1 Ka a Josʋwa pãa bʋɔl a Wuruben bʋrɔ nɩ a Gaadɩ bʋrɔ nɩ a Manaasɩ bʋrɔ nɩbɛ bala na be a mɔ̃tɔ̃ɔ purfʋ jie lɔ̃ↄ taa. 2 Na wʋ 'yɛr kʋ ba ɩka, <<Yɩ maal naa a lɛ jaa a Nãaŋmɩn tʋ̃tʋ̃nɔ Mosesɩ na wiil ɩka yɩ maal, yɩ mɩ tu naa a n yelbinsɩ a jaa. 3 A sɔ̃ↄ nyã wʋ jaa, yaa tↄr a yɩ yɛɛr Isɩral nɩbɛ bar ɛ. Yɩ tʋ̃ↄn tu a Nãaŋmɩn na ɩ a yɩ Ŋmɩn yelbinsɩ a jaa. 4 Pʋ̃pãanyã, nɩtãa a lɛ wʋn pol kʋ yɩ, a Nãaŋmɩn na ɩ a yɩ Ŋmɩn kʋ naa a yɩ taaba Isɩral nɩbɛ ɩ̃gan 'maar. A lɛ jũu, yɩ lɩɛb kul a yɩ wɛr 'lↄ pↄ na ɩ a yɩ sofʋ, a wɛr 'lↄ na be a Jɔɔdan man mɔ̃tɔ̃ɔ purfʋ jie, be a Nãaŋmɩn tʋ̃tʋ̃nɔ Mosesɩ na kʋ yɩ. 5 Yɩ mɔ̃ tu a yelbinsɩ ala a Mosesɩ na kpãkpãan yɩ, yɩ nʋ̃ a Nãaŋmɩn na ɩ a yɩ Ŋmɩn, yɩ maala a wʋ bↄfʋ, yɩ turo a wʋ yelbinsɩ, yɩ tara yelmɩ̃ɛ kʋ wʋ, na yɩ tʋ̃nɔ kʋrɔ wʋ nɩ a yɩ nyãa nɩ a yɩ sɩɛ wʋ jaa.>>

6-8 Ka a Josʋwa 'yɛr nɛvɩla, tɩ vɛ̃ ka ba kul, na wʋ 'yɛr ɩka, <<Yɩ ben kulo a yɩ yie nɩ bʋ̃tarsɩ, a dʋ̃yɔɔ nɩ kpãna nɩ sɛlma nɩ kur-jɩɛ nɩ kur na tara tɔ̃nɔ nɩ bʋ̃sursɩ yɔɔ. Yɩ tɩ põn a yɩ yɛɛr a bonsɩ ala yɩn wa fa yin a yɩ dɔ̃dɔ̃mine sɛ̃.>> Ka ba pãa yi kulo a ba tẽe.

Mosesɩ dɔ̃ɔ de a Jɔɔdan man mɔ̃tɔ̃ɔ purfʋ jie kʋ a Manaasɩ bʋrɔ ŋmãa, tɩchɛ a bʋrɔ ŋmãa bala na chɛ, Josʋwa mɩ kʋ ba naa wɛr a be a Jɔɔdan mɔ̃tɔ̃ɔ mʋrfʋ jie 'mãtãan a bʋrsɩ bamine.

9 Tɩchɛ ka a Wuruben bʋrɔ nɩ Gaadɩ bʋrɔ nɩ a Manaasɩ bʋrɔ nɩbɛ bala na be a mɔ̃tɔ̃ɔ purfʋ jie lɩɛb kul a ba tẽe. Ba bar a Isɩral nɩbɛ bala na chɛ be a Silo na be a Keena wɛr pↄ tɩ yi chen a ba mɩ̃ɛ wɛr pↄ na be a Giliyadɩ wɛr pↄ nɩtãa a lɛ a Nãaŋmɩn na kpãkpãan ba tu a Mosesɩ sɛ̃.

