1 ମ୍ବ୍ରେ ସାମୁଆଁ ରିସାକେ ବନ୍ଦ୍‌ ଆଃଡିଂଏ; ମାତର୍‌ କୁଟ୍‌ ସାମୁଆଁ ରିସା ଆଃତାର୍‌ଏ । 2 ଜ୍ଞାନି‍ଇଂନେ ନ୍ଲିୟା ସତ୍‌ ବାବ୍‌ରେ ଗିଆନ୍‌ ସାମୁଆଁ ବାସଙ୍ଗ୍‌ଏ; ମାତର୍‌ ମୁର୍କ‍ଇଂନେ ତୁମୁଆଃ ମୁର୍କ ସାମୁଆଁ ଲୁଆର୍‌ଏ । 3 ମାପ୍‌ରୁନେ ମ୍‌ମୁଆଃ ସାପା‍ଅରିଆ ଲେଃଚେଃ ଅଦରମ୍‌ ଆରି ନିମାଣ୍ଡାଃ ରେମୁଆଁଇଂକେ କିକେଡିଂକେ । 4 ବୁଙ୍ଗ୍‌ଲେଃକ୍ନେ ନ୍ଲିୟା ଜିବନ୍‌ ସ୍ଲାଃ ରକମ୍‌; ବାରି, କୁଟ୍‌ ସାମୁଆଁ ବାସଙ୍ଗ୍‌ନେ ନ୍ଲିୟା ଆତ୍ମା ପାକ୍‌ଚିଃଏ । 5 ଅଗ୍ୟାନ୍‌ ରେମୁଆଁ ନିଜର୍‌ ଆବାନେ ସାସନ୍‌ ଗ୍ରୁନା ଡିଂଏ; ବାରି, ବୁଦି ଆତ୍ଲା ଜା ୱିଙ୍ଗ୍‌ଏ ଆରି ଆମେକେ ମାନେଃଏ, ମେଁ ବୁଦି ବାଏ । 6 ଦାର୍ମିକ୍‌ନେ ଡୁଆ ଜାବର୍‌ ସମ୍ପତି ଲେଃଏ; ବାରି, ଦୁସ୍‌ଟନେ ଆର୍ଜେକ୍ନେ ଦନ୍‌ ଅରିଆ କସ୍‌ଟ ଲେଃଏ । 7 ଜ୍ଞାନିନେ ତୁମୁଆଃ ଗିଆନ୍‌ ବିଃଏ; ମାତର୍‌ ମୁର୍କନେ ମନ୍‌ ଦେତ୍‌ରକମ୍‌ ଆଡିଂ ଣ୍ଡୁ । 8 ଦୁସ୍‌ଟ‍ଇଂନେ ବଲି ବିଃନେ ଡିଂଡିଂକେ ମାପ୍‌ରୁନେ ଡାଗ୍ରା ଗ୍ରୁନାନେ ସାମୁଆଁ; ମାତର୍‌ ଦରମ୍‌ ରେମୁଆଁଇଂନେ ପାର୍‌ତନା ମେଙ୍ଗ୍‌ନେ ସାର୍ଦାନେ ସାମୁଆଁ । 9 ଦୁସ୍‌ଟନେ ଅଲେଙ୍ଗ୍‌ନେ ଗାଲି ଡିଂଡିଂକେ ମାପ୍‌ରୁନେ ଗ୍ରୁନାନେ ସାମୁଆଁ; ମାତର୍‌ ଦରମ୍‌ ରେମୁଆଁନେ ପ୍ଲାଃ ୱେଣ୍ଡ୍ରେକେ ମେଁ ଆଲାଦ୍‌ ଡିଂମ୍ୟାଃକେ । 10 ଦଦ୍ୟା ଗାଲି ୱେଣ୍ଡ୍ରେ ଆଡ଼ାତ୍ରା ଦୁକ୍‌ ବିଃନେ ସାସ୍ତି ଗଟେଏ; ବାରି, ମୁଃଡ଼ି ରେମୁଆଁ ୱିଙ୍ଗ୍‌ନେ ଗ୍ରୁନା ଡିଂଏ, ମେଁ ଗୁଏଃଏ । 11 ପାତାଲ୍‌ ଆରି ବିନାସ୍‌ ଜାଗା ମାପ୍‌ରୁନେ ସେଃମଁ ଲେଃଏ; ତେଲା ରେମୁଆଁଇଂନେ ମନ୍‌ ମେଁନେ ବୁଃଡ଼ିଚେ ଲେଃୟାଏ ? 