1 ଗିଆନ୍‌ ଲାଏଃକ୍ନେ ସେଲାମ୍ବୁଏଃ ନିଜର୍‌ ଡୁଆ ଆଃରେଏ; ମାତର୍‌ ଅଗ୍ୟାନ୍‌ ସେଲାମ୍ବୁଏଃ ନିଜର୍‌ ନ୍ତି ଏଃତେ ଆତେନ୍‌ ପାକ୍‌ଚି ଜଗ୍‌ତ୍ଲାଗ୍‌ଏ । 2 ଜା ନିଜର୍‌ ଦରମ୍‌ରେ ବେବ‍ଆର୍‌ ଡିଂଏ, ମେଁ ମାପ୍‌ରୁକେ ବୁଟମେଗ୍‌ଏ; ମାତର୍‌ ଦଦ୍ୟା ଗାଲି ଅଲେଙ୍ଗ୍‌ଣ୍ଡ୍ରେ ଆମେକେ ଗ୍ରୁନା ଡିଂଏ । 3 ଅଗ୍ୟାନ୍‌ ରେମୁଆଁନେ ତୁମୁଆଃଅରିଆ ଆଂକାର୍‌ନେ ଟେଙ୍ଗ୍‌ ଲେଃଏ; ମାତର୍‌ ଗିଆନ୍‌ ଲାଏଃକ୍ନେ ରେମୁଆଁନେ ତୁମୁଆଃ ଆମେଇଂକେ ରକ୍ୟା ଡିଂଏ । 4 ଅରେଃ ଆଲେଃଲା, କୁଣ୍ଡ୍‌ ପର୍‌ଚଲ୍‌ ଲେଃଏ; ବାରି, ଅରେଃନେ ବପୁରେ ଜାବର୍‌ ସମ୍ପତି ଡିଂଏ । 5 ବିସ୍‌ବାସ୍‌ରେ ଲାଏଃକ୍ନେ ସାକି ମିଚ୍‌ ଆବାସଙ୍ଗ୍‌ ଣ୍ଡୁ; ମାତର୍‌ ସତ୍‌ ଣ୍ଡୁନେ ସାକି ମିଚ୍‌ ବାସଙ୍ଗ୍‌ଏ । 6 ନିନ୍ଦା ଡିଂଣ୍ଡ୍ରେ ଗିଆନ୍‌ ତୁର୍‌ଲା ଆ‍ଅବା ଣ୍ଡୁ; ମାତର୍‌ ବୁଦି ଲାଏଃକ୍ନେ ରେମୁଆଁ ନ୍‌ସାଃ ବିଦ୍ୟା ସ‍ଅଜ୍‌ । 7 ମୁର୍କ ଡାଗ୍ରା ୱେଲା, ନା ମେଁନେ ଗିଆନ୍‌ ଲାଏଃକ୍ନେ ତୁମୁଆଃ ନାକେ ଣ୍ଡୁ । 8 ଚାଲାକି ରେମୁଆଁ ଗିଆନ୍‌ରେ ନିଜର୍‌ ଗାଲି ବିଚାର୍‌ ଡିଙ୍ଗ୍‌ଏ, ମାତର୍‌ ମୁର୍କଇଂ ଅଜ୍ଞାନ୍‌ରେ ନାଲେ ମ୍ୟାଃଆର୍‌କେ । 9 ଅଗ୍ୟାନ୍‌ ରେମୁଆଁ ପାପ୍‌କେ ବ୍ଲୁଃନେ ଡାଗ୍‌ଚେଃ ବାବେଆର୍‌ଏ; ମାତର୍‌ ଦରମ୍‌ ରେମୁଆଁଇଂନେ ବିତ୍ରେ ଅନୁଗ୍ରହ ଲେଃଏ । 10 ମନ୍‌ ନିଜର୍‌ ଦୁକ୍‌ ମ୍ୟାଃଏ; ବାରି, ମାସ୍ନାମୁଆଃ ରେମୁଆଁ ମେଁନେ ସାର୍ଦାଅରିଆ ଆମିସୁଃ ଣ୍ଡୁ । 11 ଦୁସ୍‌ଟ‍ଇଂନେ ଡୁଆ ବିନାସ୍‌ ଡିଂଏ; ମାତର୍‌ ଦରମ୍‌ ରେମୁଆଁଇଂନେ କୁଡ଼ିଆ ମ୍ନାଃ ଡିଂଏ । 12 ରେମୁଆଁଇଂନେ ମ୍‌ମୁଆଃଅରିଆ ମେଃ ମେଃ ଗାଲି ସିଦା ତ୍ନାଏ; ମାତର୍‌ ମେଁନେ ସାରାସାରି ବେଲା ଗୁଏଃନେ ଗାଲି ଲେଃଏ । 13 ଲୁଆଃନେ ବେଲା ଡିଗ୍‌ ମନ୍‌ ଦୁକ୍‌ ଡିଂଏ; ବାରି, ସାର୍ଦାନେ ସାରାସାରି ଅଃନେ । 