1 ମୁଃଡ଼ି ରେମୁଆଁ ସାସନ୍‌ ବଲ୍‌ ବାଏ, ମେଁ ଗିଆନ୍‌ ବଲ୍‌ ବାଏ; ମାତର୍‌ ଜା ୱିଙ୍ଗ୍‌ଆଃକେ ଗ୍ରୁନା ଡିଂଏ, ମେଁ ପସୁ ରକମ୍‌ । 2 ସତ୍‌ ରେମୁଆଁ ମାପ୍‌ରୁନେବାନ୍‌ ଅନୁଗ୍ରହ ବାଏ, ମାତର୍‌ ଦଦ୍ୟା ଚିନ୍ତା ଡିଂଣ୍ଡ୍ରେକେ ମେଁ ଦସି ଆଃଡିଂଏ । 3 ଦଦ୍ୟା କାମ୍‌ ବାନ୍‌ ମେଃଡିଗ୍‌ ରେମୁଆଁ ସାନ୍ତିରେ ଆଃଲେ ଣ୍ଡୁ, ମାତର୍‌ ଦାର୍ମିକ୍‌ନେ ମୁଲ୍‌ ଅଃନାଡିଗ୍‌ ଆରାଃଗୁଚେ ଣ୍ଡୁ । 4 ଗୁନ୍‌ବତି ସେଲାମ୍ବୁଏଃ ନିଜର୍‌ ଆଣ୍ଡାନେ ମୁକୁଟ୍‌ ରକମ୍‌; ମାତର୍‌ ଗିଆସଃ ବିଃନେ ସେଲାମ୍ବୁଏଃ ମେଁନେ ଞ୍ଚ୍ୟା ସାପାନେ ବିନାସ୍‌ ରକମ୍‌ । 5 ଦାର୍ମିକ୍‌ଇଂନେ ଇକ୍‌ଚା ସତ୍‌; ମାତର୍‌ ଦୁସ୍‌ଟ‍ଇଂନେ ବୁଦିନିଆ ନାଲେନେ ଲେଃଏ । 6 ଦୁସ୍‌ଟ‍ଇଂ ରେମୁଆଁ ବାଗୁଏଃ ନ୍‌ସାଃ ବୁଃଡ଼ି କଲାଏଃନେ ସାମୁଆଁ ବାସଙ୍ଗ୍‌ଆର୍‌ଏ, ମାତର୍‌ ଦରମ୍‌ ରେମୁଆଁଇଂନେ ତୁମୁଆଃ ଆମେଇଂକେ ରକ୍ୟା ଡିଂଏ । 7 ଦୁସ୍‌ଟ‍ଇଂକେ ତାଗ୍‌ଚେଃ ଜଗ୍‌ତ୍ଲାଗ୍‌ଏ ଆରି ମେଇଂ ଆଲେଃଆର୍‌ ଣ୍ଡୁ, ମାତର୍‌ ଦାର୍ମିକ୍‌ଇଂନେ ଡୁଆ ତୁଆଁଏ । 8 ରେମୁଆଁ ନିଜର୍‌ ନିମାଣ୍ଡାଃ ବୁଦି ଇସାବ୍‌ରେ ପ୍ରସଂସା ବାଏ, ମାତର୍‌ ଜାନେ କୁଟ୍‌ ମନ୍‌, ମେଁ ଗ୍ରୁନା ବାଏ । 9 ମୁଃଡ଼ି ରେମୁଆଁଅରିଆ କାଦି ଣ୍ଡୁ, ଆରି ନିଜ୍‌କେ ପ୍ରସଂସା ଡିଙ୍ଗ୍‌ମ୍ୟାଃକେ, ଆତେନ୍‌ ରେମୁଆଁ ବାଦୁଲ୍‌ ମୁଃଡ଼ି ରେମୁଆଁ ବିନ୍‌ରେକେ ଇଙ୍ଗ୍‌ଚେଃ ମ୍ୟାଃକେ ଆରି ଜାଅରିଆ ଚାକର୍‌ ଲାଏଃକେ, ଆତେନ୍‌ ରେମୁଆଁ ମ୍ନାଃ । 