12 ନିନ୍ଦା ଡିଂଣ୍ଡ୍ରେ ତୁର୍‌ଚେଃ ଅବା ନ୍‌ସାଃ ବଲ୍‌ ଆବା ଣ୍ଡୁ, ମେଁ ଜ୍ଞାନିନେ ଡାଗ୍ରା ଆୱେ ଣ୍ଡୁ । 13 ସାର୍ଦା ମନ୍‌ ସାର୍ମୁଆଃକେ ସାର୍ଦା ଆଃଡିଂଏ; ବାରି, ମନ୍‌ନେ ଦୁକ୍‌ ବାନ୍‌ ଆତ୍ମା ବାଙ୍ଗେୱେଏ । 14 ବୁଦିମାନ୍‌ନେ ମନ୍‌ ଗିଆନ୍‌ ତୁର୍‌ଏ; ମାତର୍‌ ମୁର୍କ‍ଇଂନେ ସାର୍ମୁଆଃ ଅଜ୍ଞାନ୍‌ନେ କାଦି ଚଙ୍ଗ୍‌ଏ । 15 ଦୁକ୍‌ ରେମୁଆଁନେ କାଲାଆଃ ଦୁକ୍‌ ଗଟେଏ; ମାତର୍‌ ଜା ସାର୍ଦା ମନ୍‌ରେ ଲେଃଏ, ଆମେକେ କାଲାଆଃ ଚଙ୍ଗ୍‌ନେ ମିଲେଏ । 16 ଅସାନ୍ତିରେ ଲାଏଃକ୍ନେ ଜାବର୍‌ ସମ୍ପତି ବାଦୁଲ୍‌ ମାପ୍‌ରୁକେ ବୁଟଚେଃ ଲାଏଃକ୍ନେ ଗଣ୍ଡାଃ ସମ୍ପତି ଲେଃଲା ନିମାଣ୍ଡାଃ । 17 ଇଂସା ଏଃତେ ଗାଗ୍‌ଡ଼େକ୍ନେ ଅରେଃଚି କାଦି ଚଙ୍ଗ୍‌ନେ ବାଦୁଲ୍‌ ଆଲାଦ୍‌ ଲାଏଃକ୍ନେ ଜାଗା‍ଅରିଆ ପାଃଡ଼ୁଆଃ କାଦି ନିମାଣ୍ଡାଃ । 18 ରିସା ଡିଂଣ୍ଡ୍ରେ ୱିଙ୍ଗ୍‌ଆଃ ଆଃତାର୍‌ଏ; ବାରି, ଜା ରିସା ଆଡିଙ୍ଗ୍‌ ଣ୍ଡୁ ମେ ୱିଙ୍ଗ୍‌ଆଃ ଆଃବୁଙ୍ଗ୍‌ଏ । 19 ଅଲ୍‌ସୁଆନେ ଗାଲି ଗ୍ରେଃ ତୁରାଃ ରକମ୍‌, ମାତର୍‌ ଦରମ୍‌ ରେମୁଆଁନେ ଗାଲି ଅସାର୍‌ ଗାଲି ରକମ୍‌ ଆଃଡିଂଏ । 20 ଜ୍ଞାନି ଉଙ୍ଗ୍‌ ଆବାକେ ସାର୍ଦା ଆଃଡିଙ୍ଗ୍‌ଏ; ମାତର୍‌ ମୁର୍କ ଉଙ୍ଗ୍‌ ନିଜର୍‌ ଇୟାଙ୍ଗ୍‌କେ ଗ୍ରୁନା ଡିଂଏ । 21 ବୁଦି ଆଲାଏଃକ୍ନେ ରେମୁଆଁ ଆଡ଼ାତ୍ରା ଅଗ୍ୟାନ୍‌ ରେମୁଆଁ ସାର୍ଦା ଡିଙ୍ଗ୍‌ଏ; ମାତର୍‌ ବୁଦିମାନ୍‌ ରେମୁଆଁ ନିଜର୍‌ ଗାଲି ସିଦା ଆଃଡିଂଏ । 22 ନିମାଣ୍ଡା ସିକ୍ୟା ବିଃଣ୍ଡ୍ରେ ଆଲେଲା ଜଜନା ପୁରନ୍‌ ଆଡିଂ ଣ୍ଡୁ, ମାତର୍‌ ଜାବର୍‌ ମନ୍ତ୍ରୀ ଇଂନେ ଇଚାରେ ଆତେନ୍‌ ପୁରା ଡିଙ୍ଗ୍‌ଏ । 