1 A wɛr lõboor ɩ̃sʋɔ na be a Jɔɔdan mɔ̃tɔ̃ɔ mʋrfʋ jie lɛ ba de kʋ a Josefʋ bida-kpɛ̃ɛ Manaasɩ yɔnsuulsɩ sofʋ. Makɩr na ɩ a Giliyadɩ sãa ɩ naa a Manaasɩ bida-kpɛ̃ɛ na ɩ a jɛjɛ-kpɩl, lɛ mɩ lɛ a Giliyadɩ nɩ a Basan na be a Jɔɔdan wɛr mɔ̃tɔ̃ɔ purfʋ jie mɩ ɩ a wʋ sofʋ. 2 A Jɔɔdan wɛr mɔ̃tɔ̃ɔ mʋrfʋ jie mɩ lɛ ba de kʋ a Manaasɩ yie deme banyãna na chɛ, Abiesa nɩ Hɛlɛkɩ nɩ Asɩrɛl nɩ Sɛchɛm nɩ Hɛfa nɩ Sɛmɩda. A Manaasɩ na ɩ a Josefʋ bidaba yɔnsuulsɩ lɛ a banyãna na ɩ a dɔɔr na ɩ a yie nɩbɛrɛ.

3 Manaasɩ bidaba lɛ a Makɩr ka a Makɩr mɩ ɩ Giliyadɩ bidaba ka Giliyadɩ bidaba mɩ ɩ Hɛfa ka a Hɛfa mɩ dɔɔ Sɛlofɛhadɩ. Tɩchɛ Sɛlofɛhadɩ ba tara dabil ɛ, pↄↄbil tɛɛ lɛ wʋ tara. A ba yoe lɛ a anyãna, Maala nɩ Nowa nɩ Hogɩla nɩ Mɩlka nɩ Tɩrsa. 4 Be lɛ ba chen a Eliasa na ɩ a Nãaŋmɩn bↄↄrloro nɩ a Josʋwa na ɩ a Nun bidaba nɩ a nidierbe sɛ̃ tɩ 'yɛr ɩka, <<A Nãaŋmɩn kpãkpãan a Mosesɩ ɩka wʋ kʋ sɩn nɩ a sɩ yɛɛr bala na ɩ a dɔɔr a wɛr jie ɩ̃sʋɔ ka wʋ ɩ a sɩ sofʋ.>> Nɩtãa lɛ a Nãaŋmɩn na kpãkpãan, ba den a wɛr lõboor ɩ̃sʋɔ kʋ a bala nɩ a ba yɛɛr bala na ɩ a dɔɔr ka wʋ ɩ a ba sofʋ. 5 Ala lɛ so ka a Manaasɩ nyɛ̃ a wɛr ban põ jiir pie lɛ pʋↄn a Giliyadɩ nɩ a Basan be a Jɔɔdan mɔ̃tɔ̃ɔ purfʋ jie, 6 bojũu, a wʋ yɔnsuulsɩ na ɩ a pↄↄbil nɩ a ba yɛɛr bala na ɩ a dɔɔr nyɛ̃n a wɛr ka wʋ ɩ a ba sofʋ. Ba den a Giliyadɩ wɛr kʋ a Manaasɩ yɔnsuulsɩ bala na chɛ ka wʋ ɩ a ba sofʋ.

7 A Manaasɩ paal yin be a Asa tɩ tan be a Mɩkɩmɛtafʋ na be a Sɛkɛm mɔ̃tɔ̃ɔ purfʋ jie. A tↄr-bɔɔ chen a sa-par gʋba jie lõboor tɩ den a be a Ɛntapʋya nɩbɛ na be. 8 A wɛr 'lↄ na jil a Tapʋya ɩ naa a Manaasɩ sofʋ, tɩchɛ a Tapʋya tẽe 'lↄ na be a tↄraa pↄ mɩ ɩ a Ɛfɩrem yɔnsuulsɩ sofʋ. 9 A tↄraa pãa yin a be tɩ suu a Kana kʋl-bile pↄ. A tẽbɛrɛ ala na be a kʋl-bile sa-par gʋba jie ɩ naa a Ɛfɩrem sofʋ, an sↄↄ be a Manaasɩ wɛr pↄ. A Manaasɩ wɛr tↄraa lɛ yin be a kʋl-bile sa-par dɩr jie tɩ tan be Mɛditɛrɛniya mandal pↄ. 10 Ɛfɩrem ben a sa-par gʋba jie, tɩchɛ ka a Manaasɩ be a sa-par dɩr jie tɩ ka a Mɛditɛrɛniya mandal ɩ a ba mɔ̃tɔ̃ɔ mʋrfʋ jie tɔraa.

