1 A Lɛvi bʋrɔ nɩbɛ yie nidierbe chen a Eliasa na ɩ a Nãaŋmɩn bↄↄrloro nɩ a Josʋwa na ɩ a Nun bidaba nɩ a Isɩral nɩbɛ bʋrɔ yie nɩbɛrɛ sɛ̃. 2 Be a Silo na be a Keena paal pↄ tɩ 'yɛr kʋ ba ɩka, <<A Nãaŋmɩn dɔ̃ɔn kpãkpãan tu a Mosesɩ ɩka, wʋ kʋ sɩ tẽn ka sɩ kpɩɛrɛ nɩ a jiir ala mↄɛ na be ka a sɩ dʋn dire.>> 3 Nɩtãa a lɛ a Nãaŋmɩn na kpãkpãan a Isɩral nɩbɛ, ba kʋ naa a Lɛvi nɩbɛ a tẽbɛrɛ amine, nɩ a wɛɛ ala na tara mↄɛ kʋ ba, yin a ba mɩ̃ɛ paal pɔ.

4 A Kohafʋ bʋrↄ na ɩ a Lɛvi nɩbɛ dɔ̃dɔɩ lɛ de nie nyɛ̃ a tẽbɛrɛ. A yie deme bala na ɩ a Nãaŋmɩn bↄↄrloro Aarɔn yↄn nyɛ̃n tẽbɛrɛ pie nɩ ata na be a Juda bʋrɔ nɩ a Sɩmɩ̃ɛ bʋrɔ nɩ a Bɛnjamɩn bʋrɔ wɛɛ pↄ. 5 A Kohafʋ dɔ̃dɔr nɩbɛ bala na chɛ mɩ nyɛ̃n tẽbɛrɛ pie yin be a Ɛfɩrem bʋrɔ nɩ Dan bʋrɔ nɩ a Manaasɩ bʋrɔ nɩbɛ bala na be a mɔ̃tɔ̃ɔ mʋrfʋ jie wɛɛ pↄ.

6 A Gɛsↄn dɔ̃dɔr nɩbɛ mɩ nyɛ̃n tẽbɛrɛ pie nɩ ata yin be a Isaka bʋrɔ nɩ Asa bʋrɔ nɩ Nafɩtalɩ bʋrɔ nɩ a Manaasɩ bʋrɔ nɩbɛ bala na be a mɔ̃tɔ̃ɔ purfʋ jie wɛɛ pɔ.

7 Mɛrarɩ dɔ̃dɔr yie deme mɩ nyɛ̃n tẽbɛrɛ pie nɩ ayi yin be a Wuruben bʋrɔ nɩ Gaadɩ bʋrɔ nɩ a Sɛbulun bʋrɔ wɛɛ pↄ.

8 A gbam ŋmefʋ pↄ lɛ a tu ka a Isɩral nɩbɛ põ a tẽbɛrɛ nɩ a wɛɛ ala na tara a mɔɛ kʋ a Lɛvi nɩbɛ nɩtãa a lɛ a Nãaŋmɩn na dɔ̃ɔ kpãkpãan tu a Mosesɩ sɛ̃.

9 Anyãna lɛ ɩ a tẽbɛrɛ ala yoi na yi a Juda bʋrɔ nɩ a Sɩmɩ̃ɛ bʋrɔ wɛɛ pↄ, 10 ban de kʋ a Aarɔn yɔnsuulsɩ na ɩ a Kohafʋ dɔ̃dɔɩ nɩbɛ na yi a Lɛvi bʋrɔ pɔ. Bala lɛ ɩ a nɩbɛ na de nie nyɛ̃ a wɛr.

11 Ba kʋ naa Aaba tẽe (A Aaba dɔ̃ɔ ɩ a Anakɩ sãa) 'lↄ ban pãa bʋɔlɔ Hɛbʋrↄn na be a tɔ̃ↄ ju na ɩ a Juda paal nɩ a wɛr 'lɔ a mʋɔr na jil wʋ. 12 Tɩchɛ ba den a tẽe wɛr wʋ jaa nɩ a tẽbɛrɛ ala na jil wʋ kʋ a Kaleb na ɩ a Jɛfʋnɛ bidaba.

