Josʋwa 19

A Wɛr 'Lɔ Ban De Kʋ A Sɩmɩ̃ɛ Bʋrɔ

1 A põfʋ gbɛɛ ayi sʋↄ lɛ ɩ a Sɩmɩ̃ɛ bʋrɔ nɩbɛ sofʋ. A ba wɛr tɩ kpɛ̃n a Juda bʋrɔ nɩbɛ wɛr pↄ. 2 A tẽn ala na pʋↄ lɛ a anyã, Bɛsɩba nɩ Sɩba nɩ Molada nɩ

3 Hasa Sʋwal nɩ Bala nɩ Ɛsɛm nɩ 4 Ɛltoladɩ nɩ Bɛtʋl nɩ Hↄrma nɩ 5 Sɩkɩlagɩ nɩ Bɛfʋ Markabↄfʋ nɩ Hasa Susa nɩ 6 Bɛfʋ Lɛbawʋfʋ nɩ Sɛruhɛn, tẽbɛrɛ pie nɩ ata nɩ a tẽbil ala na jil ba.

7 A tẽn anyãna mɩ ben be, Ayin nɩ Wurimↄn nɩ Ɛta nɩ Asan, tẽbɛrɛ anaar nɩ a tẽbil ala na jil ba. 8 A anyãna lɛ pʋↄ a tẽbil ala a jaa na jil a tẽbɛrɛ a jaa tɩ tan Balafʋ Bɛɛr, ban bʋɔlɔ Wurama na be a sa-par gʋba jie. Nyã lɛ ɩ a wɛr 'lↄ a Sɩmɩ̃ɛ bʋrɔ nɩbɛ yie deme na nyɛ̃ ka wʋ ɩ a ba sofʋ.

9 A Juda bʋrɔ nɩbɛ wɛr na bɛrma gar a lɛ ban bʋɔrɔ jũu, ala lɛ so ka ba ŋmaa a ba wɛr ŋmãa kʋ a Sɩmɩ̃ɛ bʋrɔ nɩbɛ.

A Wɛr 'Lɔ Ban De Kʋ A Sɛbulun

10 A põfʋ gbɛɛ ata sʋↄ lɛ ɩ a Sɛbulun bʋrɔ nɩbɛ yie deme sofʋ. A ba wɛr 'lↄ ban nyɛ̃ chen jaa tɩ ta be a Sarɩdɩ.

11 An yi a be, a ba tↄr-bɔɔ chen Marɛl na be a mɔ̃tɔ̃ɔ mʋrfʋ jie, be na gbʋr a Dabɛsɛfʋ nɩ a Jokɩnɩyam mɔ̃tɔ̃ɔ purfʋ jie kʋl-bile pɔ. 12 A Sarɩdɩ gɔ̃ↄ na ɩ a mɔ̃tɔ̃ɔ purfʋ jie chen tɩ nyↄↄn Chɩsɩlↄfʋ Tabↄr tↄraa, tɩ lɛ tɩ yin be Dabɛrafʋ tɩ don Jafɩya. 13 Wʋ chɛnɛ na choo yi a mɔ̃tɔ̃ɔ purfʋ jie tɩ ta be Gafʋ Hɛfa nɩ Ɛtɩkasɩn, na wʋ lɩɛb tor a Nɩya na be a Wurimↄn sↄr pↄ. 14 A sa-par dɩr jie, a tↄr-bɔɔ lɩɛb tor a Hanatↄn, tɩ tɛɛ a Ifɩtahɛl baa pↄ. 15 A tẽn anyãna pʋↄ naa, Katafʋ nɩ Nahalali nɩ Sɩmɩrↄn nɩ Idala nɩ Bɛtɩlɛhɛm, tẽbɛrɛ pie nɩ ayi nɩ a tẽbil ala na jil yaa.

