1 A Josʋwa pãa kor nyɔ̃ↄ. A Nãaŋmɩn 'yɛr kʋ wʋ ɩka, <<Fʋ kor nyɔ̃ↄ, tɩchɛ wɛɛ amine chɛnɛ na be be na sɛɛ defʋ, 2 a wɛr 'lɔ na chɛ na sɛɛ a defʋ lɛ anyã, a Filisiti nɩbɛ nɩ a Gɛsʋr nɩbɛ wɛr wʋ jaa, 3 an yi Sihɔn man na be a Ijipitɩ mɔ̃tɔ̃ɔ purfʋ jie tɩ ta a Ɛkʋrↄn wɛr sa-par dɩr jie, wʋ jaa ɩ naa a Keena nɩbɛ wɛr, (a Filisiti nɩbɛ nãmine anũu wɛɛ ala ban kaara lɛ anyãna, Gasa nɩ a Asɩdↄdɩ nɩ a Asɩkɩlↄn nɩ a Gafʋ nɩ a Ɛkʋrↄn nɩ a Avi nɩbɛ.) 4 A Keena nɩbɛ tẽn a jaa mɩ ben be, nɩ a Mɩɩra ('lↄ na ɩ a Sɩdonɩ nɩbɛ sofʋ) tɩ tan be a Afɛkɩ na ɩ a Amɔrɩ nɩbɛ tↄr-bɔɔ, 5 a Geba nɩbɛ wɛr, a Lɛbanↄn wʋ jaa tɩ tan be a mɔ̃tɔ̃ɔ purfʋ jie, yi be Baalgadɩ na be Hɛmↄn tɔ̃ↄ sa-par gʋba jie nɩ a Hamafʋ Paasɩ. 6 A anyã pʋɔ naa a Sɩdon nɩbɛ wɛɛ pɔ ban kpɩɛrɛ be a tɔ̃ɔ ju na be a Lɛbanↄn tɔ̃n ju nɩ a Mɩsɩrɛfɔfʋ Mayɩm chara pɔ. N na diin a nɩbɛ banyãna ba jaa bar a sɔ̃ɔ 'lɔ a Isɩral nɩbɛ na chiini. A sɛɛ naa ɩka fʋ põ a wɛr kʋ a Isɩral nɩbɛ nɩtãa a lɛ N na kpãkpãan fʋ. 7 A lɛ juu, pãa põ a wɛr nyã kʋ a bʋrsɩ pie for bir bala nɩ a Manaasɩ bʋrɔ nɩbɛ ŋmãa ka a ɩ a ba sofʋ.>>

8 A Nãaŋmɩn tʋ̃tʋ̃nɔ Mosesɩ dɔ̃ɔ de a wɛr 'lɔ na be a Jɔɔdan man mɔ̃tɔ̃ɔ purfʋ jie kʋ a Wuruben nɩbɛ bʋrɔ nɩ a Gaadɩ nɩbɛ bʋrɔ nɩ a Manaasɩ nɩbɛ bʋrɔ ŋmãa.

9 A ba wɛr chen tɩ ta a Aroya (be a Arnↄn baa kõkoor) nɩ a tẽe 'lↄ a baa sãlsↄↄ, pʋↄn a wɛr 'lɔ na gã ju na yi be a Mɛdiba tɩ tan be a Dibↄn. 10 Wʋ yin a be chen tɩ ta a Amↄn tↄr-bɔɔ pↄ 'mãtãan a tẽn ala a jaa a Amɔrɩ nɩbɛ nãa Sihↄn na kaara, 'lↄ lɛ dɔ̃ɔ jɛ̃ a Hɛsɩbↄn kaara a paal wʋ jaa. 11 Tɩ pʋↄn Giliyadɩ, a Gɛsʋr nɩ a Maaka paal, a Hɛmↄn tɔ̃ɔ wʋ jaa nɩ a Basan wʋ jaa tɩ tan be a Salɩka. 12 Wʋ tɩ pʋɔn a Ɔgi nãalʋ̃ʋ wʋ jaa, 'lɔ na ɩ a Wurɛfayim nãa na ɩ a nã-baaraa sʋↄ, 'lɔ lɛ dɔ̃ɔ kaara a Asiterↄfʋ nɩ a Edɩryɛl. Mosesɩ jɛb tʋ̃ɔ dii a nɩbɛ banyãna bar. 13 Tɩchɛ a Isɩral nɩbɛ ba dii a Gɛsʋr nɩ a Maaka nɩbɛ bar ɛ, ba chɛnɛ na kpɩɛrɛ a Isɩral.

14 Mosesɩ ba ŋmaa a wɛr jie jaa kʋ a Lɛvi bʋrɔ ɛ, nɩtãa lɛ a Nãaŋmɩn na dɔ̃ɔ 'yɛr kʋ a Mosesɩ. Bala lɛ sɛɛ ɩka ba so a kʋfʋ ala ban ma wa chʋm be a Nãaŋmɩn bɔɔrlo jɛkpulo ju kʋrɔ a Isɩral Ŋmɩn 'lɔ na ɩ a Nãaŋmɩn.

