Josʋwa 18

A Wɛr 'Lɔ Na Chɛ Ban Põ

1 A Isɩral nɩbɛ na wa jɛb de a wɛr wa baar, ba jaa lɔ̃ɔ taa be a Silo na ba maal a fɔbaa yir kʋ a Nãaŋmɩn. 2 A Isɩral bʋrsɩ ayopõi ben be ban ba kʋ a wɛɛ sɛrɛ ɛ.

3 Ka a Josʋwa pãa 'yɛr kʋ a Isɩral nɩbɛ, <<Sɔ̃ↄ buor lɛ yɩ bʋↄrↄ ɩka yɩ chɛl tɩ ta, sɛrɛ tɩ pãa tɩ de a wɛr 'lↄ a Nãaŋmɩn, na ɩ a yɩ sãakpãmine Ŋmɩn na kʋ yɩ? 4 Yɩ 'yir dↄↄr ata yin bʋrɔ jaa pↄ ka ba wa. N na vɛ̃n ka ba kpɛ a paal pↄ kaa a jiir ala ban na bʋↄrↄ 'yɔ̃ɔ jɩnɛ ka a ɩ a ba sofʋ. Bala wa ɩ a lɛ wa baar, ka ba lɛ lɩɛb wa a n sɛ̃. 5 N na põn a wɛr nyã jiir ayopõi kʋ ba, Juda bʋrɔ na ben a ba wɛr pↄ na be a sa-par gʋba jie, ka a Josefʋ bʋrɔ mɩ be a wʋ wɛr pↄ na ɩ a sa-par dɩr jie. 6 Yɩ Sɛb a põfʋ jiir ayopõi anyãna wa kʋ ma. Ka n pãa ŋme gbam sʋʋr a Nãaŋmɩn na ɩ a sɩ Ŋmɩn kaa kʋ yɩ. 7 Tɩchɛ a Lɛvi nɩbɛ kʋ nyɛ̃ a wɛɛ anyãna n na põ ɛ, bojũu a ba tʋ̃mɔ̃ lɛ ɩka ba ɩ a Nãaŋmɩn bↄↄrlorobo. Tɩchɛ Gaadɩ bʋrɔ nɩ a Wuruben bʋrɔ nɩ a Manaasɩ bʋrↄ bala na be a mɔ̃tɔ̃ɔ purfʋ jie dɔ̃ɔn nyɛ̃ a ba wɛɛ a Jɔɔdan mɔ̃tɔ̃ɔ purfʋ jie, be a Nãaŋmɩn tʋ̃tʋ̃nɔ Mosesɩ na dɔ̃ɔ de kʋ ba.>>

8 Ka a dↄↄr ata bala a Josefʋ na 'yir yin a bʋrsɩ pↄ pãa kpɛ a wɛr pↄ tɩ 'yir a jiir ala ban bʋↄrↄ 'yɔ̃ɔ jɩnɛ nɩtãa a lɛ a Josʋwa na tɩr a nɛɛ ɩka, <<Yɩ kpɛ a wɛr pↄ tɩ 'yir a jiir ala yɩn bʋↄrↄ 'yɔ̃ɔ jɩnɛ tɩ lɩɛb wa a n sɛ̃, ka n pãa ŋme gbam a ka a Silo sʋʋr a sɩ Nãaŋmɩn kaa kʋ yɩ.>> 9 Ka a dↄↄr bala kpɛ a wɛr wʋ jaa pãa sɛb wile a lɛ ban põ yaa a tẽn jiir ayopõi. Tɩ na ba lɩɛb wa a Josʋwa sɛ̃ be a Silo. 10 Ka a Josʋwa pãa ŋme a gbam sʋʋr a Nãaŋmɩn kaa kʋ ba, tɩ pãa põ a wɛr 'lↄ na chɛ kʋ a Isɩral bʋrsɩ bala na chɛ.

