1 Be lɛ ka a Nãaŋmɩn 'yɛr kʋ a Josʋwa ɩka, <<Ta joro dãbɩ̃ɛ bɩɩ ta vɛ̃ ka a ɩ̃gan chʋɔr fʋ ɛ. Tara a fʋ jɛjɛɛrbɛ ba jaa chiin be a Ayi. Bojũu N de naa a Ayi na N kʋ fʋ nɩ a wʋ nãa nɩ a wʋ nɩbɛ nɩ a wʋ wɛr. 2 Yɩ maal a Ayi nãa nɩtãa a lɛ yɩn dɔ̃ɔ maal a Jɛrɩko nãa, tɩchɛ pʋ̃pãanyã 'lɔ, yɩ de a ba bʋ̃tarsɩ nɩ a ba dʋn ka a ɩ a yɩ sofʋ. Yɩ chↄↄr tu a tẽe puor tɩ dũu jɛb ba.>>

3 Ka a Josʋwa nɩ a wʋ jɛjɛɛrbɛ chen na tɩ jɛb a Ayi nɩbɛ. Wʋ 'yir a jɛjɛ-kpɩ̃ɛn turo lɩjɛr nɩ pie tʋ̃ ba tɩ̃sɔɔ 4 nɩ a kpãafʋ 'yɛrbie anyãna ɩka, <<Yɩ tɩ sↄↄl a tẽe puor, yɩ taa wa jãan a tẽe yɔɔ ɛ, na yɩ chↄↄr gu na jɛb ba. 5 Maa nɩ a n nɩbɛ bamine na kpɛ naa a tẽe pↄ, bala wa 'yir tɩɛ sɩ, sɩn lɩɛb joro nɩtãa a lɛ sɩn dɔ̃ɔ de nie ɩ. 6 Ban joro na turo sɩ tɩ tan a sɔ̃ɔ 'lↄ sɩn wa bɛl ba yin a tẽe pↄ. Ban tɩɛr ɩka sɩ lɛ joro naa nɩtãa a lɛ sɩn dɔ̃ɔ jo. 7 Ka yɩ pãa 'yir a jiir ala yɩn sↄↄl tɩ jɛb a tẽe. A yɩ Ŋmɩn na ɩ a Nãaŋmɩn na de naa a tẽe kʋ yɩ. 8 Yɩn wa tʋ̃ↄ a tẽe wa baar, yɩ chʋm bũu 'yɔ̃ↄ, nɩtãa a lɛ a Nãaŋmɩn na kpãkpãan yɩ. Anyãna lɛ sɛɛ ɩka yɩ ɩ.>>

9 Ka a Josʋwa pãa vɛ̃ ka ba chen, na ba tɩ sↄↄl a ba sↄↄlfʋ jiir chɛlɛ ba a be Ayi mɔ̃tɔ̃ɔ mʋrfʋ jie, a Ayi nɩ a Bɛtɩl chara pↄ. Tɩchɛ ka a Josʋwa gã be a ba jaa-jie a tɩ̃sɔɔ 'lɔnɔ.

10 A wɛr na wa chaar bibio, ka a Josʋwa 'yir bʋɔl a jɛjɛɛrbɛ lɔ̃ↄ taa. Ka a 'lↄ nɩ a Isɩral nidierbe de ba nie chiin ba a be a Ayi. 11 A jɛjɛɛrbɛ bala na 'mãtaa chiin wʋ, chen be a tẽe niem na ba tɩ maal a ba jaa-jie a be a sa-par dɩr jie, ka a baa be a bala nɩ a Ayi chara pɔ. 12 Wʋ 'yir dↄↄr turo anũu ka ba sↄↄl be a tẽe mɔ̃tɔ̃ɔ mʋrfʋ jie a Bɛtɩl nɩ a Ayi chara pↄ. 13 Wʋ vɛ̃n ka ba ŋma gbulsɩ na jɛb ba, ka ba yↄↄ ara be a sa-par dɩr jie tɩchɛ ka a bamine mɩ ara be a mɔ̃tɔ̃ɔ mʋrfʋ jie. Tɩchɛ ka a Josʋwa gã be a baa pↄ.