14 ମନ୍‌ଅରିଆ ବୁଲ୍‌ ଗାଲି ୱେଣ୍ଡ୍ରେ ନିଜର୍‌ ବେବ‍ଆର୍‌ନେ ଚୁଚୁଅରିଆ ବର୍‌ତି ଡିଂଏ; ବାରି, ନିମାଣ୍ଡାଃ ରେମୁଆଁ ନିଜର୍‌ବାନ୍‌ ସାନ୍ତି ଡିଂଏ । 15 ଦରମ୍‌ ରେମୁଆଁ ସାପା ସାମୁଆଁ ସତ୍‌ ମାନେଃଏ; ମାତର୍‌ ଚତୁର୍‌ ରେମୁଆଁ ନିଜର୍‌ ସାପା ଗାଲି ଅଲେଙ୍ଗ୍‌ନେ ନିମାଣ୍ଡାଃ ବାବ୍‌ରେ ବୁଜେଏ । 16 ଜ୍ଞାନି ରେମୁଆଁ ବୁଟ‍ଏ ଆରି ଦଦ୍ୟାକେ ଆନ୍ତାର୍‌ ବିଃଏ; ମାତର୍‌ ମୁର୍କ ରେମୁଆଁ ସାଆସ୍‌ ଡିଂଚେଃ ଆଦେସ୍‌କେ ଅମାନି ଡିଂଏ । 17 ଜା ମାର୍ୟାଃତୁଗ୍‌ ରିସା ଡିଂଏ, ମେଁ ମୁର୍କ କାମ୍‌ ଡିଂଏ; ବାରି, ଦଦ୍ୟା ଚିନ୍ତା ଡିଂଣ୍ଡ୍ରେ ମୁର୍କ ରେମୁଆଁକେ ଗ୍ରୁନା ଡିଂଏ । 18 ଦରମ୍‌ ରେମୁଆଁଇଂ ଅଗ୍ୟାନ୍‌ ରେମୁଆଁ ରକମ୍‌ ଅଦିକାର୍‌ ବାଆର୍‌ଏ; ମାତର୍‌ ଚତୁର୍‌ ରେମୁଆଁଇଂ ଗିଆନ୍‌ ରକମ୍‌ ମୁକୁଟ୍‌ ସଃଆର୍‌ଏ । 19 ଦଦ୍ୟା ରେମୁଆଁଇଂ ନିମାଣ୍ଡାଃ ରେମୁଆଁଇଂନେ ଡାଗ୍ରା ଆରି ଦୁସ୍‌ଟ‍ଇଂ ଦରମ୍‌ ରେମୁଆଁଇଂନେ କାପାଟ୍‌ଅରିଆ ମୁଣ୍ଡିଆ ବଗ୍‌ଆର୍‌ଏ । 20 ଗରିବ୍‌ ନିଜର୍‌ ଡାଗ୍ରା ବାସାଲାଏଃକ୍ନେ ଡୁଆଣ୍ଡ୍ରେ ଡିଗ୍‌ ଗ୍ରୁନା ଡିଂଏ; ମାତର୍‌ ସାକାର୍‌ନେ ଗୁଲୁଏ ସାଙ୍ଗ ଲେଃଆର୍‌ଏ । 21 ମୁଃଡ଼ି ରେମୁଆଁ ଡାଗ୍ରା ଡାଗ୍ରା ଡୁଆଣ୍ଡ୍ରେକେ ଗ୍ରୁନା ଡିଂଏ, ମେଁ ପାପ୍‌ ଡିଂଏ; ମାତର୍‌ ମୁଃଡ଼ି ରେମୁଆଁ ଗରିବ୍‌ ରେମୁଆଁକେ ଦୟା ଡିଂଏ, ମେଁ ନିମାଣ୍ଡାଃ । 22 କରାପ୍‌ ଚିନ୍ତା ଡିଂଣ୍ଡ୍ରେଇଂ ମେଃନେ ତାନ୍ଦ୍ରା ଆଡିଂଆର୍‌ ଣ୍ଡୁ ? ମାତର୍‌ ନିମାଣ୍ଡାଃ ଚିନ୍ତା ଡିଂଣ୍ଡ୍ରେଇଂ ଆଡ଼ାତ୍ରା ଲିବିସଃ ଆରି ସତ୍‌ନେ ବେବ‍ଆର୍‌ ଆଃଡିଂଏ । 23 ସାପା ରକମ୍‌ନେ କାମ୍‌ଅରିଆ ଲାବ୍‌ ଲାଏଃକେ; ବାରି, କାମ୍‌ ମାଡିଙ୍ଗ୍‌ଚେ ସରାଃ ସାମୁଆଁ ବାସଙ୍ଗ୍‌ଲା ଦରିଦ୍ର ଡିଙ୍ଗ୍‍ଡିଂଏ । 