1 An wa kor jaa, Nãaŋmɩn gu naa a Isɩral nɩbɛ yin a ba dɔ̃dɔ̃mine nuur pↄ, a sɔ̃ↄ 'lↄ a Josʋwa na kor nyɔ̃ↄ, 2 ka wʋ pãa bʋɔl a Isɩral nɩbɛ ba jaa nɩ a nɩbɛrɛ nɩ a nidierbe nɩ a 'yɛr tↄↄrbↄ nɩ a nɩjur na be a nɩbɛ pɔ na wʋ 'yɛr ɩka, <<Pʋ̃pãanyã, n kor nyɔ̃ɔ. 3 Yɩ nyɛ̃n a lɛ jaa a Nãaŋmɩn na ɩ a yɩ Ŋmɩn na maal a paalsɩ anyã a jaa a yɩ jũu. A Nãaŋmɩn na ɩ a yɩ Ŋmɩn lɛ ma jɛɛrɛ kʋrↄ yɩ sɔ̃ↄ jaa. 4 N põn a paalsɩ ala na chɛ kʋ a yɩ bʋrsɩ nɩ a paalsɩ ala n na tʋ̃ↄ jɛb de kʋ yɩ be a Jɔɔdan man pↄ, be a mɔ̃tɔ̃ɔ purfʋ jie tɩ tan be a Mɛditɛrɛniya mandal mɔ̃tɔ̃ɔ mʋrfʋ jie. 5 A Nãaŋmɩn na ɩ a yɩ Ŋmɩn na vɛ̃n ka ba lɩɛb puor jo, ka wʋ pãa dii ba a sɔ̃ↄ 'lↄ yɩn wa chiini. Yɩn den a ba wɛr nɩtãa lɛ a Nãaŋmɩn na ɩ a yɩ Ŋmɩn na pol kʋ yɩ. 6 A lɛ jũu, yɩ kaara sʋ̃ na yɩ turo a lɛ jaa na sɛb a Mosesɩ yelbinsɩ gan pↄ. Yɩ taa wa bara ɩ̃sʋɔ jaa ɛ, 7 na yɩ taa wa de a yɩ mɩ̃ɛ tɩ lɔ̃ↄnɔ nɩ a nɩbɛ banyãna na chɛ be a yɩ pɔ bɩɩ bʋɔlɔ a ba ŋmɩmɛ bɩɩ de a ŋmɩmɛ yoe bine nɩ nɛɛ ɛ, bɩɩ puoro a ŋmɩmɛ ala bɩɩ gburo a ba niem ɛ. 8 Tɩchɛ, yɩ tara yelmɩ̃ɛ kʋ a Nãaŋmɩn nɩtãa a lɛ yɩn be wa tan a sɔ̃ↄ nyã. 9 A Nãaŋmɩn diin paalsɩ ala na bɛrɛ̃sɩ tɩ kpɛ̃mɛ a sɔ̃ↄ 'lↄ yɩn chiini, ka ɩ̃sʋɔ jaa ba tʋ̃ↄ jɛb yɩ ɛ. 10 A yɩ ɩ̃sʋɔ jaa na tʋ̃ↄn dii dↄↄr tur ka ba jo, bojũu a Nãaŋmɩn 'lɔ na ɩ a yɩ Ŋmɩn lɛ jɛɛrɛ kʋrↄ yɩ nɩtãa a lɛ wʋn pol bin. 11 A lɛ jũu, yɩ kaara sʋ̃, na yɩ nʋ̃ a Nãaŋmɩn na ɩ a yɩ Ŋmɩn. 12 Yɩn wa tɔr tɩ lɔ̃ɔn a paalsɩ bala na chɛnɛ be a yɩ pↄ nɩbɛ, na yɩ kulo taar, 13 yɩ bɔ̃ɔn ɩka, a Nãaŋmɩn na ɩ a yɩ Ŋmɩn kʋ lɛ dii a paalsɩ anyãna bar a yɩ niem ɛ. Tɩchɛ ban tʋ̃ɔn vɛ̃ ka yɩ di dↄↄyɛ, na ba ɩ chɛbaa bɩɩ bɔɔ kʋ yɩ, ka a ɔɔrɔ nɩtãa kpaaraa ban fɔɔrɔ nɩ fʋ dũkur ju, bɩɩ ɩ gʋʋr chɔɔrɔ yɩ a nibie. Lɛ lɛ yɩn di a dↄↄyɛ tɩ tan a sɔ̃ↄ 'lↄ yɩ jaa na wa baar a wɛr mɩ̃ɛ nyã a Nãaŋmɩn na ɩ a yɩ Ŋmɩn na kʋ yɩ.>>

14 <<Pʋ̃pãanyã a n sɔ̃ↄ tan ɩka n kpi. A yɩ ɩ̃sʋɔ jaa bɔ̃ɔn naa a wʋ nyãa nɩ a wʋ sɩɛ pↄ ɩka a Nãaŋmɩn na ɩ a yɩ Ŋmɩn den a bʋ̃mɩn a jaa kʋ yɩ nɩtãa a lɛ wʋn pol. Wʋ tun a wʋ polfʋsɩ a jaa wʋn pol, waa bar a ɩ̃sʋɔ jaa ɛ. 15 Tɩchɛ nɩtãa a lɛ wʋn tu a wʋ polfʋsɩ a jaa kʋ yɩ, lɛ mɩ lɛ wʋn waan a yeldɛbɛ ala a jaa wʋn 'yɛr. 16 Ala ɩ yaa wa tu a nɛbõ'yen 'lↄ a Nãaŋmɩn na ɩ a yɩ Ŋmɩn na kpãkpãan yɩ ɩka yɩ tu ɛ, tɩ na yɩ puoro tɩ tʋ̃nɔ kʋrɔ ŋmɩn yor, wʋn dɔɔr yɩ naa nɩ a wʋ suur, a kʋ̃ kor ɛ, a yɩ ɩ̃sʋɔ jaa kʋ̃ chɛnɛ a wɛr mɩ̃ɛ nyã pɔ wʋn kʋ yɩ ɛ.>>