ ɩka wʋ de a paal wʋ jaa kʋ yɩ, ka yɩ kʋ a nɩbɛ ba jaa na kpɩɛrɛ a wʋ pɔ a sɔ̃ɔ 'lɔ yɩn waara. Sɩ ɩ naa a lɛ bojũu pɩla ɔɔ sɩ naa a yɩ jũu, ka dãbɩ̃ɛ kpɛ sɩ a sɩ nyɛvʋɛ 'yɔ̃ɔ. 25 Pʋ̃pãanyã, sɩ ben a fʋ nuur pɔ, ɩ sɩ lɛ jaa fʋn tɩɛr na tor.>>

26 Nɩtɔ̃ lɛ a Josʋwa ɩ, wʋ gu ba naa na waa vɛ̃ ka a Isɩral nɩbɛ kʋ ba ɛ. 27 Tɩchɛ a daar 'lɔnɔ wʋ maal ba naa ka ba ɩ gbãgbaar na ba ŋmara daar, tɩ ɔ̃ɔnɔ kʋ̃ↄ kʋrↄ a Isɩral nɩbɛ nɩ a be a Nãaŋmɩn bɔɔrlo jɛkpulo na be. Ba chɛnɛ na tʋ̃nɔ a nɩtɔ̃ wa tan a dɩna a jie 'lↄ a Nãaŋmɩn na 'yir ka ba puoro wʋ.