1 A Jɛrɩko pãmã pãa pↄↄ naa tɩchɛ ka ba gu lɛ an na ɩ ka a Isɩral nɩbɛ kʋ tʋ̃ɔ kpɛ ɛ. Nɩrɛ jaa kʋ tʋ̃ɔ kpɛ a tẽe pↄ bɩɩ yi ɛ.

2 Ka a Nãaŋmɩn 'yɛr kʋ a Josʋwa ɩka, <<N diere na a Jɛrɩko nɩ a wʋ nãmine nɩ a jɛjɛ-gãndaar ba jaa kʋrↄ fʋ. 3 Fʋ̃ʋ nɩ a fʋ jɛjɛɛrbɛ yɩ ma chen gʋↄr a tẽe gbɛ bõ’yen bibir jaa tɩ tan ber ayʋↄb. 4 A Nãaŋmɩn bↄↄrlorobo ayopõi, ɩ̃sʋɔ jaa na tara ɩɩl na chen tɩ ara a nɛbõ’yen daka niem. A ber ayopõi daar, fʋ̃ʋ nɩ a fʋ jɛjɛɛrbɛ na chen gʋↄr a tẽe gbɛɛ ayopõi tɩchɛ ka Nãaŋmɩn bɔɔrlorobo pɛɛlɛ a wɛrsɩ. 5 Bala wa pɛɛl pɛɛlfʋ 'lↄ na kor jaa, yɩn wa wõ a lɛ, a nɩbɛ ba jaa ba ŋme chɛlma ka a tẽe dachine lo. Ka a jɛjɛɛrbɛ pãa kpɛ a tẽe pↄ.>>

6 Ka a Josʋwa bʋɔl a Nãaŋmɩn bↄↄrlorobo 'yɛr kʋ ba ɩka, <<Yɩ 'mↄↄ a nɛbõ’yen daka, ka a yɩ ayopõi tara a wɛrsɩ den a nie.>> 7 Ka wʋ vɛ̃ ka a nɩbɛ gʋↄrↄ a tẽe, tɩchɛ ka a jɛjɛɛrbɛ de a Nãaŋmɩn bↄↄrlorobo bala na tuo a Nãaŋmɩn nɛbõ’yen daka nie.

8 Nɩtãa a lɛ a Josʋwa na 'yɛr kʋ ba, a Nãaŋmɩn bↄↄrlorobo ayopõi na tara a wɛrsɩ den nie pɛɛlɛ a wɛrsɩ, ka a bala na tuo a Nãaŋmɩn nɛbõ’yen daka turo. 9 Ka a Nãaŋmɩn bɔɔrlorobo bala na tuo a Nãaŋmɩn nɛbõ’yen daka be a puor, tɩchɛ ka a dɔɔr bala na tara a tã-jɛb bonsɩ lɛ turo a nɛbõ’yen daka puor. A sɔ̃ɔ 'lɔ wʋ jaa ka ba pɛɛlɛ na a wɛrsɩ. 10 Tɩchɛ ka a Josʋwa 'yɛr kʋ a nɩbɛ ɩka, <<Yɩ taa wa ŋmiere chɛlma ɛ, yɩ taa wa haara nɛɛ tɩ tan wʋn wa tɩr sↄr ɛ!>> 11 Be lɛ ba tuo a Nãaŋmɩn nɛbõ’yen daka gʋↄr a tẽe gbɛ bõ’yen. Tɩ lɩɛb wa gã be a ba jaa-jie.

12 Ka a Josʋwa dɔ̃ɔn 'yirfʋ a bibio, ka a Nãaŋmɩn bɔɔrlorobo lɛ de a nɛbõ’yen daka tuo. 13 Ka a Nãaŋmɩn bɔɔrlorobo ayopõi bala na tara a wɛrsɩ ayopõi den a Nãaŋmɩn nɛbõ’yen daka nie pɛɛlɛ a wɛrsɩ. Tɩchɛ ka a dɔɔr bala na tara a tã-jɛb bonsɩ de a Nãaŋmɩn bɔɔrlorobo bala na tuo a nɛbõ’yen daka nie tɩ ka a bamine mɩ turo a puor. A sɔ̃ɔ 'lɔ wʋ jaa ba pɛɛlɛ naa a wɛrsɩ. 14 A ber ayi sʋↄ, ba lɛ gʋↄr a tẽe gbɛ bõ’yen tɩ lɛ lɩɛb chen a ba jaa-jie. Ba ɩ naa a lɛ tɩ tan ber ayʋↄb.