15 Mosesɩ den a wɛr jie ɩ̃sʋɔ kʋ a Wuruben bʋrɔ nɩbɛ ka wʋ ɩ a ba sofʋ.

16 A ba wɛr chen tɩ ta be a Aroya (be a Arnↄn baa kõkoor) nɩ a tẽe 'lↄ a baa sãlsↄↄ, pʋↄn a dondol ala na jil a Mɛdiba. 17 Wʋ tɩ pʋↄn a Hɛsɩbↄn nɩ a tẽn ala a jaa a dondol ju, Dibↄn nɩ a Bamↄfʋ Baal nɩ a Bɛfʋ Baalmɩyↄn nɩ a 18 Jahasɩ nɩ a Kɛdɛmↄfʋ nɩ a Mɛfaafʋ nɩ a 19 Kɩrɩyatayim nɩ a Sɩbɩma nɩ a Sɛrɛfʋ Sahar na be a baa dondol ju, 20 Bɛfʋpɩyɔ, a Pɩsɩga tɔ̃ↄ nɛʋ pɔ nɩ a Bɛfʋ Jɛsɩmɔfʋ. 21 Wʋ tɩ pʋↄn a tẽn ala a jaa na be a dondol ju, nɩ a Amɔrɩ nɩbɛ nãa Sihↄn nãalʋ̃ʋ wʋ jaa, 'lↄ na dɔ̃ɔ jɛ̃ a Hɛsɩbↄn tɩ kaara a paal wʋ jaa. Mosesɩ jɛb tʋ̃ↄ wʋ nɩ a bala na kaara a Mɩdiyen nɩbɛ, a Ɛvi nɩ a Wurakem nɩ a Sur nɩ a Hur nɩ a Wurɛba. A banyãna ba jaa kaan paalsɩ kʋ a nãa Sihↄn. 22 A bala a Isɩral nɩbɛ na dɔ̃ɔ kʋ, a Bɩyↄ bidaba Balam na ɩ a jɩbʋrɔ mɩ pʋↄ naa. 23 A Jɔɔdan man mɔ̃tɔ̃ɔ mʋrfʋ jie lɛ ɩ a Wuruben bʋrɔ tↄr-bɔɔ. A tẽn anyãna lɛ ba de kʋ a Wuruben bʋrɔ ka a ɩ a ba sofʋ.

24 Mosesɩ mɩ den a wɛr jie ɩ̃sʋɔ kʋ a Gaadɩ bʋrɔ ka wʋ ɩ a ba sofʋ.

25 A ba wɛr tɩ pʋɔn a Jasɩr nɩ a Giliyadɩ tẽbɛrɛ a jaa, 'mãtãan a Amↄn wɛr jie ɩ̃sʋɔ tɩ tan be a Aroya na be a Wuraba mɔ̃tɔ̃ɔ purfʋ jie, 26 a ba wɛr chen tɩ yi be a Hɛsɩbↄn tɩ tan Wuramↄfʋ Misipa nɩ a Bɛtonim, yi be a Mahanayim tɩ tan be a Lodɩbar tↄr-bɔɔ pↄ. 27 Be a Jɔɔdan baa pↄ, a tẽn anyãna lɛ pʋↄ, Bɛfʋ Haram nɩ a Bɛfʋnɩmɩra nɩ a Sukofʋ nɩ a Safon nɩ a nãa Sihɔn na be a Hɛsɩbↄn nãalʋ̃ʋ ala na chɛ. A Jɔɔdan man na be a ba mɔ̃tɔ̃ɔ mʋrfʋ jie lɛ ɩ a ba tↄr-bɔɔ chen tɩ tan a Galalii pon sa-par dɩr jie. 28 A anyãna lɛ dɔ̃ɔ ɩ a tẽbɛrɛ nɩ a tẽbil ala ban de kʋ a Gaadɩ bʋrɔ ka a ɩ a ba sofʋ.

29 Mosesɩ dɔ̃ɔ de a wɛr jie ɩ̃sʋɔ kʋ a Manaasɩ bʋrɔ bamine ka wʋ ɩ a ba sofʋ.

30 A ba wɛr chen tɩ ta be a Mahanayim, pʋɔn a Basan wʋ jaa, a Ɔgi nãalʋ̃ʋ wʋ jaa, a Basan nãa nɩ a tẽbil lɩjaata ala a jaa na be a Jaar tẽe pɔ a Basan paal pɔ. 31 Wʋ tɩ pʋↄn a Giliyadɩ ŋmãa, 'mãtãan Asiterↄfʋ nɩ Edɩryɛl na ɩ a Ɔgi nãalʋ̃ʋ pↄ tẽbɛrɛ na be a Basan. Ba den a anyãna a jaa kʋ a Makɩr na ɩ a Manaasɩ bidaba yɔnsuulsɩ ŋmãa.

32 Nɩtɔ̃ lɛ a Mosesɩ põ a wɛr 'lɔ be a Jɛrɩko mɔ̃tɔ̃ɔ mʋrfʋ jie nɩ a Jɔɔdan, a sɔ̃ↄ 'lↄ wʋn be a Mowab ji-chãa pↄ. 33 Tɩchɛ a Mosesɩ ba de a wɛr lõboor jie jaa kʋ a Lɛvi bʋrɔ ɛ. Wʋ 'yɛr kʋ ba ɩka, a ba difʋ jie lɛ a kʋfʋsɩ ala ban ma waan wa kʋ a Isɩral Ŋmɩn 'lɔ na ɩ a Nãaŋmɩn.