10 A sɔ̃ↄ 'lↄ a Wuruben bʋrɔ nɩ a Gaadɩ bʋrɔ nɩ a Manaasɩ bʋrɔ nɩbɛ bala na be a mɔ̃tɔ̃ɔ purfʋ jie, na wa ta a Gɛlɩlↄfʋ na chɛnɛ ɩ a Jɔɔdan mɔ̃tɔ̃ɔ mʋrfʋ jie, ba mɛn a Nãaŋmɩn bɔɔrlo jɛkpulo na bɛrma gbʋr a man. 11 Ba wa 'yɛr kʋ a Isɩral nɩbɛ ɩka, <<Yɩ chɛlɛ! A Wuruben bʋrɔ nɩ a Gaadɩ bʋrɔ nɩ a Manaasɩ bʋrɔ nɩbɛ bala na be a mɔ̃tɔ̃ɔ purfʋ jie mɛn Nãaŋmɩn bↄↄrlo jɛkpulo be a Gɛlɩlↄfʋ, a Jɔɔdan lõboor na ɩ a sɩ gɔ̃ɔn!>> 12 A Isɩral nɩbɛ na wa wõ a nɩtɔ̃, a tẽe wʋ jaa 'yir lɔ̃ɔ taa be a Silo na tɩ jɛb a bʋrsɩ bala na be a mɔ̃tɔ̃ɔ purfʋ jie.

13 Ka Isɩral nɩbɛ pãa tʋ̃ Eliasa na ɩ a Nãaŋmɩn bↄↄrloro bidaba Fɩnɩhasɩ, a Wuruben bʋrɔ nɩ a Gaadɩ bʋrɔ nɩ a Manaasɩ bʋrɔ nɩbɛ bala na be a mɔ̃tɔ̃ɔ purfʋ jie a Giliyadɩ wɛr pↄ. 14 Dↄↄr pie na yi a bʋrsɩ pie pↄ na ɩ dɔ̃dɔr jaa nidier na be a mɔ̃tɔ̃ɔ mʋrfʋ jie lɔ̃ↄn chiin a Fɩnɩhasɩ.

15 Ba wan be a Giliyadɩ wɛr pɔ, a Wuruben bʋrɔ nɩ a Gaadɩ bʋrɔ nɩ a Manaasɩ bʋrɔ nɩbɛ bala na be a mɔ̃tɔ̃ɔ purfʋ jie sɛ̃, 16 wa ara kʋ a Nãaŋmɩn nɩbɛ tɩ 'yɛr kʋ ba ɩka, <<Bo lɛ so ka yɩ maal a yeldɛɛr nyã tɩɛ a Isɩral Ŋmɩn? Yɩ tɔr a Nãaŋmɩn nɛɛ tɩ na yɩ mɛ a bɔɔrlo jɛkpulo nyã kʋ a yɩ mɩn. Yaa lɛ chɛnɛ turo a Nãaŋmɩn ɛ. 17 Yɩ tɩɛr a sɩ yelbier 'lɔ be a Pɩyↄ, a lɛ a Nãaŋmɩn na dↄↄr a wʋ mɩ̃ɛ nɩbɛ ba jaa nɩ a baal dɛɛr. Sɩ chɛnɛ na be dire a pↄ dↄↄyɛ, a yelbier 'lↄ ba sɛɛ ɛ? 18 Yɩ bʋↄrↄ naa ɩka yɩ tↄr a wʋ tufʋ bɩɩ? Yɩn be tɔr a Nãaŋmɩn nɛɛ a dɩna, wʋn nyɛ̃n suur 'yɔ̃ɔ a Isɩral nɩbɛ ba jaa a bio. 19 A lɛ pʋ̃pãanyã, ala ɩ a yɩ wɛr ba sɛɛ ɩka yɩ puoro a Nãaŋmɩn ɛ, yɩ gɔ̃ɔ wa a Nãaŋmɩn wɛr pↄ, be a wʋ fɔbaa puorfʋ yir na be. Yɩ wa de a sɩ wɛr lõboor ɩ̃sʋɔ, tɩchɛ a ba sɛɛ ɩka yɩ tɔr a Nãaŋmɩn nɛɛ bɩɩ maal sɩ a sɩ mɩ tɔr a Nãaŋmɩn nɛɛ na sɩ lɛ mɛ a bɔɔrlo jɛkpulo ɩ̃sʋɔ lɛ pʋɔ a Nãaŋmɩn 'lɔ na ɩ a sɩ Ŋmɩn bɔɔrlo jɛkpulo pɔ ɛ. 20 Yɩ tɩɛr Sera bidaba Akan na tↄr a Nãaŋmɩn nɛɛ nɩ a bonsɩ ala an sɛɛ ɩka ba ta sɔ̃ↄ bar, a Isɩral nɩbɛ ba jaa nyɛ̃n a dↄↄrfʋ a lɛ jũu. Akan tɛɛ ba lɛ kpi a wʋ yelbier kũu ɛ.>>

