Lucas 5

Yeesu wasobola Badingisi baye ba busu

1 Kwene lumo lusu, Yeesu we taluka hangondo yaziba dya Genezaleti*5.1 Ziba dya Genezaleti: dedya ziba ni dyabakitaanaga ziba dya Galilaya.. Bandu babule bavasomba kumufinga, kumona bavavula kuteejya Mauya ma Kabejya. 2 Bya mona mitumbu yibidi hangondo haziba. Haŋo bakuloba bene mukulozoka mwakale mu yeya mitumbu mukutumba tubabila twaabo. 3 Haŋo Yeesu bya banda munda mwa mutumbu umo wene haŋa. Wowa mutumbu wene wa mundu yumo wetaanibwa Simoni. Yowa Simoni, Yeesu bya musaudila ti waumbe ashoo mu meema, munonga ashee na kibimbi bya yakana moo munda, na kusomba kulangidila bandu.

4 Haŋa hewa Yeesu kulangidila, bya saudila Simoni ti: «Tulusha mutumbu kokwa kudi muyungu, haŋo mukakase tubabila twiinu mukwate bibelelo.» 5 Simoni bya muyaka ti: «Mulangidishi, twatua leelo bufuku booso nee kamo kaku kwaata. Ila, kumona ti jyoobe wasaula nikasa lungi tubabila mumeema.» 6 Haŋo habekaasa tubabila mumeema, haba kwaata bibelelo bya buule, na tubabila twaabo hatwa somba kuhandika. 7 Ni haba taana bezinabo bangi bene mumutumbu hungi, kwa kuboya ti baave bava banyanguzye. Booso habakwata bibelelo, na kuyujya mitumbu yooso yibidi haya somba kumotoka mu meema.

8 Simoni Petelo he moneeye beebyo, bya hona manyu fuka busu bwa Yeesu nakusaula ti: «Ee ha Vidi-nyambi wandi hezela busu bwaami, Kumona miimi mbidi mundu yidi na bubi!» 9 Simoni uvayakula beebya kumona iye na beezinaye be hanunuka kwabule kukidila bungi bwa bibelelo byabeekwaata.

10 Byakebee Yakobo na Yohane, baana ba Zebedayo naibo bavane mukuloba na Simoni, naibo habahanunuka kwa bule. Ila Yeesu bya jyongodela Simoni ti: «Ndutiina, kusombela leelo uyakana wakuloba bandu.» 11 Haŋo haba tulusha mitumbu haŋongo haba sama byooso na kujyanga Yeesu.