13 A tẽbɛrɛ anyãna lɛ pʋↄ a Hɛbʋrↄn na ɩ a jofaafʋ tẽe ɩ̃sʋɔ pↄ, ba den a tẽn anyãna kʋ a Aarɔn na ɩ a Nãaŋmɩn bↄↄrloro yɔnsuulsɩ, Libina nɩ 14 Jatɩr nɩ Ɛsɩtɩmʋya nɩ 15 Holon nɩ Dɛbir nɩ 16 Ayin nɩ Juta nɩ Bɛfʋ Sɛmɛsɩ nɩ a ba dʋn mʋɔr 'wɔfʋ jiir, tẽbɛrɛ pie for bir yin a Juda nɩ a Sɩmɩ̃ɛ bʋrsɩ wɛɛ pↄ.

17 Ba mɩ lɛ nyɛ̃n a tẽbɛrɛ anaar anyãna yin be a Bɛnjamɩn bʋrɔ wɛr pↄ, Gibiɔn nɩ Geba nɩ 18 Anatↄfʋ nɩ Alɩmↄn nɩ a ba dʋn mʋɔr 'wɔfʋ jiir ka a ɩ a ba sofʋ.

19 Ka a jaa pãa 'mãtaa ɩ tẽbɛrɛ pie nɩ ata nɩ a ba dʋn mʋɔr 'wɔfʋ jiir ɩ a Nãaŋmɩn bↄↄrloro Aarɔn yɔnsuulsɩ sofʋ.

20 A Lɛvi dɔ̃dɔr nɩbɛ bamine na yi a Kohafʋ bʋrɔ pɔ nyɛ̃ naa a tẽn amine na be a Ɛfɩrem bʋrɔ wɛr pↄ.

21 Ba kʋ ba naa tẽbɛrɛ anaar, Sɛchɛm nɩ a wʋ dʋn mʋɔr 'wɔfʋ jie na be a Ɛfɩrem tɔ̃n paal pɔ (A jofaafʋ tẽe ɩ̃sʋɔ lɛ) Gɛsɛ nɩ 22 Kibisam nɩ Bɛfʋ Hↄrↄn nɩ a ba dʋn mʋɔr 'wɔfʋ jiir.

23 Ba lɛ kʋ ba naa a tẽn anaar anyãna yin be a Dan bʋrɔ wɛr pↄ, Ɛltɛkɩ nɩ Gibɛtↄn nɩ 24 Ayijalↄn nɩ Gafʋ Wurimↄn nɩ a ba dʋn mʋɔr 'wɔfʋ jiir.

25 A Manaasɩ bʋrɔ nɩbɛ bala na be a mɔ̃tɔ̃ɔ mʋrfʋ jie, ba kʋ ban tẽbɛrɛ ayi, Tanachɩ nɩ Gafʋ Wurimↄn nɩ a ba dʋn mʋɔr 'wɔfʋ jiir.

26 Ka a jaa pãa 'mãtaa ɩ tẽbɛrɛ pie nɩ a ba dʋn mʋɔr 'wɔfʋ jiir a Kohafʋ dɔ̃dɔr nɩbɛ na nyɛ̃ ka a ɩ a ba sofʋ.

27 A Lɛvi nɩbɛ bamine na ɩ a Gɛsↄn dɔ̃dɔr nɩbɛ nyɛ̃n tẽbɛrɛ ayi yin be a Manaasɩ nɩbɛ bala na be a mɔ̃tɔ̃ɔ purfʋ jie wɛr pɔ, Golan na be a Basan (A jofaafʋ tẽe ɩ̃sʋɔ lɛ) nɩ Bɛsɩtɛra nɩ a ba dʋn mʋɔr 'wɔfʋ jiir.