15 A ber ayopõi daar, ba 'yir naa a wɛr na wa chaar gʋↄr a tẽe gbɛɛ ayopõi, nɩtãa a lɛ ban ma dɔ̃ɔ gʋↄr, a bibir 'lɔ tɛɛ lɛ ba gʋↄr a tẽe gbɛɛ ayopõi. 16 A gbɛɛ ayopõi sʋↄ, a sɔ̃ɔ 'lↄ a Nãaŋmɩn bɔɔrlorobo na gbʋrɔ na pɛɛl a wɛrsɩ, ka a Josʋwa 'yɛr kʋ a nɩbɛ ka ba ŋme chɛlma tɩ na wʋ 'yɛr, <<A Nãaŋmɩn de naa a tẽe kʋ yɩ.>> 17 Yɩ sɔ̃ɔ bon jaa na be a tẽe pɔ nɩ a tẽe wʋ jaa bar, ka a ɩ loraa kʋ a Nãaŋmɩn. A pↄↄ sɛ̃sɛ̃nɛ Wʋrahab tɛɛ lɛ sɛɛn vɛ̃ kʋfʋ bojũu wʋ sↄↄl a sɩ nɩjʋʋrbↄ bar. 18 Tɩchɛ yɩ taa wa diere bon 'lɔ jaa an sɛɛ ɩka yɩ sɔ̃ɔ bar ɛ, yɩn wa ɩ a lɛ, yɩn waan yele nɩ sɔ̃ɔfʋ a Isɩral nɩbɛ jaa-jie. 19 Bon 'lↄ jaa ban de kpãna bɩɩ sɛlma bɩɩ kur-jɩɛ bɩɩ kur-tɩɩr maal ɩ naa a Nãaŋmɩn bon. A sɛɛn ɩka yɩ de 'yɔ̃ɔ a Nãaŋmɩn bomo pↄ.

20 Be lɛ a Nãaŋmɩn bɔɔrlorobo pɛɛl a wɛrsɩ. A nɩbɛ na wa wõ a wɛrsɩ kõn, ba ŋmen chɛlsɩ ka a dachine lo. Ka a jɛjɛɛrbɛ ba jaa pãa kpɛ sɔ̃ɔ a tẽe bar. 21 Ba den a ba sɔbɛrɛ kʋn a nɩbɛ ba jaa a tẽe pↄ, dↄↄr nɩ a pↄbↄ, bibiir nɩ a nɩnyↄn. Ba mɩ kʋn a niin nɩ a piir nɩ a bʋ̃n.

22 Ka a Josʋwa pãa 'yɛr kʋ a dɔɔr ayi bala na ɩ a nɩjʋʋrbↄ bala ɩka, <<Yɩ kpɛ tɩ vɛ̃ ka a pↄↄ sɛ̃sɛ̃nɛ Wʋrahab nɩ a wʋ yir deme yi nɩtãa a lɛ yɩn dɔ̃ɔ pol kʋ wʋ.>> 23 Ka ba kpɛ tɩ vɛ̃ ka a Wʋrahab nɩ a wʋ sãa nɩ a wʋ mã, a wʋ yɛdɔɔr nɩ a wʋ yir deme ba jaa ka ba yi, ka ba tara ba chiin a ba tɩ jɛ̃ gbʋr a Isɩral nɩbɛ jaa-jie.

24 Tɩ na ba pãa chʋm bũu 'yɔ̃ↄ a tẽe wʋ jaa ka wʋ di, nɩ bon jaa na be a tẽe pↄ tɩ bar a bomo ala ban de sɛlma bɩɩ kpãna bɩɩ kur-jɩɛ bɩɩ kur-tɩɩr maal, ala lɛ ba de tɩ bin a be ban ma bine a Nãaŋmɩn bomo. 25 Tɩchɛ ka Josʋwa pãa kaa a pↄↄ sɛ̃sɛ̃nɛ Wʋrahab nɩ a wʋ nɩbɛ ba jaa nɩbaal, bojũu wʋ dɔ̃ɔ sↄↄl a nɩjʋʋrbↄ ayi bala wʋn dɔ̃ɔ tʋ̃ be a Jɛrɩko. (A wʋ yↄn ben a Isɩral wa tan a dɩna.)

26 A sɔ̃ɔ 'lↄ, a Josʋwa pɔn 'yɛr ɩka, <<Nɩrɛ 'lↄ jaa na wa bↄ ɩka wʋ lɛ mɛ a Jɛrɩko tẽe na nyɛ̃n Nãaŋmɩn pↄ 'yɔ̃ↄfʋ.

<<Nɩrɛ 'lↄ jaa na wa kpar a Jɛrɩko dachin pielaa bida-kpɛ̃ɛ na kpi naa,

ka nɩrɛ 'lↄ jaa na wa mɛ a dɔ̃dɔr nɛɛ bidabile mɩ na kpi naa.>>

27 Be lɛ a Nãaŋmɩn be a Josʋwa sɛ̃, ka a wʋ yuor yaar de a paal wʋ jaa.