1 ଶଲୋମନ୍‌ନେ ନିମାଣ୍ଡା ସିକ୍ୟା ବିଃନେ ସାମୁଆଁ । ଜ୍ଞାନବାନ୍‌ ଉଙ୍ଗ୍‌ଡେ ଆବାକେ ସାର୍ଦା ଆଃଡିଂଏ; ମାତର୍‌ ବୁଦି ଆଲେଃକ୍ନେ ଉଙ୍ଗ୍‌ ମେଁନେ ଇୟାଙ୍ଗ୍‌ଡେନେ ଦୁକ୍‌ନେ କାରନ୍‌ । 2 ଦୁସ୍‌ଟବାନ୍‌ ଆର୍ଜେବକ୍ନେ ଦନ୍‌ ମେଃଡିଗ୍‌ କାମ୍‌ ଆବିଃ ଣ୍ଡୁ; ମାତର୍‌ ଦରମ୍‌ ସାମୁଆଁ ଗୁଗୁଏଃନେବାନ୍‌ ରକ୍ୟା ଡିଂଏ । 3 ମାପ୍‌ରୁ ଦାର୍ମିକ୍‌ନେ ପାରାନ୍‌କେ କିଡ଼େସଃଚେଃ ଗୁଏଃନ୍‌ସାଃ ଆବିଃ ଣ୍ଡୁ; ମାତର୍‌ ମେଁ ଦୁସ୍‌ଟ‍ନେ ଇକ୍‌ଚା ପୁରା ଡିଙ୍ଗ୍‌ନ୍‌ସାଃ ଆବିଃ ଣ୍ଡୁ । 4 ମୁଃଡ଼ି ରେମୁଆଁ ଅଲ୍‌ସୁଆ ନ୍ତି ଏଃତେ କାମ୍‌ ଡିଂଏ, ମେଁ ଦରିଦ୍ର ଡିଂଏ; ମାତର୍‌ ସ୍ଲେରେନେ ନ୍ତି ସାକାର୍‌ ଆଃଡିଂଏ । 5 ନ୍ନାଃସେଙ୍ଗ୍‌କିଗ୍‌ କେଲା ଜା କାଦି ରାଃସିଙ୍ଗ୍‌ଏ, ମେଁ ବୁଦିମାନ୍‌ ଉଙ୍ଗ୍‌; ମାତର୍‌ ଚାସ୍‌ବାସ୍‌ ବେଲା ଜା ଡୁଲେଗ୍‌ ଲେଃଏ, ଆତେନ୍‌ ଗଡ଼େଅ ମୁର୍‌କ ଗଡ଼େଅ । 6 ଦରମ୍‌ ରେମୁଆଁନେ ବାଆଃଅରିଆ ଆସିର୍ବାଦ୍‌ ଲେଃଏ; ମାତର୍‌ ଦୁସ୍‌ଟନେ ତୁମୁଆଃ କାରାପ୍‌ କାମ୍‌ ଡିଡାଏ । 7 ଦରମ୍‌ ରେମୁଆଁକେ ମନେ ବଚେ ରେମୁଆଁ ଆସିର୍ବାଦ୍‌ ବାଏ । ମାତର୍‌ ଦୁସ୍‌ଟନେ ମ୍ନି ଲିଗ୍‌ ୱେଏ । 8 ଜା ମନ୍‌ ବିତ୍‌ରେ ଜ୍ଞାନି, ମେଁ ଆଦେସ୍‌ ଗ୍ର‍ଅନ୍‌ ଡିଂଏ; ମାତର୍‌ ଅଗ୍ୟାନ୍‌ ରେମୁଆଁ ଦଂସ ଡିଙ୍ଗ୍‌ଏ । 9 ଦରମ୍‌ ରେମୁଆଁ ମାବ୍‌ଟଚେଃ ଅଲେଙ୍ଗ୍‌ଏ, ମାତର୍‌ ବାଙ୍ଗ୍‌ଟି ଅଲେଙ୍ଗ୍‌ଣ୍ଡ୍ରେ ଜାନା ପଡ଼େଏ । 10 ଜା ମ୍‌ମୁଆଃ ଏଃତେ ମ୍‌ମୁଆଃ ବଗ୍‌ଏ, ମେଁ ଦୁକ୍‌ ଆଃଗଟେଏ, ବାରି ଅଗ୍ୟାନ୍‌ ସାମୁଆଁ ବାସଙ୍ଗ୍‌ନେ ରେମୁଆଁ ଦଂସ ଡିଙ୍ଗ୍‌ଏ । 