10 ଦାର୍ମିକ୍‌ ରେମୁଆଁ ନିଜର୍‌ ପସୁନେ ପାରାନ୍‌କେ ଆଲାଦ୍‌ ଡିଂଏ, ମାତର୍‌ ଦୁସ୍‌ଟ‍ଇଂ ପସୁଇଂକେ ଦୟା ଆଡିଙ୍ଗ୍‌ଆର୍‌ ଣ୍ଡୁ । 11 ଜା ନିଜର୍‌ ଲିଜ ଚାସ୍‌ ଡିଙ୍ଗ୍‌ଏ, ମେଁ ଜାବର୍‌ କାଦି ବାଏ; ମାତର୍‌ ଜା ବେକାର୍‌ ସାମୁଆଁଅରିଆ ଇକ୍‌ଚା ଡିଂଏ, ମେଁ ବୁଦି ଆଲାଏଃକ୍ନେ ରେମୁଆଁ । 12 ଦୁସ୍‌ଟ ରେମୁଆଁ ଦଦ୍ୟା କାମ୍‌ ଡିଂଣ୍ଡ୍ରେନେ ଜାଲ୍‌କେ ଲବ୍‌ ଡିଂଏ; ମାତର୍‌ ଦାର୍ମିକ୍‌ନେ କାମ୍‌ ଚୁଚୁ ବିଃଏ । 13 ଦୁସ୍‌ଟ ରେମୁଆଁନେ ତୁମୁଆଃବାନ୍‌ ତାର୍‌ନେ ପାପ୍‌ ସାମୁଆଁଅରିଆ ବ୍ନେଗ୍‌ ଲେଃଏ, ମାତର୍‌ ଦରମ୍‌ ରେମୁଆଁ ଦୁକ୍‌ବାନ୍‌ ରକ୍ୟା ବାଏ । 14 ରେମୁଆଁ ନିଜର୍‌ ତୁମୁଆଃନେ ଚୁଚୁବାନ୍‌ ନିମାଣ୍ଡାଃ ବାବ୍‌ରେ ଆସିର୍‌ବାଦ୍‌ ବାଏ, ବାରି ରେମୁଆଁନେ ନ୍ତିବାନ୍‌ ଡିଂକ୍ନେ କାମ୍‌ ଚୁଚୁ ଆମେକେ ବିଃଏ । 15 ଅଗ୍ୟାନ୍‌ ରେମୁଆଁନେ ଗାଲି ମେଁନେ ନିଜର୍‌ ମ୍‌ମୁଆଃଅରିଆ ନିମାଣ୍ଡାଃ ଲେଃଏ, ମାତର୍‌ ଜା ଗିଆନ୍ ରେମୁଆଁ, ମେଁ ସାମୁଆଁ ଦ୍ରିଗ୍‌ଏ । 16 ଅଗ୍ୟାନ୍‌ ରେମୁଆଁନେ ରିସା ସାମୁଆଁ ମାର୍ୟାଃତୁଗ୍‌ ତ୍ନାଏ; ମାତର୍‌ ଚତୁର୍‌ ରେମୁଆଁ ଗିଆସଃକେ ଡାଏ । 17 ସତ୍‌ ବାସଙ୍ଗ୍‌ନେ ରେମୁଆଁ ଦରମ୍‌ ସାମୁଆଁ ବାସଙ୍ଗ୍‌ଏ; ମାତର୍‌ ମିଚ୍‌ ସାକି ମିଚ୍‌ ସାମୁଆଁ ଆଃସୁଏଃଏ । 18 ଜାନେ ଜାନେ ସାମୁଆଁ ଚିନ୍ତା ଡିଂଚେଃ ବାସଙ୍ଗ୍‌ ସୁଗୁଆ କାଣ୍ଡା ଏଃତେ ସିଃକ୍ନେ ରକମ୍‌; ମାତର୍‌ ଜ୍ଞାନିନେ ନ୍ଲିୟାବାନ୍‌ ବାସଙ୍ଗ୍‌କ୍ନେ ସାମୁଆଁ ସୁସ୍ତା ରକମ୍‌ । 