1 A Amɔrɩ nɩbɛ nãmine ba jaa na be a Jɔɔdan mɔ̃tɔ̃ɔ mʋrfʋ jie, nɩ a Keena nãmine ba jaa na be a Mɛditɛrɛniya mandal lõboor wõn ɩka, a Nãaŋmɩn vɛ̃n ka a Jɔɔdan man ko tɩ tan a sɔ̃ɔ 'lↄ a Isɩral nɩbɛ na wa gɔ̃ɔ. Dãbɩ̃ɛ kpɛ ba naa ka a ba ɩ̃gan chʋɔr a Isɩral nɩbɛ jũu.

2 Be lɛ a Nãaŋmɩn pãa 'yɛr kʋ a Josʋwa ɩka, <<De kʋsɩbɛ maal ka a ɩ sↄbil ka fʋ ŋman a Isɩral nɩbɛ yↄɛ.>> 3 A Josʋwa tu naa a lɛ a Nãaŋmɩn na 'yɛr, na wʋ ŋma a Isɩral nɩbɛ yↄɛ a be ban bʋɔlɔ a yↄɛ ŋmafʋ tɔ̃ɔ ju.

4-6 A Isɩral nɩbɛ na wa yire a Ijipitɩ, ka ba ŋman a dabil ba jaa yↄɛ. Tɩchɛ a sɔ̃ɔ 'lɔ a Isɩral nɩbɛ na vire yʋɔrɔ a yuomo lɩjaayi na gɔ̃ɔ a dãlpʋɔ, a ba dabile ɩ̃sʋɔ jaa ba ŋmaa yʋɔr ɛ. A lɛ puor, a dɔɔr bala na ta jɛɛr jɛfʋ ban yin a Ijipitɩ paal pɔ waan kpi naa bojũu ba tɔr a Nãaŋmɩn nɛɛ. Nɩtãa a lɛ wʋn dɔ̃ɔ pɔ, waa vɛ̃ ka ba nyɛ̃ a wɛr 'lɔ na vɩɛlɛ tɩ tara pʋɔr wʋn pol kʋ a ba sãakpãmine ɛ. 7 Bojũu a nɩbɛ banyãna ba dɔ̃ɔ ŋma a bibiir yↄɛ ɛ, a bibiir banyãna yↄɛ lɛ a Josʋwa ŋma. 8 A yↄɛ ŋmafʋ na wa baar, a nɩbɛ ba jaa ba tʋ̃ɔ chen jie jaa ɛ, ba jɛ̃n a ba jaa-jie tɩ tan a ba yↄɛ na wa 'mãa.

9 Ka a Nãaŋmɩn 'yɛr kʋ a Josʋwa ɩka, <<Dɩna N 'yir yɩn yin a Ijipitɩ yɩn dɔ̃ɔ be ɩ a gbãgbaar dire a vĩ.>> Ala lɛ so ka ba bʋɔlɔ a jie Gilgal, a yuor 'lↄ lɛ ba chɛnɛ bʋɔlɔ wa tan a dɩna.

10 A sɔ̃ɔ 'lↄ a Isɩral nɩbɛ na chɛnɛ jɩnɛ a Gilgal, a ji-chãa 'lↄ na gbʋr a Jɛrɩko, ba din a ba golbar difʋ a ŋmɛraa a wʋ ber pie nɩ anaar daar jãanʋɔr. 11 A wɛr na wa chaar lɛ ɩ a bibir dɔ̃ɔ ban di a bʋ̃diir ala na be a Keena, a bʋ̃bie ban sɛ̃ nɩ a paanʋ̃ɔ ban ba 'yɔ̃ↄ dãbɩl ɛ. 12 A sɔ̃ɔ 'lↄ, a bʋ̃diir ala ban bʋɔlɔ a Maana ba lɛ loro ɛ, ka a Isɩral nɩbɛ ba lɛ nyɛrɛ yaa go ɛ. An yi a sɔ̃ɔ 'lↄ, ba dire na a bonsɩ ala na be a Keena wɛr pɔ.

13 A sɔ̃ɔ 'lↄ a Josʋwa na gbʋrɔ a Jɛrɩko, a dẽdẽedaa lɛ wʋ nyɛ̃ daba na ara a wʋ niem tara sɔkpɛ̃ɛ. Ka a Josʋwa tↄↄ ta sʋʋr wʋ ɩka, <<Fʋ ɩ naa a sɩ jɛjɛɛrbɛ ɩ̃sʋɔ bɩɩ a sɩ dɔ̃dɔ̃mɔ̃ ɩ̃sʋɔ lɛ fʋ ɩ?>>

14 Ka a daba 'yɛr sɔɔ wʋ ɩka, <<N ba ɩ a ba ɩ̃sʋɔ jaa ɛ, maa lɛ ɩ a Nãaŋmɩn jɛjɛɛrbɛ nɩkpɛ̃ɛ.>>

Ka a Josʋwa lo kpa nie tẽe nɩ 'yɔ̃ɔfʋ tɩ 'yɛr ɩka, <<N ɩ naa a fʋ tʋ̃tʋ̃nɔ, bo lɛ fʋ bʋↄrↄ ɩka n ɩ?>>

15 Ka a Nãaŋmɩn jɛjɛɛrbɛ nɩkpɛ̃ɛ 'yɛr ɩka, <<Yaar a fʋ nafↄbↄ bar, fʋ ara naa jie na ɩ chɛchɛ. Ka a Josʋwa tu a lɛ wʋn 'yɛr.>>