23 ନିଜର୍‌ ତୁମୁଆଃନେ ସାମୁଆଁରେ ରେମୁଆଁନେ ସାର୍ଦା ଡିଂଏ, ବାରି ସମାନ୍‌ ବେଲାନେ ସାମୁଆଁ ଡିରକମ୍‌ ନିମାଣ୍ଡାଃ ! 24 ଆଲ ଲାଏଃକ୍ନେ ପାତାଲ୍‌କେ ଆନ୍ତାର୍‌ନ୍‌ସା ବୁଦିମାନ୍‌ ରେମୁଆଁ ଆତ୍‌ଲା ଜିବନ୍‌ନେ ଗାଲି ଆଡ଼ାତ୍ରା ଲେଃକେ । 25 ଗର୍ବ ରେମୁଆଁନେ ଡୁଆ ମାପ୍‌ରୁ ତାଗ୍‌ବିଃଏ; ମାତର୍‌ ଗ‍ଏଃସାଙ୍ଗ୍‌କୁଏଃନେ ଏରିଆ ମେଁ ଡାଟ୍‌ ଆଃଡିଂଏ; 26 ଦଦ୍ୟା ଚିନ୍ତା ମାପ୍‌ରୁନେ ଡାଗ୍ରା ଗ୍ରୁନାନେ ସାମୁଆଁ ଡିଙ୍ଗ୍‌ଏ; ମାତର୍‌ ସୁନ୍ଦର୍‌ ସାମୁଆଁ ପବିତ୍ର ଡିଙ୍ଗ୍‌ଏ । 27 ଲବ୍ରା ରେମୁଆଁ ନିଜର୍‌ କୁଟୁମ୍‌ ରେମୁଆଁକେ ଦୁକ୍‌ ବିଃଏ, ମାତର୍‌ ମୁଃଡ଼ି ରେମୁଆଁ ଜାଲାରି ଡୁଙ୍ଗ୍‌ଡନ୍‌ସା ଗ୍ରୁନା ଡିଂଏ, ମେଁ ମ୍ବ୍ର‍ଏ । 28 ଦାର୍ମିକ୍‌ନେ ମନ୍‌ ଚିନ୍ତା ଡିଂଚେଃ ସାମୁଆଁ ବାସଙ୍ଗ୍‌ଏ; ମାତର୍‌ ଦୁସ୍‌ଟ‍ଇଂନେ ତୁମୁଆଃ ଦଦ୍ୟା ସାମୁଆଁ ବାସଙ୍ଗ୍‌ ବିଃଏ । 29 ମାପ୍‌ରୁ ଦୁସ୍‌ଟ‍ଇଂନେବାନ୍‌ ସ୍ଲ ଲେଃଏ; ବାରି, ଦାର୍ମିକ୍‌ ରେମୁଆଁଇଂନେ ପାର୍‌ତନା ମେଁ ଦ୍ରିଗ୍‌ଏ । 30 ଚଞ୍ଚଲ୍‌ ସାର୍ମୁଆଃ ମନ୍‌କେ ସାର୍ଦା ଆଃଡିଂଏ; ବାରି, ନିମାଣ୍ଡାଃ ସାମୁଆଁ ଞ୍ଚ୍ୟାକେ ଗାଗ୍‌ଡ଼େ ଆଃଡିଂଏ । 31 ମୁଃଡ଼ିନେ ନ୍ଲୁଗ୍‌ ଜିବନ୍‌ ଆଃମ୍ବ୍ରନେ ୱିଙ୍ଗ୍‌କ୍ନେ ସାମୁଆଁ ଦ୍ରିଗ୍‌ଏ, ଆତେନ୍‌ ଜ୍ଞାନି‍ଇଂନେ ବିତ୍ରେ ବାସାଏ । 32 ମୁଃଡ଼ି ରେମୁଆଁ ସାସନ୍‌ ଅମାନି ଡିଂଏ, ମେଁ ନିଜର୍‌ ପାରାନ୍‌କେ ଗ୍ରୁନା ଡିଂଏ; ମାତର୍‌ ୱିଙ୍ଗ୍‌କ୍ନେ ସାମୁଆଁ ଜା ଦ୍ରିଗ୍‌ଏ, ମେଁ ବୁଦି ବାଏ । 33 ମାପ୍‌ରୁନେ ବିସ‍ଏରେ ବୁଟଚେଃ ଆଃ ଗିଆନ୍‌ ବାନେ ନିମାଣ୍ଡା ସାମୁଆଁ; ବାରି, ମ‍ଇମାନେ ସେଃମଁ ଦରମ୍‌ ଲେଃଏ ।