Lucas 9

Baaba balu vula umu kumba Yeesu

57 Haŋa haba bu wenanga mu zila, mundu yumu haya vueya haya mu sawiila Yeesu: «Miimi naku kumbanga kooso kwa wa yinanga.» 58 Yeesu haya mu lunga: «Milende yidi na mi tubula, na tuuni tudi na mashwa, haboobwa mwaana wa Adamu ndidi na buga dyoo yegela mushu.» 59 Ihani Yeesu haya mu sawiila mundu yungi: «Unikumbi miimi.» Haboobwa yuugu haya mu lunga: «Ngana, unisami bangu miimi neenangi nazii’i shaami.» 60 Yeesu haya mu lunga: «Sama bandu bamote ba zii’i mundu waabu womota, haboobwa beebe inanga waa sawiidi bangu Butangala bwa Kabejya.» *9.60 Lola Mat 3.2 61 Mundu yungi haya mu sawiila: «Ngana, naku kumbanga unisami bangu nenangi naalagi bandu badi u yendi kyaami.»*9.61 Loli Mat 3.2 62 Yeesu haya mu lunga: «Mundu gooso wa watanga lwasu na eyu muunima, na ishu wa lola manyuma, ndilu bengeneema u yaama mu butangala bwa Kabejya.»