A Wɛr 'Lɔ Ban De Kʋ A Bɛnjamɩn Bʋrɔ

11 A Bɛnjamɩn bʋrɔ yie deme lɛ ɩ a nɩbɛ bala na de nie nyɛ̃ a wɛr ban põ. A ba wɛr gan a Juda bʋrɔ nɩ a Josefʋ bʋrɔ wɛr chara pↄ. 12 A Jɔɔdan wɛr lɛ ɩ a ba tↄraa a sa-par dɩr jie, na wʋ do tɩ tan be a nɛʋ na be a Jɛrɩko sa-par dɩr jie, ka a mɔ̃tɔ̃ɔ purfʋ jie mɩ yi be a tẽn ala na be a tɔ̃n ju tɩ tan be Bɛtavɛn dãlpʋɔ ju. 13 A ba tↄr-bɔɔ pãa yin be a nɛʋ na be a Luusɩ sa-par gʋba jie (ban bʋɔlɔ Bɛtɩl), na wʋ lɛ suu tɩ ta be a Atarↄfʋ Ada be a tɔ̃ↄ ju sa-par gʋba jie, na be a Bɛfʋ Hↄrↄn nɛʋ pɔ. 14 A ba tↄraa pãa lɛ tɩ tun jie ɩ̃sʋɔ, a sa-par gʋba jie na yi a mɔ̃tɔ̃ɔ mʋrfʋ jie na yi a tɔ̃ↄ ju chiini be a Kɩrɩyafʋ Baal (ban bʋɔlɔ Kɩrɩyafʋ Jɩrɩyam) na ɩ a Juda bʋrɔ sofʋ. Nyã lɛ dɔ̃ɔ ɩ a mɔ̃tɔ̃ɔ mʋrfʋ jie tɔraa. 15 A sa-par gʋba jie tↄr-bɔɔ yin be a Kɩrɩyafʋ Jɩrɩyam kõkoor tɩ tan be Nɛfɩtoya bul-yirsɩ pɔ. 16 Wʋ pãa lɛ suun a tɔ̃ↄ sɩɛ 'lↄ na tor a Hɩnↄm baa, be na ɩ a Wurɛfayim sa-par dɩr jie baa lõboor. Wʋ pãa lɛ chen a Hɩnↄm baa sa-par gʋba jie, a Jebusɩ nɩbɛ gbĩgbĩn sa-par gʋba jie, na tor a Ɛnɩrogɛl. 17 Wʋ pãa lɛ lɩɛb a sa-par dɩr jie tɩ yi Ɛnsɛmɛsɩ tɩ tan be Gɛlɩlↄfʋ, na tor Adʋmɩm Paasɩ gɔ̃ↄn lɛ a lɛ. A tↄraa lɛ yin a be tɩ suu be a Bohan kʋsɩr par, (A Bohan ɩ naa Wuruben bidaba) 18 na wʋ lɩɛb tɩ yi be a gbĩgbĩn na be a sa-par dɩr jie na tor a Jɔɔdan baa, pãa yi a be tɩ suu a baa pↄ, 19 na wʋ tuul a gbĩgbĩn na be a Bɛfʋ Hogɩla tɩ tɛɛ be a sa-par dɩr jie a be man nyaar pɔ, a jie 'lↄ a Jɔɔdan kʋ̃ↄ na joro tɩ kpɩɛrɛ. A nyã dɔ̃ɔ ɩ a sa-par gʋba jie tↄr-bɔɔ. 20 A Jɔɔdan man mɩ lɛ ɩ a mɔ̃tɔ̃ɔ purfʋ jie tↄraa. A lõbobo anyãna lɛ ɩ a Bɛnjamɩn nɩbɛ bʋrɔ wɛr tɔr-bɔɔ na ɩ a ba sofʋ.

21 A tẽbɛrɛ ala na ɩ a Bɛnjamɩn nɩbɛ bʋrɔ yie deme sofʋ lɛ, Jɛrɩko nɩ Bɛfʋ Hogɩla, nɩ Ɛmɛkɩ Kɩsɩsɩ nɩ 22 Bɛfʋ Araba nɩ Sɩmaruyam nɩ Bɛtɩl nɩ 23 Avim nɩ Para nɩ Ofɩra nɩ 24 Sɛfaramoni nɩ Ofini nɩ Geba, tẽbɛrɛ pie nɩ ayi 'mãtãan a tẽbil ala na jil ba. 25 A tẽn anyãna mɩ ben be, Gibiɔn nɩ Wurama nɩ Bɛɛrↄfʋ nɩ 26 Mɩsɩpa nɩ Chɛfɩra nɩ Mosa nɩ 27 Wurakem nɩ Irpiil nɩ Tarala nɩ 28 Sɩla nɩ Haelefʋ nɩ Jebusɩ 'lↄ ban bʋɔlɔ Jɛrusalɛm nɩ Gibɩya nɩ Kɩrɩyafʋ Jɩrɩyam, tẽbɛrɛ pie nɩ anaar, nɩ a tẽbil ala na jil ba. A wɛr nyã lɛ ɩ a Bɛnjamɩn bʋrɔ nɩbɛ yie deme sofʋ.