19 ସତ୍‌ ବାସଙ୍ଗ୍‌ନେ ରେମୁଆଁନେ ତୁମୁଆଃ କାଲାଆଃ ଲେଃଏ; ମାତର୍‌ ନାଲେ ବାସଙ୍ଗ୍‌ନେ ନ୍ଲିୟା ଗଣ୍ଡାଃସି ମାତର୍‌ । 20 ଦଦ୍ୟା ଚିନ୍ତା ଡିଂଣ୍ଡ୍ରେନେ ରୁଦୟ୍‌ନିଆ ମିଚ୍‌ ଲେଃଏ; ମାତର୍‌ ନିମାଣ୍ଡାଃ ବୁଦି ବିଃନେ ରେମୁଆଁନେ ସାର୍ଦା ଡିଂଏ । 21 ଦାର୍ମିକ୍‌ ଆଡ଼ାତ୍ରା ମେଃଡିଗ୍‌ ବିପଦ୍‌ ଆଗଟେ ଣ୍ଡୁ: ମାତର୍‌ ଦୁସ୍‌ଟ ରେମୁଆଁ ବିନାସ୍‌ରେ ଲେଃଆର୍‌ଏ । 22 ନାଲେ ବାସଙ୍ଗ୍‌ନେ ତୁମୁଆଃକେ ମାପ୍‌ରୁ ଗ୍ରୁନା ଡିଙ୍ଗ୍‌ମ୍ୟାଃକେ; ମାତର୍‌ ଜାଜା ସତ୍‌ ବେବ‍ଆର୍‌ ଡିଂମ୍ୟାଃଆର୍‌କେ, ମେଇଂ ଆଡ଼ାତ୍ରା ମାପ୍‌ରୁ ସାର୍ଦା ଡିଂମ୍ୟାଃକେ । 23 ଚତୁର୍‌ ରେମୁଆଁ ଗିଆନ୍‌ ଡାମ୍ୟାଃକେ; ମାତର୍‌ ମୁର୍କ‍ଇଂନେ ମନ୍‌ ଅଜ୍ଞାନ୍‌ ବୁଦି ଆଃସୁଏଃଏ । 24 ସ୍ଲେରେନେ ନ୍ତି ସାସନ୍‌ ଡିଂଏ; ମାତର୍‌ ଅଲ୍‌ସୁଆ ରେମୁଆଁକେ ଚାକର୍‌ କାମ୍‌ ଆଃଡିଂଏ । 25 ରେମୁଆଁନେ ଜବର୍‌ ଚିନ୍ତା ମନ୍‌କେ ଆଲ ଆଃଡିଂଏ; ମାତର୍‌ ନିମାଣ୍ଡା ସାମୁଆଁ ଆମେକେ ସାର୍ଦା ଆଃଡିଙ୍ଗ୍‌ଏ । 26 ଦରମ୍‌ ରେମୁଆଁ ନିଜର୍‌ ଡାଗ୍ରା ବାସାଲାଏଃକ୍ନେ ଡୁଆଣ୍ଡ୍ରେନେ ଗାଲି ଆଃସୁଏଃଏ; ମାତର୍‌ ଦୁସ୍‌ଟ‍ଇଂନେ ଗାଲି ଆମେଇଂକେ ଆଃଆବଃଏ । 27 ଅଲ୍‌ସୁଆ ରେମୁଆଁ ଟୁଇଂବକ୍ନେ ପସୁନେ ଚିଲି ଆଡୁଏ ଣ୍ଡୁ, ମାତର୍‌ ରେମୁଆଁଇଂନେ ଜାବର୍‌ ମୁଲ୍ୟନେ ସମ୍ପତି ସ୍ଲେରେନେ ପାକା ଲେଃଏ । 28 ଦରମ୍‌ ରକମ୍‌ନେ ଗାଲି‍ଅରିଆ ଜିବନ୍‌ ଲେଃଏ; ବାରି, ଆତ୍‌ଅରିଆ ଅଲେଙ୍ଗ୍‌ନେ ଗାଲିଅରିଆ ମରନ୍‌ ଆଲେଃ ଣ୍ଡୁ ।