16 A tẽbɛrɛ anyãna nɩ a ba tẽbil a jaa pʋↄ na ɩ a Sɛbulun bʋrɔ nɩbɛ yie deme sofʋ.

A Wɛr 'Lɔ Ban De Kʋ A Isaka

17 A põfʋ gbɛɛ anaar sʋↄ ɩ naa Isaka bʋrɔ nɩbɛ yie deme sofʋ. 18 A tẽn ala na ɩ a ba sofʋ lɛ a anyã, Jɛsɩrɛɛl nɩ Chɛsulↄfʋ nɩ Sunɛm nɩ

19 Hafarɩyam, nɩ Sɩyↄn nɩ Anaharafʋ nɩ 20 Wurabifʋ nɩ Kɩsɩyↄn nɩ Ɛbɛsɩ nɩ 21 Wuramↄfʋ nɩ Ɛnganɩm nɩ Ɛnada nɩ Bɛfʋ-pasɩsɩ. 22 A ba tↄr-bɔɔ mɩ tɩ nyↄↄn Tabↄr nɩ Sahasuma nɩ Bɛfʋ Sɛmɛsɩ tɩ tɛɛ be a Jɔɔdan man pↄ. A ɩ naa tẽbɛrɛ pie nɩ ayʋↄb nɩ a tẽbil ala na jil yaa.

23 A tẽbɛrɛ nɩ a tẽbil anyãna a jaa lɛ lɔ̃ↄ taa ɩ a Isaka bʋrɔ nɩbɛ yie deme sofʋ.

A Wɛr 'Lɔ Ban De Kʋ A Asa Bʋrɔ

24 A põfʋ gbɛɛ anũu sʋↄ lɛ ba kʋ a Asa bʋrɔ nɩbɛ yie deme. 25 A tẽn ala na ɩ a ba sofʋ lɛ a anyã, Hɛlkafʋ nɩ Hali nɩ Bɛtɩn nɩ Akɩsafʋ

26 Alam Mɛlɛkɩ nɩ Amadɩ nɩ Mɩsal. Kamɛl nɩ Sɩhↄ Libɩnafʋ na be a mɔ̃tɔ̃ɔ mʋrfʋ jie lɛ tɩ ɩ a ba tↄr-bɔɔ. 27 A mɔ̃tɔ̃ɔ purfʋ jie mɩ, a tↄr-bɔɔ tɩ yi naa Bɛtɩdagↄn, tɩ nyↄↄn a Sɛbulun nɩ a Ifɩtahɛl baa sa-par dɩr jie na be a Bɛtɩmɛkɩ nɩ Nɩyɛl sↄr pↄ. A sa-par dɩr jie chen tɩ yi, Kabʋl nɩ 28 Ɛbʋrↄn nɩ Wurɛhↄbɩ nɩ Hamↄn nɩ Kana tɩ tan be a Sɩdon. 29 A ba tↄraa lɩɛb tɩ yi Wurama, na wʋ tɩ ta tẽe 'lↄ na mɛ a dachin jil ban bʋɔlɔ Tayɩ, tɩ lɛ lɩɛb yi Hosa tɩ pãa tɛɛ a Mɛditɛrɛniya mandal. A tẽn anyã mɩ pʋↄ naa, Mahalabɩ nɩ Akɩsɩb nɩ 30 Uma nɩ Afɛkɩ nɩ Wurɛhↄbɩ, a tẽbɛrɛ lɩjɛr nɩ ayi nɩ a tẽbil ala na jil yaa.

