Lucas 9

Yeesu wadisha bandu helufu mia yitano

10 Haŋa baba badingisi habee haluka, haba saudila Yeesu byooso byabeeta. Yeesu bya babuula bya yena nabo mubua dya bunga mupaka kumukola ukitaanibwa Bethesaida. 11 Lakini haŋa baba bandu habeyuka kweyeneye habamujyanga. Yeesu bya batabuka tonono naye byabasaudila kukidila butangala bwa Kabejya na kufula baba booso bene na lufu. 12 Haŋa hayene ti yuba ndadi sala, baba Badingisi* kumi nababidi haba muyila Yeesu na kumusaudila ti: «Ulae baaba bandu, kwakuboya ti bayene mumikola na makunda madi tonono, bakwikebele bidyazi na mabua ma kutandabala, kumona tudi mubua disidi bandu.» 13 Lakini Yeesu byabajyongodela: «Banyu benikindu mubaabile bidyazi.» Naibo haba muyaka ti:«Haŋa tudi bobo na mikati yitano na bibelelo bibidi. Itu niini twene tukaule bidyazi byakubambana baba bandu booso!» 14 (Kumona haŋa hene hangi babalume elufu yitano), haŋo Yeesu byasaudila badingisi baye: «Musaudile bandu bayakane haasi mubiandu bya bandu makumi matanomatano.» 15 Baba badingisi habata bebya byabavasaudibwa, haba yakanisha bandu booso haasi. 16 Haŋo Yeesu bya buula yeya mikati yitano na bebya bibelelo bibidi, byatundula meeso haulu, byabifiyudila, haya bibela na kuabila badingisi baye kwakuboya ti babiabanyine kiandu kya bandu. 17 Haŋo bandu booso habadya na kushiba. Habakumaanya makombwa meshaala, haba yujya taba kumi na yibidi.