1 Josʋwa pãa tʋ̃n nɩjʋʋrbɔ ayi yin a ba jaa-jie a be a Sitim na wʋ 'yɛr ɩka ba tɩ jʋʋr a Keena wɛr, wa gar a jaa, a Jɛrɩko tẽe. Ban wa kpɛ a tẽe pɔ, ba chen tɩ gã pɔɔ sɛ̃sɛ̃nɛ kɔ̃ɔ ban bʋɔlɔ Wʋrahab yir.

2 Ka a Jɛrɩko nãa wa wõ ɩka, <<A Isɩral nɩbɛ bamine wan a tɩ̃sɔɔ nyãna ɩka ba wa jʋʋr a wɛr kaa.>> 3 Ka a nãa pãa tʋ̃ 'yɛr a Wʋrahab ɩka, <<A dɔɔr bala na wa a fʋ yir wan ɩka ba wa jʋʋr a wɛr wʋ jaa kaa, 'yir ba waan!>>

4-6 Ka a Wʋrahab 'yɛr ɩka, <<Dɔɔr bamine wan a n yir, tɩchɛ n ba bɔ̃ɔ a jie ban yi ɛ, ba yi naa a mɔ̃tɔ̃ɔ na wa mʋrɔ sɛrɛ ka ba wa pɔɔ a tẽe dɔ̃dɔr kpɛ̃ɛ. N ba bɔ̃ɔ a jie ban chiini ɛ, tɩchɛ yɩn pɔɔ yi tu ba, yɩn tɩ pɔɔ ba naa.>> A Wʋrahab pãa den a nɩjʋʋrbɔ ayi banyãna sɔɔl bar be a gar ju bɩɩr-daar pɔ. 7 Be lɛ a nãa nɩbɛ yi na ba bɩɛrɛ a nɩjʋʋrbɔ, ba tun a sɔr 'lɔ na ɩ a Jɔɔdan gɔ̃ɔfʋ jie. Ban wa yi baar, ba pɔɔn a tẽe dɔ̃dɔr kpɛ̃ɛ.

8 Sɛrɛ tɩchɛ ka a nɩjʋʋrbɔ na gã a tɩ̃sɔɔ 'lɔnɔ, Wʋrahab don be a gar ju na wʋ 9 tɩ 'yɛr kʋ ba ɩka, <<N bɔ̃ɔn na ɩka Nãaŋmɩn den a paal nyã kʋ yɩ, nɩrɛ jaa a paal pɔ pɩla ɔɔrɔ na a yɩ jũu. 10 Sɩ jaa wõn a lɛ a Nãaŋmɩn na vɛ̃ ka a man jɩɛ 'lɔ ko a yɩ niem a sɔ̃ɔ 'lɔ yɩn yi a Ijipitɩ paal pɔ. Na sɩ lɛ wõ a lɛ yɩn kʋ a Amɔrɩ nɩbɛ nãmine ayi na ɩ a Sihɔn nɩ a Ɔgi be a Jɔɔdan man mɔ̃tɔ̃ɔ purfʋ jie. 11 Dãbɩ̃ɛ kpɛ sɩ naa a sɔ̃ɔ 'lɔ sɩn wa wõ a lɛ, ka a lɛ vɛ̃ ka a sɩ ɩ̃gan sal a yɩ jũu. A yɩ Ŋmɩn 'lɔ na ɩ Nãaŋmɩn be naa a saaju nɩ a tẽe. 12 A lɛ jũu, yɩ pɔn a yɩ Nãaŋmɩn ɩka yɩn maal a n yir deme vɩla nɩtãa a lɛ n na maal yɩ a vɩla, yɩ wiil ma jɩ̃nɛ 'lɔ n na de sɔ̃ɔn a lɛ yɩn 'yɛrɛ. 13 Yɩ pol kʋ ma ɩka yɩn faan a n sãa nɩ a n mã, a n yɛdɔɔr nɩ a n yɛɛr nɩ a ba yir deme ba jaa. Yɩ ta vɛ̃ ka ba kʋ sɩ ɛ.>>

