1 A Isɩral nɩbɛ tↄr a Nãaŋmɩn nɛɛ wʋn tɩr ɩka ba taa diere bon jaa na sɛɛ ɩka ba sɔ̃ɔ bar be a Jɛrɩko ɛ. Tɩchɛ daba kɔ̃ɔ yuor ban bʋɔlɔ Ekan lɛ tɔr a Nãaŋmɩn nɛɛ, a lɛ vɛ̃ naa ka a Nãaŋmɩn suur 'yir a Isɩral nɩbɛ. (Ekan na ɩ Karmɩ bidaba na ɩ Sabdi yɔ̃ɔ na yi a Sera dɔ̃dɔr pɔ, na ɩ a Juda bʋrɔ.)

2 Be lɛ a Josʋwa tʋ̃ a wʋ dↄↄr bamine yin be a Jɛrɩko, ka ba chen a Ayi, a tẽe na be a Bɛtɩl mɔ̃tɔ̃ɔ purfʋ jie na gbʋr a Bɛtavɛn ɩka, <<Yɩ tɩ jʋʋr a paal kaa.>> Ba chen tɩ jʋʋr a Ayi wɛr kaa.

3 A sɔ̃ɔ 'lɔ ban wa lɩɛb wa a Josʋwa sɛ̃, ba 'yɛr kʋ wʋ ɩka, <<A ba sɛɛ ɩka a jɛjɛɛrbɛ ba jaa ba chen tɩ jɛb a Ayi nɩbɛ ɛ. 'Yir jɛjɛɛrbɛ turo ayi bɩɩ turo ata tɛɛ ka ba tɩ jɛb ba, ta vɛ̃ ka a jɛjɛɛrbɛ ba jaa chen tɩ jɛb ba ɛ, bojũu a tẽe ba bɛr ma ɛ.>> 4 Ka a Isɩral nɩbɛ jɛjɛɛrbɛ turo ata chen na tɩ jɛb ba, tɩchɛ ka a ba dɔ̃dɔ̃mine tʋ̃ↄ ba a ba lɩɛb jo. 5 A Ayi dↄↄr dii ban yin be a tẽe dɔ̃dɔr nɛɛ, tɩ tan a kʋsɩbɛ ŋmɛrfʋ jie, tɩchɛ ka ba kʋ nɩbɛ lɩjɛr nɩ pie nɩ ayʋↄb be a tɔ̃ɔ par. Ka a Isɩral nɩbɛ ɩ̃gama pãa chʋɔr ka a dãbɩ̃ɛ kpɛ ba.

6 Josʋwa nɩ a Isɩral nɩbɛrɛ tↄↄ naa a ba bosusɩ chɩɛr nɩ pʋsɔ̃ɔ, na ba gãn be a Nãaŋmɩn nɛbõ'yen daka niem, ba gãn a be tɩ tan a mɔ̃tɔ̃ɔ na wa mʋr, na ba ɔ̃ɔ tan 'yɔ̃ɔ a ba jur pɔ wile a ba nɩbaal. 7 Ka a Josʋwa 'yɛr ɩka, <<N Ŋmɩn na ɩ a Nãaŋmɩn, bo lɛ vɛ̃ ka fʋ gɔ̃ɔn sɩ a Jɔɔdan man de sɩ wa kʋ a Amɔrɩ nɩbɛ ɩka ba sɔ̃ɔ sɩ bar? Bo lɛ so ka faa vɛ̃ ka sɩ kpɩɛrɛ be a Jɔɔdan man gɔ̃ɔn ɛ? 8 Nãaŋmɩn, bo lɛ n na lɛ 'yɛr, a pʋ̃pãanyã a Isɩral nɩbɛ dɔ̃dɔ̃mine na ben tʋ̃ↄ ba? 9 A keena nɩbɛ nɩ a nɩbɛ ba jaa na be a paal 'lɔ pɔ na wõn a yele nyã, na ba ŋmaa jil sɩ na ba kʋ sɩ jaa. Bo lɛ fʋn pãa ɩ ka ba 'yɔ̃ɔnɔ a fʋ yuor?>>