14 A Ayi nãa na wa nyɛ̃ a Josʋwa nɩbɛ, wʋ lɔ̃ↄn taa a wʋ nɩbɛ fↄↄ jaa. 'Lↄ nɩ a wʋ nɩbɛ yin tor a Jɔɔdan baa lõboor ɩ̃sʋɔ nɩ tɩ jɛb a Isɩral nɩbɛ, nɩtãa a lɛ ban dɔ̃ɔ jɛb ba a be, tɩchɛ baa bɔ̃ɔ ɩka a jɛjɛɛrbɛ sɔɔl gu ba a be a tẽe dãpuor ɛ. 15 Josʋwa nɩ a wʋ nɩbɛ bɛl lɩɛb joro nɩtãa a lɛ ban dɔ̃ɔ dii ba ka ba jo, na ba jo tor a dãlpʋɔ. 16 Ba bʋɔl a Ayi jɛjɛɛrbɛ ba jaa lɔ̃ↄ taa ka ba dire ba, a lɛ ban dire a Josʋwa nɩ a wʋ nɩbɛ, ka ba jo yi jãan a tẽe. 17 A Ayi jɛjɛɛrbɛ ba jaa yin turo a Isɩral jɛjɛɛrbɛ tɩ bar a tẽe ka wʋ gã vuo, nɩrɛ ba lɛ be be na jɛb kʋ a tẽe go ɛ.

18 Ka a Nãaŋmɩn 'yɛr kʋ a Josʋwa ɩka, <<De a fʋ pĩi lɔraa tur a Ayi, N diere wʋn kʋrↄ fʋ.>> Ka a Josʋwa ɩ a lɛ a Nãaŋmɩn na 'yɛr, 19 a sɔ̃ɔ 'lↄ wʋn wa 'mↄↄ a wʋ nũu tur, ka a wʋ nɩbɛ bala na sↄↄl vaa 'yir jo kpɛ a tẽe pↄ tɩ jɛb tʋ̃ɔ a tẽe. Na ba chʋm bũu 'yɔ̃ↄ a tẽe pↄ. 20 A sɔ̃ɔ 'lↄ a Ayi jɛjɛɛrbɛ na wa lɩɛb kaa a ba puor, ka ba nyɛ̃ a jʋʋr na uro duoro a saaju. Ka sↄr ba be be ka ban lɛ faa a ba mɩ̃ɛ ɛ. Bojũu, a Isɩral jɛjɛɛrbɛ bala na jo tor a dãlpʋɔ lɩɛb tuor ba jɛɛrɛ nɩ ba. 21 A sɔ̃ɔ 'lↄ a Josʋwa nɩ a wʋ jɛjɛɛrbɛ na wa bɔ̃ɔ ɩka a wʋ jɛjɛɛrbɛ bala na kpɛ a tẽe pɔ chʋm a tẽe, ka ba pãa lɩɛb kʋrↄ a Ayi jɛjɛɛrbɛ. 22 Ka a Isɩral jɛjɛɛrbɛ bala na dɔ̃ɔ kpɛ a Ayi tẽe pↄ yi pʋↄ ba ka ba jɛb a Ayi jɛjɛɛrbɛ. Ka a Isɩral jɛjɛɛrbɛ wa jil a Ayi jɛjɛɛrbɛ 'yɔ̃ɔ sãlsↄↄ na ba kʋ ba jaa. Ka a ba ɩ̃sʋɔ jaa ba tʋ̃ɔ jo faa wʋ mɩ̃ɛ ɛ, 23 ka a Ayi nãa tɛɛ ba lɛ ɛ. Ba nyↄↄ wʋn tɩ kʋ a Josʋwa.