21 Ka a Wuruben nɩ a Gaadɩ nɩ a Manaasɩ nɩbɛ bala na be a mɔ̃tɔ̃ɔ purfʋ jie pãa 'yɛr kʋ a bʋrɔ nɩbɛrɛ bala na yi a mɔ̃tɔ̃ɔ mʋrfʋ jie wa a ba sɛ̃ ɩka, 22 <<A Ŋmɩn lɛ ɩ a kpɛ̃ɔ sʋↄ! 'Lↄ lɛ ɩ a Nãaŋmɩn, a Ŋmɩn lɛ ɩ a kpɛ̃ɔ sʋↄ! 'Lↄ lɛ ɩ a Nãaŋmɩn! Wʋ bɔ̃ɔn a bon 'lↄ jũu sɩn ɩ a nɩtɔ̃, ka sɩ pãa mɩ bʋↄrↄ ɩka yɩ bɔ̃ↄ! Ala ɩ sɩ tɔraa na saa tu a Nãaŋmɩn nɛɛ ɛ, yɩ ta bar sɩ a sɩ chɛnɛ vʋrɔ ɛ! 23 Ala ɩ sɩ tↄr a Nãaŋmɩn nɛɛ tɩ mɩ mɛ sɩ mɩ̃ɛ bↄↄrlo jɛkpulo, na sɩ ma chʋm a sɩ lorsɩ bɩɩ a sɩ bʋ̃bie lorsɩ bɩɩ a sɩ lɔ̃ɔ-taa lorsɩ, a Nãaŋmɩn mɩ̃ɛ wʋ wa dↄↄr sɩ. 24 Kai! Sɩ ɩ naa a lɛ bojũu, sɩ joro na dãbɩ̃ɛ ɩka sɔ̃ↄ kɔ̃ↄ na wa ta na, a yɩ yɔnsuulsɩ na 'yɛr kʋ a sɩ yɔnsuulsɩ ɩka, <Bo guortaa lɛ a yɩn nɩ a Nãaŋmɩn na ɩ a Isɩral nɩbɛ Ŋmɩn tara? 25 Wʋ vɛ̃n ka a Jɔɔdan man ɩ tɔr-bɔɔ gã a sɩn nɩ a yɩn Wuruben bʋrɔ nɩ a Gaadɩ bʋrɔ nɩbɛ chara pɔ. Yɩn nɩ a Nãaŋmɩn ba tara guortaa jaa ɛ.> Amine a yɩ yɔnsuulsɩ na wa vɛ̃n ka a sɩ yɔnsuulsɩ bar a Nãaŋmɩn puorfʋ. 26 A lɛ jũu lɛ sɩ mɛn a bɔɔrlo jɛkpulo na ba ɩ a jie 'lↄ sɩn na chʋm a bↄↄrlo bomo bɩɩ lorsɩ ɛ, 27 tɩchɛ, ka a na ɩ jɩ̃nɛ kʋ sɩn nɩ a yɩ nɩbɛ nɩ a dɔɔ tutaa bala nɩ na wa ɩka sɩrɛ jaa, sɩ ma puor a Nãaŋmɩn a wʋ jichɛchɛ niem nɩ a sɩ lorsɩ sɩn na chʋm, nɩ a sɩ bↄↄrlo bomo nɩ a sɩ lɔ̃ɔ-taa lorsɩ. Sɩ ɩ naa a nɩtɔ̃ ka a yɩ yɔnsuulsɩ taa wa yɛr kʋ a sɩ yɔnsuulsɩ ɩka, saa tara guortaa nɩ a Nãaŋmɩn ɛ. 28 A sɩ tɩɛr lɛ ɩka, ala ɩ a nɩtɔ̃ wa ɩ naa, a sɩ yɔnsuulsɩ na wa 'yɛr ɩka, <Yɩ kaa, a sɩ sãakpãmine mɛn bɔɔrlo jɛkpulo na nyɛ̃taan a Nãaŋmɩn bɔɔrlo jɛkpulo. Waa dɔ̃ɔ ɩ bↄↄrlo bomo chʋmfʋ jie bɩɩ lorsɩ jie lɛ ɛ, tɩchɛ wʋ ɩ naa jɩ̃nɛ kʋ a sɩn nɩ a yɩ nɩbɛ.> 29 Sɩ kʋ wa tɔr a Nãaŋmɩn nɛɛ bɩɩ tɔr a wʋ tufʋ a pʋ̃pãanyã tɩ na sɩ mɛ bɔɔrlo jɛkpulo na sɩ ma chʋm lorsɩ bɩɩ bʋ̃bie lorsɩ bɩɩ bɔɔrlo bomo ɛ. Sɩ kʋ mɛ bɔɔrlo jɛkpul yuo jaa ka a ba ɩ Nãaŋmɩn na ɩ a sɩ Ŋmɩn bɔɔrlo jɛkpulo na ara a wʋ fɔbaa puorfʋ yir niem ɛ.>>