11 ଦରମ୍‌ ରେମୁଆଁନେ ତୁମୁଆଃ ଜିବନ୍‌ନେ ଜର୍‌ନାଡ଼୍ୟାଃ ରକମ୍‌, ମାତର୍‌ ଦୁସ୍‌ଟନେ ତୁମୁଆଃ କାରାପ୍‌ କାମ୍‌କେ ଡିଡାଏ । 12 ଇଂସା ୱିଙ୍ଗ୍‌ଆଃ ଆଃତାର୍‌ଏ, ମାତର୍‌ ଆଲାଦ୍‌ ସାପା ପାପ୍‌ ଡିଡାଏ । 13 ନିମାଣ୍ଡାଃ ବୁଦି ରେମୁଆଁନେ ତୁମୁଆଃଅରିଆ ଗିଆନ୍‌ ଲେଃଏ, ମାତର୍‌ ମୁର୍କନେ ଗୁଗ୍‌ଡିଆ ଆତ୍‌ଲା ଡୁଡୁ । 14 ଜ୍ଞାନି‍ଇଂ ଗିଆନ୍‌ ରାଃସିଙ୍ଗ୍‌ଆର୍‌ଏ, ମାତର୍‌ ଅଗ୍ୟାନ୍‌ନେ ତୁମୁଆଃ ପିଙ୍ଗ୍‌ଚାଃନେ ବିନାସ୍‌ ରକମ୍‌ । 15 ସାକାର୍‌ନେ ଦନ୍‌ ମେଁନେ ଡାଟ୍‌ ଇନି, ଗରିବ୍‌ଇଂନେ ଗରିବ୍‌ପଣିଆ ମେଇଂନେ ବିନାସ୍‌ । 16 ଦରମ୍‌ ରେମୁଆଁନେ କାମ୍‌ ଜିବନ୍‌ ରକମ୍‌, ବାରି ଅଦରମ୍‌ ରେମୁଆଁନେ ଆର୍‌ଜେକ୍ନେ ଦନ୍‌ ପାପ୍‌ ରକମ୍‌ । 17 ନିମାଣ୍ଡା ଆଦେସ୍‌ ଜା ମାନେଃଏ, ମେଁ ଜିବନ୍‌ ଗାଲିଅରିଆ ଅଲେଙ୍ଗ୍‌ଏ; ମାତର୍‌ ଜା ଦିଆନ୍‌ ଆନ୍ତାର୍‌ଏ, ମେଁ କରାପ୍‌ ଗାଲି ୱେଏ । 18 ଜା ଇଂସା ଡିଡାଏ, ମେଁନେ ତୁମୁଆଃ ନାଲେ ବାସଙ୍ଗ୍‌ଣ୍ଡ୍ରେ; ବାରି, ଜା କରାପ୍‌ ସାମୁଆଁ ବାସଙ୍ଗ୍‌ଏ, ମେଁ ଅଗ୍ୟାନି‍ ରେମୁଆଁ । 19 ଜାବର୍‌ ସାମୁଆଁଅରିଆ ପାପ୍‌ନେ ଅବାବ୍‌ ଆଲେଃ ଣ୍ଡୁ, ମାତର୍‌ ଜା ନିଜର୍‌ ତୁମୁଆଃକେ ବନ୍ଦ୍‌ ଆଃଡିଂଏ, ମେଁ ବୁଦିମାନ୍‌ ରେମୁଆଁ । 20 ଦାର୍ମିକ୍‌ନେ ନ୍ଲିୟା ସ୍ରିକ୍ନେ ରୁପା ରକମ୍‌, ମାତର୍‌ ଦୁସ୍‌ଟନେ ରୁଦୟ୍‌ ଗଣ୍ଡାଃ ମୁଲ୍ୟ । 21 ଦରମ୍‌ ରେମୁଆଁନେ ତୁମୁଆଃ ଗୁଲୁଏରେକେ ଜତନ୍‌ ଡିଂଏ, ମାତର୍‌ ଅଗ୍ୟାନ୍‌ ରେମୁଆଁଇଂ ଅଗ୍ୟାନ୍‌ ନ୍‌ସାଃ ଗୁଏଃମ୍ୟାଃଆର୍‌କେ । 