24 A Isɩral jɛjɛɛrbɛ kʋn a ba dɔ̃dɔ̃mine ba jaa a be a dãlpʋɔ ju, a be ban dɔ̃ɔ dii ba, na ba mɩ lɛ lɩɛb chen a Ayi tɩ kʋ a nɩbɛ ba jaa. 25,26 Josʋwa tur a wʋ pĩi lɔraa tor Ayi tẽe, na waa bin wʋ tẽe ɛ, tɩ tan a sɔ̃ɔ 'lↄ ban wa kʋ a nɩbɛ ba jaa. Ba kʋn a Ayi dↄↄr nɩ a pↄbↄ turo pie nɩ ayi (12,000) a daar 'lↄnↄ. 27 A Isɩral nɩbɛ pãa den a ba dʋn nɩ a ba bʋ̃tarsɩ ala ban jɛb fa nɩtãa a lɛ a Nãaŋmɩn na dɔ̃ɔ 'yɛr kʋ a Josʋwa.

28 Josʋwa chʋm a Ayi tẽe ka wʋ di. Wʋ chɛnɛ na kaara a lɛ wa tan a dɩna. 29 Wʋ yↄↄl a Ayi nãa tɩɛ ju tɩ tan a jãanʋɔr. A mɔ̃tɔ̃ɔ na wa mʋrɔ, ka a Josʋwa 'yɛr ka ba yↄↄ a wʋ ɩ̃gan tɩ lↄb bar a tẽe dɔ̃dɔr kpɛ̃ɛ par, tɩ na ba wob kʋsɩbɛ pɔɔ wʋ. Wʋ chɛnɛ na be be wa tan a dɩna.

30 Ka a Josʋwa mɛ bɔɔrlo jɛkpulo kʋ a Nãaŋmɩn 'lɔ na ɩ a Isɩral nɩbɛ Ŋmɩn a be a Ɛbal tɔ̃ɔ ju. 31 Wʋ mɛ wʋn nɩtãa a lɛ a Nãaŋmɩn tʋ̃tʋ̃nɔ Mosesɩ na dɔ̃ɔ 'yɛr kʋ a Isɩral nɩbɛ a wʋ yelbinaa pↄ ɩka, <<Ba de kʋsɩbɛ ban ba de kur ŋmãan ɛ, mɛn a bɔɔrlo jɛkpulo.>> Be lɛ ba ma chʋm a chʋm kʋ di loraa kʋ a Nãaŋmɩn, na ba mɩ lɛ waan a ba lɔ̃ɔ-taa loraa wa kʋ wʋ. 32 A be a Isɩral nɩbɛ niem lɛ a Josʋwa sɛb a Mosesɩ yelbinsɩ ala wʋn dɔ̃ɔ sɛb 'yɔ̃ɔ a kʋsɩbɛ pɔ. 33 A Isɩral nɩbɛ nɩ a ba nidierbe nɩ a ba nɩbɛrɛ nɩ a ba 'yɛr tɔɔrbɔ nɩ a sãan-buro na be a ba pɔ, ara naa a Nãaŋmɩn nɛbõ'yen daka lõbobo a jaa ayi na ba tor a lɛvi nɩbɛ bɔɔrlorobo bala na tuo a nɛbõ'yen daka. A nɩbɛ ŋmãa ara na lɩɛb a ba puor 'yɔ̃ɔ a Gɛrisim tɔ̃ɔ, ka a ŋmãa bala mɩ na chɛ lɩɛb a ba puor 'yɔ̃ɔ Ɛbal tɔ̃ɔ. A Nãaŋmɩn tʋ̃tʋ̃nɔ Mosesɩ dɔ̃ɔn kpãkpãan ba ɩka, ba maal a nɩtɔ̃ a sɔ̃ɔ wa ta ɩka ba de a bɩɛlfʋ.

34 Ka a Josʋwa pãa kar a yelbinsɩ a jaa lɔ̃ɔn a bɩɛlfʋ nɩ a pɔ'yɔ̃ɔfʋ nɩtãa a lɛ ban sɛb 'yɔ̃ɔ a yelbinsɩ gan pɔ. 35 Josʋwa kar a Mosesɩ yelbinsɩ kʋ a nɩbɛ ba jaa na lɔ̃ɔ, 'mãtãan pↄbↄ nɩ a bibiir nɩ a sãan-buro bala na pʋↄ ba.