30 A Nãaŋmɩn bↄↄrloro Fɩnɩhasɩ nɩ a nidierbe pie bala na yi a tẽe pↄ na ɩ a bʋrɔ jaa nidier na yi a mɔ̃tɔ̃ɔ mʋrfʋ jie wõn a lɛ a Wuruben bʋrɔ nɩ a Gaadɩ bʋrɔ nɩ a Manaasɩ bʋrɔ nɩbɛ bala na be a mɔ̃tɔ̃ɔ purfʋ jie na 'yɛr, ka a ba pʋɔ pɛl. 31 A Nãaŋmɩn bↄↄrloro Fɩnɩhasɩ na ɩ a Eliasa bidaba 'yɛr kʋ ba ɩka, <<Pʋ̃pãanyã lɛ sɩ bɔ̃ↄ ɩka a Nãaŋmɩn ben a sɩ sɛ̃, yaa tɔr a wʋ nɛɛ ɛ, a lɛ jũu yɩ faan a Isɩral nɩbɛ yin a Nãaŋmɩn dↄↄrfʋ pↄ.>>

32 Ka a Fɩnɩhasɩ nɩ a nɩbɛrɛ pãa bar a Wuruben bʋrɔ nɩ Gaadɩ bʋrɔ be a Giliyadɩ tɩ lɩɛb chen be a Keena a Isɩral nɩbɛ pↄ tɩ man ba a lɛ na ɩ. 33 Ka a Isɩral nɩbɛ pʋɔ pɛl nɩ a lɛ ban wõ ka ba dãna a Ŋmɩn. Baa lɛ 'yɛrɛ ɩka ban tɩ jɛb sɔ̃ↄ a jie 'lↄ a Wuruben bʋrɔ nɩ a Gaadɩ bʋrɔ nɩbɛ na kpɩɛrɛ ɛ.

34 Ka a Wuruben bʋrɔ nɩ a Gaadɩ bʋrɔ nɩbɛ 'yɛr ɩka, <<A bɔɔrlo jɛkpulo nyã ɩ naa dãasɩɛ ɩka, a Ŋmɩn ɩ naa Nãaŋmɩn.>> Ka ba pãa bʋɔlɔ a jie, <<Dãasɩɛ*.>>