1 A wɛr na wa chaar, Josʋwa nɩ a Isɩral nɩbɛ ba jaa dɔ̃ɔn na 'yirfʋ bibio yi be a ba jaa-jie a Sitim chen be a Jɔɔdan man pↄ tɩ jɛ̃ chɛlɛ a sɔ̃ɔ 'lɔ ban na wa gɔ̃ɔ. 2 A ber ata puor, a nidierbe kpɛn yɔ a nɩbɛ jaa-jie 3 tɩ 'yɛr kʋ ba ɩka, <<Yɩn wa nyɛ̃ a Nãaŋmɩn bↄↄrlorobo ka ba wa tuo a Nãaŋmɩn na ɩ a yɩ Ŋmɩn nɛbõ'yen daka, yɩ 'yir turo ba. 4 Yɩn ba bɔ̃ɔ a jie jũu, ban wiil yɩn a sɔr ka yɩ chen. Tɩchɛ yɩ taa wa gbʋrɔ a nɛbõ'yen daka ɛ, yɩ ara jãa wʋ gbɛɛ gãanfʋ tur.>>

5 Ka a Josʋwa 'yɛr kʋ a nɩbɛ ɩka, <<Yɩ chɔɔr yɩ mɩ̃ɛ chɛchɛ bojũu wɛr wa chaar, a Nãaŋmɩn na tʋ̃n nɛkõ-tʋ̃mɔ̃ a yɩ pɔ.>>

6 Ka a Josʋwa 'yɛr kʋ a Nãaŋmɩn bↄↄrlorobo ɩka, <<Yɩ de a Nãaŋmɩn nɛbõ'yen daka den a nɩbɛ nie.>> Ka ba maal nɩtãa a lɛ wʋn 'yɛr.

7 Ka a Nãaŋmɩn 'yɛr kʋ a Josʋwa ɩka, <<Dɩna, N na 'mɔɔ fʋ naa ka fʋ nyɛ̃ 'yɔ̃ɔfʋ a Isɩral nɩbɛ ba jaa niem, be lɛ ban bɔ̃ɔ ɩka N be naa a fʋ sɛ̃ nɩtãa a lɛ N na dɔ̃ɔ be a Mosesɩ sɛ̃. 8 'Yɛr kʋ a Nãaŋmɩn bↄↄrlorobo bala na tuo a nɛbõ'yen daka ɩka, bala wa ta a Jɔɔdan man kõkoor, yɩ kpɛ a man pɔ bɩlãa tɩ ara.>>

9 Ka a Josʋwa 'yɛr kʋ a Isɩral nɩbɛ ɩka, <<Yɩ wa chɛl a yɩ Ŋmɩn 'lɔ na ɩ a Nãaŋmɩn 'yɛr bie. 10 A nɩtɔ̃ lɛ yɩn bɔ̃ɔ ɩka a Ŋmɩn ben a yɩ sɛ̃, wʋn diin a Keena nɩbɛ nɩ a Heeti nɩbɛ nɩ a Hivi nɩbɛ nɩ a Perisi nɩbɛ nɩ a Gɛrɩgasɩ nɩbɛ nɩ a Amɔrɩ nɩbɛ nɩ a Jebusɩ nɩbɛ bar. 11 Yɩ nyɛ̃, a Nãaŋmɩn nɛbõ'yen daka na ɩ a wɛr wʋ jaa Ŋmɩn sofʋ na de yɩn nie tɩ gɔ̃ɔn a Jɔɔdan man. 12 A lɛ, 'yir dɔɔr pie nɩ ayi yin a Isɩral bʋrɔ pɔ, ka a daba jaa ma yɩ a bʋrɔ ɩ̃sʋɔ jaa pɔ. 13 A sɔ̃ɔ 'lɔ a bↄↄrlorobo bala na tuo a Ŋmɩn 'lɔ na ɩ a wɛr wʋ jaa Nãaŋmɩn nɛbõ'yen daka na wa kpɛ a kʋ̃ɔ pɔ, a Jɔɔdan man na ŋmãan kʋ lɛ joro ɛ, ka a kʋ̃ɔ na yire a tẽe kaal lɔ̃ɔ taar jibõ'yen.>>

14 A sɔ̃ɔ 'lɔ a Isɩral nɩbɛ na wa 'yir a ba jaa-jie na gɔ̃ɔ a Jɔɔdan man, a Nãaŋmɩn bɔɔrlorobo bala na tuo a nɛbõ'yen daka lɛ de ba a nie. 15 Kɔb bomo chɛfʋ sɔ̃ɔ jaa, a Jɔɔdan man ma paalaa. Tɩchɛ a Nãaŋmɩn bↄↄrlorobo bala na tuo a nɛbõ'yen daka gbɛɛ na wa sɩɩr a Jɔɔdan man kʋ̃ɔ, 16 ka a kɔ̃-sɛbɛ ŋmaa ba lɛ joro ɛ, na a kaal lɔ̃ɔ taa jibõ'yen gbĩgbĩn kaar a tẽe ban bʋɔlɔ Adama na gbʋr a Sarɩtan lõboor. A kʋ̃ɔ ŋmaa naa ba lɛ joro suro be a Nyaar mandal pɔ go ɛ, ka a nɩbɛ gɔ̃ɔ tor a Jɛrɩko. 17 A Nãaŋmɩn bↄↄrlorobo bala na tuo a Nãaŋmɩn nɛbõ'yen daka ara na a wɛr kõo pɔ a Jɔɔdan man sãlsↄↄ, tɩ tan a sɔ̃ɔ 'lɔ a nɩbɛ ba jaa na wa tu a wɛr kõo pɔ gɔ̃ɔ.