24 ଜ୍ଞାନି‍ଇଂନେ ମୁକୁଟ୍‌ ମେଇଂନେ ଦନ୍‌; ବାରି, ମୁର୍କ‍ଇଂନେ ମୁକୁଟ୍‌ ଗିଆନ୍‌ ଣ୍ଡୁନେ ମୁକୁଟ୍‌ । 25 ସତ୍‌ ସାକି ଗୁଲୁଏରେନେ ଜିବନ୍‌କେ ରକ୍ୟା ଡିଂଏ; ମାତର୍‌ ନାଲେ ବାସଙ୍ଗ୍‌ଣ୍ଡ୍ରେ ନାଲେ ମ୍ୟାଃକେ । 26 ମାପ୍‌ରୁନେ ବିସ‍ଏରେ ବୁଟନେ ଆଃ ଡାଟ୍‌ ବିସ୍‌ବାସ୍‌ ବନେ; ଆରି, ମେଁନେ ଉଙ୍ଗ୍‌ଡେଇଂ ପୁଣ୍ଡେନେ ଡୁଆ ବାଆର୍‌ଏ । 27 ଗୁଗୁଏଃନେ ବ୍ନେଗ୍‌ବାନ୍‌ ଆଃଆଣ୍ଡେ ନ୍‌ସାଃ ମାପ୍‌ରୁକେ ବୁଟନେ ଡିଂଡିଂକେ ଜିବନ୍‌ନେ ଜର୍‌ନାଡ଼୍ୟାଃ ରକମ୍‌ । 28 ଜାବର୍‌ ରେମୁଆଁ ଡିଙ୍ଗ୍‌ଲା ଇଃସାଙ୍ଗ୍‌ଇଂକେ ସନ୍‌ମାନ୍‌ ଡିଙ୍ଗ୍‌ଏ; ବାରି, ରେମୁଆଁ ସଂକ୍ୟା ଗଣ୍ଡା ଡିଙ୍ଗ୍‌ଲା ରାଜାନେ ବିନାସ୍‌ ଡିଂଏ । 29 ଜା ଦିରେ ରିସା ଡିଂଏ, ମେଁ ମ୍ନାଃ ବୁଦିମାନ୍‌; ବାରି, ମାର୍ୟାଃତୁଗ୍‌ ରିସା ଡିଂନେ ମୁର୍କ ରକମ୍‌ ରୁପ୍‌ ଆସୁଏଃଏ । 30 ସାନ୍‌ତିନେ ମନ୍‌ ଗାଗ୍‌ଡ଼େନେ ଜିବନ୍‌ ରକମ୍‌; ବାରି, ଇର୍ସା ଞ୍ଚ୍ୟାନେ ବିନାସ୍‌ ରକମ୍‌ । 31 ମୁଃଡ଼ି ରେମୁଆଁ ଗରିବ୍‌ ରେମୁଆଁ ଆଡ଼ାତ୍ରା ଦଦ୍ୟା ବେବ‍ଆର୍‌ ଡିଂଏ, ମେଁ ମେଁନେ ଆଃରେଣ୍ଡ୍ରେକେ ନିନ୍ଦା ଡିଂଏ; ବାରି, ଜା ଗରିବ୍‌ ରେମୁଆଁକେ ଲିବିସଃ ଡିଂଏ,ମେଁ ଆମେକେ ଆଲାଦ୍‌ ଡିଂଏ । 32 ଦୁସ୍‌ଟ ରେମୁଆଁ ନିଜର୍‌ ଦଦ୍ୟା କାମ୍‌ଅରିଆ ବିନାସ୍‌ ଡିଂଏ, ମାତର୍‌ ଗୁଗୁଏଃନେ ବେଲା ଦରମ୍‌ ରେମୁଆଁନେ ବାସାନେ ଜାଗା ଲେଃଏ । 33 ଗିଆନ୍‌ ବୁଦିମାନ୍‌ନେ ରୁଦୟ୍‌ନିଆ ଲେଃଏ; ବାରି, ମୁର୍କନେ ମନ୍‌ ବିତ୍ରେନେ ଚିନ୍ତା ତ୍ନାଏ । 34 ଦରମ୍‌ ସାମୁଆଁ ମୁଇଂ ରାଜ୍ୟକେ ଉନ୍ନତି ଆଃଡିଙ୍ଗ୍‌ଏ; ମାତର୍‌ ପାପ୍‌ ରେମୁଆଁଇଂନେ ଅପମାନ୍‌ ଆଃଡିଙ୍ଗ୍‌ଏ । 35 ବୁଦିମାନ୍‌ ଚାକର୍‌ ରାଜାନେ ଅନୁଗ୍ରହ ବାଏ; ବାରି, ଜା ଗିଆସଃ ଡିଂଏ, ମେଁ ଆଡ଼ାତ୍ରା ମେଁ ରିସା ଡିଂଏ ।