22 ମାପ୍‌ରୁନେ ଆସିର୍ବାଦ୍‌ ସାକାର୍‌ ଆଃଡିଂଏ, ବାରି ମେଁ ମେଁ ଏଃତେ ଦୁକ୍‌ ଆରାଃମିସୁଃ ଣ୍ଡୁ । 23 କରାପ୍‌ କାମ୍‌ ଡିଂନେ ଅଗ୍ୟାନି‍ ରେମୁଆଁନେ ଇକ୍‌ଚା, ଦେତ୍‌ରକମ୍‌ ଗିଆନ୍‌ ବୁଦି ଲାଏଃକ୍ନେ ରେମୁଆଁନେ । 24 ଦୁସ୍‌ଟ ରେମୁଆଁ ମେଃନେ ବୁଟମେଗ୍‌ଏ, ଆତେନ୍‌ ଆଃ ଆମେକେ ଗଟେଏ; ମାତର୍‌ ଦରମ୍‌ ରେମୁଆଁନେ ଇକ୍‌ଚା ଆମେକେ ବିଃଏ । 25 ୱେଗୁର୍‌ ପାଙ୍ଗ୍‌ଲା ଦୁସ୍‌ଟ ଆରି ଆଲେଃ ଣ୍ଡୁ, ମାତର୍‌ ଦରମ୍‌ ରେମୁଆଁ ମାଡାନେ କାଲ୍‌ ଜାକ ଲେଃନେ ମୁଲ୍‌ପାଣ୍ଡୁସନ୍‌ ରକମ୍‌ । 26 ଡିରକମ୍‌ ଗ୍ନିକେ ବିସେଃ ରସ୍‌ ଆରି ମ୍‌ମୁଆଃ ଆତ୍ଲା ମାଃସ ଗାଲା ସାମ୍ୱାଲେ ଆୟା ଣ୍ଡୁ, ଦେତ୍‌ରକମ୍‌ ନିଜର୍‌ ବେଣ୍ଡ୍ରେନେ ସାମୁଆଁ ଅଲ୍‌ସୁଆ ସାମ୍ୱାଲେ ଆୟା ଣ୍ଡୁ । 27 ମାପ୍‌ରୁନେ ବିସ‍ଏରେ ବୁଟମେଗ୍‌ଲା ଦିନ୍‌ ଆଃମ୍ନାଃଏ, ମାତର୍‌ ଦୁସ୍‌ଟନେ ମୁଆଁ ଉନା ଆଃଡିଂଏ । 28 ଦରମ୍‌ ରେମୁଆଁନେ ଆସା ସାର୍ଦା ରକମ୍‌ ଡିଂଏ, ମାତର୍‌ ଦୁସ୍‌ଟନେ ଆସା ନସ୍‌ଟ ଡିଂଏ । 29 ମାପ୍‌ରୁନେ ଗାଲି ଦରମ୍‌ ରେମୁଆଁଇଂନେ ନ୍‌ସାଃ ଡାଟ୍‌ ତିଆର୍ ଡୁଆ; ମାତର୍‌ ପାପ୍‌ କାମ୍‌ ଡିଂଣ୍ଡ୍ରେନେ ଆଡ଼ାତ୍ରା ଆତେନ୍‌ ବିନାସ୍‌ନେ କାରନ୍‌ ଗଟେଏ । 30 ଦରମ୍‌ ରେମୁଆଁ ଅଃନା ଡିଗ୍‌ ଆଗୁଚେ ଣ୍ଡୁ; ମାତର୍‌ ଦୁସ୍‌ଟ ଦେସ୍‌ନିଆ ଆବାସା ଣ୍ଡୁ । 31 ଦାର୍ମିକ୍‌ ରେମୁଆଁନେ ତୁମୁଆଃ ଗିଆନ୍‌ ସାମୁଆଁ ବାସଙ୍ଗ୍‌ଏ, ମାତର୍‌ ଦଦିଆ ସାମୁଆଁ ବାସଙ୍ଗ୍‌ନେ ନ୍ଲିୟାକେ ସିଃତଗ୍‌ ବିଃଏ । 32 ଦରମ୍‌ ରେମୁଆଁନେ ତୁମୁଆଃ ନିମାଣ୍ଡାଃ ସାମୁଆଁ ବାସଙ୍ଗ୍‌ଏ, ମାତର୍‌ ଦୁସ୍‌ଟନେ ତୁମୁଆଃ କୁଟ୍‌ ସାମୁଆଁ ବାସଙ୍ଗ୍‌ଏ ।