31 A tẽbɛrɛ nɩ a tẽbil anyãna a jaa be naa a wɛr 'lɔ na ɩ a Asa bʋrɔ nɩbɛ yie deme sofʋ.

A Wɛr 'Lɔ Ban De Kʋ A Nafɩtalɩ Bʋrɔ

32 A põfʋ gbɛɛ ayʋↄb lɛ ɩ a Nafɩtalɩ bʋrɔ nɩbɛ yie deme sofʋ.

33 A ba tↄr-bɔɔ yin be a Hɛlɛfʋ tɩ tan be a tɩkpɛ̃ɛ 'lↄ na be a Saananim, tɩ lɛ tɩ ta be Adaminɛkɛbi nɩ Jamɩnɩya tɩ tan Lakum tɩ tɛɛ a Jɔɔdan man pↄ. 34 A be lɛ a tↄr-bɔɔ lɩɛb mɔ̃tɔ̃ɔ mʋrfʋ jie chen a Asɩɩnↄtɩ Tabↄr, tɩ pãa lɛ ara a be tɩ tan Hukoku, tɩ lan be a Sɛbulun be a sa-par gʋba jie na ɩ a bↄↄ, tɩ ka Asa bʋrɔ wɛr be a mɔ̃tɔ̃ɔ mʋrfʋ jie, tɩ ka a Jɔɔdan man mɩ be a mɔ̃tɔ̃ɔ purfʋ jie. 35 A tẽbɛrɛ ala ban mɛ dachine jil lɛ a anyã, Sɩdɩm nɩ Sɛr nɩ Hamafʋ nɩ Wurakafʋ nɩ Chɩnɛrɛfʋ nɩ 36 Adama nɩ Wurama nɩ Hasɔr nɩ 37 Kɛdɛsɩ nɩ Edɩryɛl nɩ Ɛnasↄ nɩ 38 Yɩrↄn nɩ Mɛgɩdalɛl nɩ Horɛm nɩ Bɛfʋanↄfʋ nɩ Bɛfʋ Sɛmɛsɩ, tẽbɛrɛ lɩjɛr for bir nɩ a tẽbil ala na jil yaa.

39 A tẽbɛrɛ nɩ a tẽbil anyãna lɛ ɩ a Nafɩtalɩ bʋrɔ nɩbɛ yie deme sofʋ.

A Wɛr 'Lɔ Ban De Kʋ A Dan Bʋrɔ

40 A põfʋ gbɛɛ ayopõi sʋↄ lɛ ba kʋ a Dan bʋrɔ nɩbɛ yie deme. 41 A ba paal tẽn lɛ a anyã, Sora nɩ Ɛsɩtayↄl nɩ Arɩsɩmɛsɩ nɩ

42 Saalbim nɩ Ayijalↄn nɩ Ɩtɩla nɩ 43 Ɛlↄn nɩ Tɩmɩna nɩ Ɛkʋrↄn nɩ 44 Ɛltɛkɩ nɩ Gibɛtↄn nɩ Balafʋ nɩ 45 Jɛhudɩ nɩ Bɛnɛbɛrakɩ nɩ Gafʋ Wurimↄn nɩ 46 Mɛjarkↄn nɩ Wurakↄn nɩ a paalsɩ ala na jil a Jopa.

47 A sɔ̃ↄ 'lↄ ban wa faa a Dan bʋrɔ nɩbɛ wɛr yin a ba nuur pↄ, ba tɩ jɛb tɩɛ Layɩsɩ tẽe. Na ba kʋ a nɩbɛ ba jaa tɩ faa a tẽe ka wʋ ɩ a ba sofʋ. Ba lɩɛb a yuor na ɩ a Layɩsɩ 'yɔ̃ɔ Dan na ɩ a ba sãakpã, na ba bʋɔlɔ wʋ a Dan.

48 A tẽbɛrɛ nɩ a tẽbil anyãna a jaa lɛ ɩ a Dan bʋrɔ nɩbɛ yie deme sofʋ.

A Wɛr Põ Baaraa

49 A sɔ̃ↄ 'lↄ a Isɩral nɩbɛ na wa põ a wɛɛ anyãna baar, ba den a lõboor ɩ̃sʋɔ kʋ a Josʋwa na ɩ a Nun bidaba, ka wʋ ɩ a wʋ sofʋ. 50 Nɩtãa lɛ a Nãaŋmɩn na dɔ̃ɔ kpãkpãan, ba kʋ wʋn a tẽe 'lↄ jaa wʋn wa kaa 'yir, Tɩmɩnafʋ Sera na be a Ɛfɩrem bʋrɔ tɔ̃ↄ paal pɔ, ka wʋ lɩɛb mɛ a tẽe na wʋ kpɩɛrɛ a be.

51 A Nãaŋmɩn bↄↄrloro Eliasa nɩ Josʋwa na ɩ a Nun bidaba nɩ a Isɩral bʋrsɩ nidierbe ŋmen gbam sʋʋr a Nãaŋmɩn kaa be a Silo, a be a Nãaŋmɩn fɔbaa lɔ̃ɔfʋ yir niem. A nɩtɔ̃ lɛ ba tu na ba põ a wɛr.