1 Nɩtɔ̃nɔ lɛ ba põ a Keena wɛr 'lↄ na be a Jɔɔdan mɔ̃tɔ̃ɔ mʋrfʋ jie kʋ a Isɩral nɩbɛ. Eliasa na ɩ a Nãaŋmɩn bɔɔrloro nɩ a Nun bidaba Josʋwa nɩ a Isɩral nɩbɛ bʋrsɩ yie nidierbe põn kʋ a nɩbɛ. 2 Nɩtãa lɛ a Nãaŋmɩn na kpãkpãan a Mosesɩ, a bʋrsɩ pie for bir nɩ a ŋmãa bala na be a Jɔɔdan mɔ̃tɔ̃ɔ mʋrfʋ jie ŋmen gbam na ba põn a wɛr. 3,4 Mosesɩ dɔ̃ɔn de nie de a Jɔɔdan mɔ̃tɔ̃ɔ purfʋ jie wɛr kʋ a bʋrɔ ayi nɩ a ŋmãa bala. (A Josefʋ yↄn par ŋman bʋrsɩ ayi, a Manaasɩ nɩ a Ɛfɩrem.) Tɩchɛ a Mosesɩ ba kʋ a Lɛvi nɩbɛ wɛr jie jaa ɛ. Tɩchɛ ba nyɛ̃n tẽbɛrɛ nɩ wɛɛ na ba kpɩɛrɛ tɩ kaara a ba dʋn. 5 A Isɩral nɩbɛ põn a wɛr nɩtãa a lɛ a Nãaŋmɩn na kpãkpãan a Mosesɩ.

6 Daar kɔ̃ɔ lɛ a nɩbɛ bamine yi a Juda bʋrɔ pɔ wa a Josʋwa sɛ̃ be a Gilgal. A ba ɩ̃sʋɔ yuor na di Kaleb na ɩ a Jɛfʋnɛ bidaba na ɩ a Kenɩsɩ nɩrɛ wa 'yɛr kʋ wʋ ɩka, <<Fʋ bɔ̃ɔn a bon 'lↄ a Nãaŋmɩn na 'yɛr a be a Kadɛsɩ Barnɩya, yin a fʋ̃ʋ nɩ a maa pↄ kʋ a Mosesɩ na ɩ a Ŋmɩn tʋ̃tʋ̃nɔ. 7 Yuomo lɩjaayi lɛ n nyɛ̃ a sɔ̃ↄ 'lↄ a Nãaŋmɩn tʋ̃tʋ̃nɔ Mosesɩ na tʋ̃ ma yin be a Kadɛsɩ Barnɩya ɩka n wa jʋʋr a tẽe nyãna kaa. N lɩɛb wa man wʋ a lɛ jaa n na tɩ nyɛ̃. 8 A dↄↄr bala na lɔ̃ↄ chiin ma, maal ka dãbɩ̃ɛ kpɛ a sɩ nɩbɛ. Tɩchɛ maa 'lɔ tun a Nãaŋmɩn na ɩ a n Ŋmɩn nɛɛ sɩrɛ jaa. 9 A lɛ jũu, Mosesɩ pol kʋ ma ɩka, <Maa nɩ a n bibiir na kpɛn a wɛr 'lɔ pɔ a n gbɛr na nɛb ka wʋ ɩ a sɩ sofʋ.> 10 Tɩchɛ pʋ̃pãanyã kaa, a tan yuomo lɩjaayi nɩ anũu a Nãaŋmɩn na 'yɛr a lɛ kʋ a Mosesɩ. A sɔ̃ↄ 'lↄ lɛ a Isɩral nɩbɛ be a dãlpʋɔ ju chiini, nɩtãa a lɛ Nãaŋmɩn na pol kʋ ma, na wʋ chɛnɛ kʋ ma nyɛvʋr wa tan a dɩna. Kaa ma, n ben nyɛ̃ yuomo lɩjaa naar nɩ anũu! 11 tɩ chɛnɛ kpɛ̃mɛ a dɩna nɩtãa a sɔ̃ↄ 'lↄ a Mosesɩ na tʋ̃ ma. N chɛnɛ na kpɛ̃mɛ na tʋ̃ↄ jɛb jɛɛr, bɩɩ na n tʋ̃ↄ maal bon jaa. 12 Pʋ̃pãanyã, kʋ ma a tɔ̃n paal 'lↄ a Nãaŋmɩn na pol kʋ ma a bibir 'lↄ a maa nɩ a n nɩbɛ na wa man fʋ. Sɩ 'yɛr kʋ fʋ ɩka, a kpɩ̃ɛn deme bala ban bʋɔlɔ a Anakɩm ben a tẽbɛrɛ ala na mɛ jil pↄ. Amine a Nãaŋmɩn na ben a n sɛ̃, ka n na tʋ̃ↄ dii ba nɩtãa lɛ a Nãaŋmɩn na 'yɛr.>>

13 Ka a Josʋwa 'yɛr nɛvɩla 'yɔ̃ɔ a Kaleb na ɩ a Jɛfʋnɛ bidaba tɩ kʋ wʋ a Hɛbʋrↄn tẽkpɛ̃ɛ ka wʋ ɩ a wʋ sofʋ. 14 A Hɛbʋrↄn chɛnɛ na ɩ a Kaleb na ɩ a Jɛfʋnɛ bidaba na yi a Kenɩsɩ yↄn sofʋ, bojũu wʋ tu naa a Nãaŋmɩn na ɩ a Isɩral Ŋmɩn nɛɛ sɩrɛ jaa. 15 Sɛrɛ ka a nɩtɔ̃ wa ɩ, ba dɔ̃ɔn bʋɔlɔ a Hɛbʋrↄn Arba tẽe. (Arba lɛ dɔ̃ɔ ɩ a Anakɩm gãdakpil.)

Be lɛ ka ɩ̃gan 'maar pãa be a tẽe pↄ.