28 Ba lɛ nyɛ̃ naa tẽbɛrɛ anaar yin be a Isaka bʋrɔ wɛr pↄ, Kɩsɩyↄn nɩ Dabɛrafʋ nɩ

29 Jamfʋ nɩ Ɛnganɩm nɩ a ba dʋn mʋɔr 'wɔfʋ jiir.

30 Ba lɛ nyɛ̃ naa a tẽbɛrɛ anaar anyãna yin be a Asa bʋrɔ wɛr pↄ, Mɩsal nɩ Abɩdↄn nɩ 31 Hɛlkafʋ nɩ Wurɛhↄbɩ nɩ a ba dʋn mʋɔr 'wɔfʋ jiir.

32 Ba mɩ lɛ nyɛ̃n tẽbɛrɛ ata yin be a Nafɩtalɩ bʋrɔ wɛr pↄ, Kɛdɛsɩ na be a Galalii nɩ a wʋ dʋn mʋɔr 'wɔfʋ jiir (A jofaafʋ tẽe ɩ̃sʋɔ lɛ) Hamↄfʋ Dↄr nɩ Kartan nɩ a ba dʋn mʋɔr 'wɔfʋ jiir.

33 A Gɛsɔn dɔ̃dɔr yie nɩbɛ nyɛ̃n tẽbɛrɛ pie nɩ ata nɩ a ba dʋn mʋɔr 'wɔfʋ jiir ka a ɩ a ba sofʋ.

34 A Lɛvi nɩbɛ bala na chɛ, na ɩ a Mɩrari dɔ̃dɔr nɩbɛ nyɛ̃n tẽbɛrɛ anaar yin be Sɛbulun wɛr pↄ, Jokɩnɩyam nɩ Kata nɩ

35 Dimɩna nɩ Nahalali nɩ a ba dʋn mʋɔr 'wɔfʋ jiir.

36 Ba lɛ nyɛ̃n tẽbɛrɛ anaar yin be a Wuruben bʋrɔ wɛr pↄ, Bɛsɛ nɩ Jahasɩ nɩ 37 Kɛdɩmↄfʋ nɩ Mɛfaafʋ nɩ a ba dʋn mʋɔr 'wɔfʋ jiir.

38 Ba mɩ lɛ nyɛ̃n tẽbɛrɛ anaar yin be a Gaadɩ bʋrɔ wɛr pↄ, Wuramↄfʋ na be a Giliyadɩ nɩ a ba dʋn mʋɔr 'wɔfʋ jiir (A jofaafʋ tẽe ɩ̃sʋɔ lɛ), Mahanayim nɩ 39 Hɛsɩbↄn nɩ Jasɛ nɩ a ba dʋn mʋɔr 'wɔfʋ jiir.

40 Ka a jaa 'mãtaa ɩ tẽbɛrɛ pie nɩ ayi ban de kʋ a Mɩrari dɔ̃dɔr nɩbɛ.

41,42 Yi a wɛɛ ala a jaa a Isɩral nɩbɛ na tara, ba den Tẽbɛrɛ lɩjaayi nɩ aniin, nɩ a ba dʋn mʋɔr 'wɔfʋ jiir jil ba kʋ a Lɛvi nɩbɛ.

43 Be lɛ a Nãaŋmɩn pãa de a wɛr 'lↄ wʋ jaa wʋn pol kʋ a Isɩral nɩbɛ sãakpãmine kʋ ba, ka ba pãa kpɩɛrɛ a be a sɔ̃ↄ 'lↄ ban wa de a wɛr ka wʋ ɩ a ba sofʋ. 44 Ka a Nãaŋmɩn vɛ̃ ka ba kpɩɛrɛ nɩ ɩ̃gan 'maar nɩtãa a lɛ wʋn dɔ̃ɔ pol kʋ a ba sãakpãmine. Ka a ba dɔ̃dɔ̃mine ɩ̃sʋɔ jaa gba ba wa tʋ̃ↄ ba ɛ, bojũu, Nãaŋmɩn kʋn a Isɩral nɩbɛ jɛtʋ̃ↄ fʋ yin a ba dɔ̃dɔ̃mine sɛ̃. 45 A Nãaŋmɩn tu naa a wʋ polfʋ a jaa wʋn pol kʋ a Isɩral nɩbɛ.