10 Ka a Nãaŋmɩn 'yɛr kʋ a Josʋwa ɩka, <<'Yir! bo lɛ so fʋn gã a tẽe a lɛ? 11 A Isɩral nɩbɛ maal dɛɛr! Ba tɔr a nɛbõ'yen 'lɔ N na ɩn ba. Ba den a bonsɩ ala amine an sɛɛ ɩka ba ta sɔ̃ɔ bar. Ba jun amine, na ba ŋma jie, na ba maal yaa ka a ɩ a ba bonsɩ. 12 Ala lɛ so ka a Isɩral nɩbɛ ba tʋ̃ɔ jɛb a ba dɔ̃dɔ̃mine ɛ. A ba dɔ̃dɔ̃mine dii ba naa a ba jo bojũu a ba mɩ̃ɛ sɛɛn sɔ̃ɔ bar fʋ. N kʋ lɛ be yɩ sɛ̃ go ɛ, tɩ tan a sɔ̃ↄ 'lↄ yɩn na wa sɔ̃ɔ a bomo ala N na 'yɛr kʋ yɩ ɩka yɩ taa wa diere ɛ. 13 'Yir! chↄↄr a nɩbɛ na fʋ vɛ̃ ka ba wa a N niem. 'Yɛr kʋ ba ka ba chↄↄr gu ma a bio bojũu, a maa na ɩ a Isɩral Ŋmɩn 'lɔ na ɩ a Nãaŋmɩn tara naa 'yɛr na 'yɛr kʋ yɩ, <Isɩral, yɩ tara naa bonsɩ amine N na 'yɛr ɩka yɩ sɔ̃ɔ bar a yɩ pↄ. Yɩn kʋ tʋ̃ɔ jɛb a yɩ dɔ̃dɔ̃mine ka yɩn baa wa de a bonsɩ ala sɔ̃ɔ bar ɛ.> 14 A lɛ juu, 'yɛr kʋ ba, wɛr wa chaar bibio, ban wan a N niem. A bʋrɔ ɩ̃sʋɔ jaa ba wa a N niem, bʋrɔ 'lɔ jaa N na wa 'yir lɛ na wa a N niem dɔ̃dɔr ɩ̃sʋɔ jaa. Dɔ̃dɔr 'lↄ jaa N na wa 'yir lɛ na wa a N niem nɩ wʋ yie deme. Yir 'lↄ jaa N na wa 'yir lɛ na wa a N niem nɩ a wʋ dɔɔr, ka a dɔɔr pãa waara a N sɛ̃ bõ'yen 'yen. 15 Nɩrɛ 'lↄ jaa sɛ̃ a bomo anyã na wa be, ban chʋm 'lↄ nɩ a wʋ yir deme nɩ a wʋ bʋ̃tarsɩ bojũu wʋ 'yɔ̃ɔn a Isɩral nɩbɛ vĩ na wʋ sɔ̃ɔ a N nɛbõ'yen!>>

16 A wɛr na wa chaar bibio pipi, Josʋwa lɔ̃ↄn taa a Isɩral nɩbɛ bʋrɔ ɩ̃sʋɔ jaa waan a Nãaŋmɩn niem, ka a wʋ 'yir a Juda bʋrɔ. 17 Be lɛ wʋ waan a Juda bʋrɔ dɔ̃dɔr ɩ̃sʋɔ jaa a niem, ka a Nãaŋmɩn 'yir a Sera dɔ̃dɔr. Ka wʋ lɛ waan a Sera dɔ̃dɔr a niem yir ɩ̃sʋɔ jaa. Ka a Nãaŋmɩn 'yir a Sabdi yir deme. 18 Ka wʋ pãa waan a Sabdi yir deme bõ'yen 'yen a niem, ka a Nãaŋmɩn 'yir a Ekan na ɩ Karmɩ bidaba na ɩ Sabdi yɔ̃ↄ.

19 Ka a Josʋwa 'yɛr kʋ wʋ ɩka, <<N bie, 'yɛr sɩrɛ a kana a Nãaŋmɩn na ɩ a Isɩral nɩbɛ Ŋmɩn niem, tɩ na fʋ chiir a fʋ pʋↄ. 'Yɛr kʋ ma a bon 'lↄ fʋn ɩ. Ta de sↄↄl ma ɛ.>>

20 Ka a Ekan 'yɛr, <<Sɩrɛ jaa lɛ, n maal dɛɛr a Nãaŋmɩn na ɩ a Isɩral nɩbɛ Ŋmɩn niem, a dɛɛr n na maal nɩ nyã. 21 A bonsɩ ala sɩn fa, n nyɛ̃n a Babilↄn nɩrɛ ɩ̃sʋɔ fuu na vɩɛlɛ nɩ kpãna nɩ sɛldaa a manfʋ nɩ na ɩ chɩlo ayi nɩ bʋ̃ ŋmãa, ka n bʋↄrↄ yaa yɔɔ jaa, na n wob. N ũu yaa na bar a be a n fɔbaa yir, ka a kpãna be a par.>>

22 Ka a Josʋwa tʋ̃ a nɩbɛ bamine ka ba jo chen a fɔbaa yir tɩ kaa ka a ɩ sɩrɛ, a bomo ũun be a fɔbaa yir ka a kpãna be a par. 23 Ka ba wɛl yaa yin a be a wʋ fɔbaa yir tɩ wiil a Josʋwa nɩ a Isɩral nɩbɛ ba jaa tɩ na ba de bin a Nãaŋmɩn niem.

24 Josʋwa nɩ a Isɩral nɩbɛ ba jaa nyɔɔn a Ekan tɩ fa a kpãna, a fuu nɩ a sɛlma nɩ a Ekan bidↄↄr nɩ a bipↄbↄ, nɩ a wʋ niin, nɩ a wʋ bʋ̃n nɩ a piir, nɩ a wʋ fɔbaa yir nɩ a wʋ bʋ̃tarsɩ a jaa tɩ na ba tara wʋ chiin be a dↄↄrfʋ baa pↄ. 25 Ka a Josʋwa 'yɛr ɩka, <<Bo lɛ vɛ̃ ka fʋ de a dↄↄrfʋ nyã waan a sɩ pↄ.>> Nãaŋmɩn mɩ na dↄↄrfʋ naa. Ka a nɩbɛ ba jaa pãa lↄb a Ekan nɩ kʋsɩbɛ kʋ, ba mɩ lɛ lↄb a wʋ yir deme kʋ tɩ chʋm a wʋ bʋ̃tarsɩ.

26 Ba wob kʋsɩbɛ dↄↄl pɔɔ a Ekan, ka a chɛnɛ be be wa tan a dɩna. Ala lɛ so ka ba bʋɔlɔ a jie dↄↄrfʋ baa.

Be lɛ a Nãaŋmɩn suur pãa lo.