Josʋwa 16

A Wɛr 'Lɔ Ban De Kʋ A Ɛfɩrem Nɩ A Manaasɩ Nɩbɛ

1 A Josefʋ yɔnsuulsɩ wɛr ban kʋ ba tɔraa na be a sa-par gʋba jie pielaa a Jɔɔdan man na gbʋr a Jɛrɩko, be a jɛrɩko bul-yirsɩ na be a Jɛrɩko mɔ̃tɔ̃ɔ purfʋ jie tɩ ta be a dãlpʋɔ ju. Wʋ yin be a Jɛrɩko tɩ ta be a tẽn ala na be a tɔ̃ɔ ju tɩ tan be a Bɛtɩl. 2 Mɩ lɛ yi be a Bɛtɩl tɩ tan be a Luusɩ, tɩ kpɛ be Atarↄfʋ Ada, be a Akayɩtɩ nɩbɛ na kpɩɛrɛ. 3 Wʋ pãa lɛ yin be a mɔ̃tɔ̃ɔ mʋrfʋ jie tɩ ta be a Jafɩlatɩ nɩbɛ na kpɩɛrɛ tɩ tan be Bɛfʋ Hↄrↄn nɛʋ pɔ. Wʋ lɛ yin a be tɩ ta Gɛsɛ tɩ pãa tɩ tɛɛ be a Mɛditɛrɛniya mandal pↄ.

4 A Josefʋ yɔnsuulsɩ, a Ɛfɩrem bʋrɔ nɩ a Manaasɩ nɩbɛ bala na be a mɔ̃tɔ̃ɔ mʋrfʋ jie nyɛ̃n a wɛr nyã ka wʋ ɩ a ba sofʋ.

5 A Ɛfɩrem nɩbɛ wɛr bↄↄ mɩ lɛ a nyã, a ba tↄr-bɔɔ yin be a Atarↄfʋ Ada a mɔ̃tɔ̃ɔ purfʋ jie tɩ tan be a Bɛfʋ Hↄrↄn jusɔɔ, 6 mɩ lɛ yi a be tɩ ta a Mɛditɛrɛniya mandal pↄ. Tɩchɛ ka a Mɩkɩmɛtafʋ mɩ be a ba sa-par dɩr jie. A ba tↄraa yin be Tanafʋ Sɩlↄn na be a mɔ̃tɔ̃ɔ purfʋ jie tɩ tan be Janʋwa a mɔ̃tɔ̃ɔ purfʋ jie. 7 Tɩ mɩ lɛ yi be a tɩ suu Janʋwa tɩ ta be Atarↄfʋ nɩ Naara, tɩ ta be a Jɛrɩko tɩ na wʋ tɩ tɛɛ a Jɔɔdan man pↄ. 8 A ba tↄraa yin be a Tapʋya na be a mɔ̃tɔ̃ɔ mʋrfʋ jie tɩ tan be a Kana kʋl bile pↄ tɩ tɛɛ a Mɛditɛrɛniya mandal pↄ. A wɛr anyã lɛ ba kʋ a Ɛfɩrem bʋrɔ yie deme ka wʋ ɩ a ba sofʋ, 9 nɩ a tẽbɛrɛ nɩ a tẽbil amine na be a Manaasɩ wɛr pɔ, a jaa ɩ naa a Ɛfɩrem nɩbɛ sofʋ.

10 Tɩchɛ baa dii a Keena nɩbɛ bala na kpɩɛrɛ a Gɛsɛ ɛ, a lɛ jũu ka a Keena nɩbɛ lɔ̃ɔ kpɩɛrɛ nɩ a Ɛfɩrem nɩbɛ wa tan a dɩna, tɩchɛ ka ba ma fɩr ba ka ba tʋ̃nɔ gbãgba-tʋ̃mɔ̃.