14 Ka a dɔɔr 'yɛr ɩka, <<A Ŋmɩn wʋ kʋ sɩ, sɩn ba wa tu a lɛ sɩn 'yɛr ɛ. Ala ɩ faa wa 'yɛr kʋ nɩrɛ jaa a lɛ sɩn waara ɩka sɩ wa tʋ̃ ɛ, sɩ pol kʋ fʋ ɩka, a Nãaŋmɩn wa de a paal nyã kʋ sɩ, sɩn maal yɩn vɩla.>>

15 Wʋrahab kpɩɛrɛ na a yir 'lɔ ban mɛ mar a tẽe dachin. Wʋ den miir 'yɔ̃ɔ a die tokoro pɔ ka ba tu a be suu chen. 16 Tɩ pãa 'yɛr kʋ ba ɩka, <<Yɩ chen a tẽn ala a tɔ̃ɔ ju, lɛ ba lɛ ɛ a nãa nɩbɛ na nyɛ̃ yɩ naa. Yɩ tɩ sɔɔl a be ber ata, bala wa lɩɛb wa baar, yɩn pãa tʋ̃ɔn chen.>>

17 Ka a dɔɔr 'yɛr kʋ wʋ ɩka, <<Sɩn tun a polfʋ 'lɔ fʋn vɛ̃ ka sɩ pol kʋ fʋ. 18 Nɩtɔ̃ lɛ a sɛɛ ɩka fʋ ɩ ala ɩ sɩ wa kpɛn jɛɛrɛ nɩ a fʋ paal. Lũ fɔ jɩɛ 'yɔ̃ɔ a tokoro 'lɔ pɔ fʋn vɛ̃ ka sɩ tu suu. Tara a fʋ sãa nɩ a fʋ mã, a fʋ yɛdɔɔr nɩ a fʋ sãa yir deme ba jaa waan a fʋ yir. 19 Ala ɩ ɩ̃sʋɔ jaa wa yi naa a fʋ yir na wʋ wa kpi, wʋ yõ yele lɛ. Tɩchɛ nɩrɛ 'lɔ jaa na be a fʋ yir pɔ wa nyɛ̃ yele na ɩ naa a sɩ yele. 20 Tɩchɛ, ala ɩ fʋ wa tɩ gar kʋ nɩrɛ jaa a lɛ sɩn waara ɩka sɩ wa ɩ, sɩ mɩ kʋ̃ tu a lɛ fʋn vɛ̃ ka a sɩ pol kʋ fʋ ɛ.>>

21 Ka wʋ sɔɔ de a lɛ ban 'yɛr tɩ vɛ̃ ka ba chen. Wʋ lũn a fɔ jɩɛ a sɔ̃ɔ 'lↄ ban wa chen baar 'yɔ̃ɔ a tokoro pɔ.

22 Ba tɩ sɔɔl be a tɔ̃ɔ ju. A nãa nɩbɛ yↄbɔ ban a tẽe lõbobo a jaa tɩ tan ber ata tɩ baa nyɛ̃ ba ɛ, ka ba lɩɛb wa a Jɛrɩko. 23 Ka a nɩjʋʋrbɔ ayi bala pãa lɩɛb suu a tɔ̃ɔ ju tɩ gɔ̃ɔ a man lɩɛb chen a Josʋwa sɛ̃. Ba 'yɛr kʋ a Josʋwa a bon 'lɔ jaa na ɩ. 24 Be lɛ ba 'yɛr kʋ wʋ ɩka, <<Sɩ bɔ̃ɔn ɩka a Nãaŋmɩn kʋ sɩn a paal wʋ jaa. Dãbɩ̃ɛ kpɛn a nɩbɛ ba jaa a tẽe pɔ a sɩ jũu.>>