11 Isaka nɩ a Asa wɛr pↄ, Bɛfʋ San nɩ Ibɩliyɛm nɩ a tẽbil ala a jaa a ba lõbobo pɔ ɩ naa a Manaasɩ sofʋ, tɩ den a Dↄr (a 'lɔ na be a man nɛɛ), Ɛndↄr nɩ Tanakɩ nɩ Mɛgɩdo nɩ a tẽbil ala na jil ba.

12 A Manaasɩ nɩbɛ ba tʋ̃ↄ dii a nɩbɛ bala na kpɩɛrɛ a tẽbɛrɛ ala pↄ ɛ, a lɛ jũu, ka a Keena nɩbɛ pãa chɛnɛ kpɩɛrɛ a be. 13 A sɔ̃ↄ 'lↄ gba a Isɩral na wa kpɛ̃mɛ, tɩchɛ baa dii a Keena nɩbɛ ba jaa bar ɛ, tɩchɛ bama fɩrɛ ban ka ba tʋ̃nɔ kʋrↄ ba.

14 Ka a Josefʋ yɔnsuulsɩ pãa 'yɛr kʋ a Josʋwa ɩka, <<Bo lɛ so ka fʋ kʋ sɩ a wɛr lõboor bõ'yen tɛɛ ka wʋ ɩ a sɩ sofʋ?>> Sɩ waan yↄↄ jaa bojũu a Nãaŋmɩn bɩɛl sɩ naa.

15 Ka a Josʋwa 'yɛr sɔɔ ba ɩka, <<Ala ɩ yɩ ɩn yↄↄ jaa, ka a Ɛfɩrem paalsɩ ala na be a tɔ̃n ju ɩ pʋʋr kʋ yɩ, yɩ kpɛ a mɔ̃gɔ̃ɔ be a Perisi nɩbɛ nɩ a Wurɛfayim wɛr pɔ tɩ chɔɔr jie kʋ a yɩ mɩn.>>

16 Ka ba 'yɛr sɔɔ wʋ ɩka, <<A tɔ̃ɔ ju paal nyã ɩ naa pʋʋr kʋ sɩ, tɩchɛ a Keena nɩbɛ na be a ji-chãa pↄ tara naa wiir kur torokosɩ, a bala na be a Bɛfʋ San nɩ a tẽn ala a wʋ lõboor nɩ a bala na be a Jɛsɩrɛɛl baa pↄ.>>

17 Ka a Josʋwa 'yɛr kʋ a Ɛfɩrem nɩ a Manaasɩ par nɩbɛ bala na kpɩɛrɛ a mɔ̃tɔ̃ɔ mʋrfʋ jie, <<Sɩrɛ jaa yɩ waa naa, na yɩ mɩ kpɛ̃mɛ. A sɛɛ naa ɩka yɩ nyɛ̃ a wɛr gar a lɛ. 18 A wɛr 'lↄ a tɔ̃ↄ ju na ɩ naa a yɩ sofʋ. Wʋn sↄↄ ɩ a mɔ̃gɔ̃ɔ pↄ, tɩchɛ yɩ chↄↄr wʋ ka wʋ ɩ a yɩ sofʋ yin a lõbobo a jaa. A Keena nɩbɛ 'lↄ, yɩn dii ban bar, ban sↄↄ tara a wiir kur torokosɩ nɩ a nɩkpɩ̃ɛn.>>